Jisabhu 1 - O Mikanda Ikola

Kasau-sau ka divulu dioso

¹ Jisabhu ja Solomá, monʼa Davidi, sobha ia Izalaiele;

² Phala athu ejiie kikala unjimu ni ulongelu ku muenhu iú; mbé a tongolole maka ma unjimu.

³ Phala kutambula ulongelu ua tongoloka ni kukuata o uiukilu, ni kilunji, ni kutetuluka;

⁴ phala kudimuna o ilalu, ni kulonga anandenge o kuijiia, ni kilunji kioso kia fuama.

⁵ Phala njimu ki evua a kule mu unjimu uê, o ua tongoloka a tambule kilunji kia ku di tumina.

⁶ Phala kubatekela o Sabhu ni dilomboluelu diê; ni kubatekela o maka ma jinjimu, ni ixima iâ.

Kuehele kuila akua ituxi a ku sendula

⁷ Uoma ua Jihova diene o dimatekenu dia unjimu. Maji o iôua-phe a dituna o kuijiia kua unjimu ni ulongelu.

⁸ Eie, monʼami, ivua ulongelu ua tatʼenu, kana kueha o ijila ia mamʼenu.

⁹ Kuma ima ienhiʼii ia kà di bhanga kiene o kitundu kia kuzediua ku mútue ué, ni jinzenzela ja kunhenga mu xingu ié.

¹⁰ Monʼami, akua ituxi se a sota ku kusendula ni izuelu iâ ia ẋanana, eie kana ku a evua.

¹¹ O kia kuambela, exi: Tu bande kunu, tu batamene mu kubhubhisa manhinga; tu zombe muthu ua kambe kikuma tu mu bhange-kiu;

¹² tu a habule ni muenhu uâ, mukua ni mbila; tu a minhe muene ni muvimba uâ kala a tuluka mu kina.

¹³ Bhene bhu tua-nda kubongela mbole ia ima ioso ia te kiavulu; tua-nda kuizalesa jinzu jetu ni ima ia kubhûnda;

¹⁴ eie bokona kiá mu kisangela kietu; etu oso muene tu kuate kiá soua imoxi.

¹⁵ Eie-phe, monʼami, enhó kana ku di ta-nâ kumoxi mu njila iâ; sondolola kinama kié mu hoka jâ;

¹⁶ mbata o inama iâ i di sungila mu kubhanga phulu, o kieza mu kuzunza o manhinga a sakalala.

¹⁷ Ni kidi kiene, njíla iosoioso ku i olekela mubhetu ku mesu mê a ku tala, u i lémbua.

¹⁸ O iá-phe a di tela mibhetu ia ku di bhubhisa ene-muene o manhinga mâ; ala mu kuzomba o mienhu iâ-ene muene.

¹⁹ Kiene-phe ki kala o jihoka ja ió oso a hamena nganhu iaxidi; kifua kiki kia ibha, ki jibha o muenhu ua muthu uoso uala na-kiu.

O kutendelela kua Unjimu

²⁰ O Unjimu u kola bhu makanga, ni bhu itanda, ni mu nzunga, uene u tenda u tona.

²¹ Ni mu jiphambu, ni bhua bhongoloka o mundu u ta nzògo; uimana ni kuhandekela ku mielu ia mabhitu ma imbaka, ni mu sanzala u ta maka, uixi:

²² Enu ilalu, ulalu uenu mu suka na-u bhebhi? Enu jisemenhi, usemenhi kifua ki mu ueha dingi? Enu mu ioua, o kuijiia mu di zemba na-ku, kuambe?

²³ O ki nga mi bazelʼiki, lungulukenu kiá; talesa, ngi lundulula o Nzumbi iami ku thandu dienu, anga ngi mi ijidisa o maka mami.

²⁴ Maji-phe o ki ngʼedi ngʼixana, enu-phe mua di tunu kuitaia; nga sunununa o lukuaku luami, ki bhuala ua ngi batekela,

²⁵ enu mua tobhesa o kaiula kami koso, kubazela kuami mua di tunu-ku,

²⁶ eme ue nganda ku mi olela ki mi tula o divuua, kioso ki mʼiza o kimbuua, eme nga-nda ku mi bhanga kasekelelu.

²⁷ Mu kuila kimbuua kia mi bhixila kala kibuika, divuua dia mi tula kala mabhuku ma temanana, kia kà mi tukumuisa o hadi ni lamba,

²⁸ kienhokio ene ela adi kola kokuami, eme-phe ki nga kà etaia; o kia kà di meneka ku ngi sota, ka tena ku ngi sanga.

²⁹ Mbata ene o kuijiia a dizemba na-ku; a di tunu kusola o uoma ua Jihova.

³⁰ Kaiula kami, ka ka bhana kididi; o kubazela kuami, a ku bhuidila.

³¹ Kala kiki-phe, a kà diaula-ku ku kibundu kia tundu ku uendelu uâ, anga jiphangu jâ-ene muene jʼa kuma.

³² Kuma o kubaluka kua jisemenhi, kene o kalunga kâ; o kubhanduluka kua ioua, kuene kua kà a buikisa.

³³ Maji uoso u ngʼividila ki ngi zuela u tunga u soma, kana-ku kia iibha ki mu kuatesa uoma.