Jipoxolo 8 - O Mikanda Ikola

¹ Saúlu ue ua ki mono kuuabha, o kujibha Xitevá. Kizuua kieniokio anga a kuata kuzukutisa kiavulu o Ngeleja iala mu Jeluzaleme. O jikidistá ene oso anga a muanganena mu jixi ja Judeia ni Samádia, ku xala ngó o jipoxolo.

Ngeleja a i zukutisa kiavulu kuala Saúlu

² Ku kala athu a ujitu a fûnda Xitevá, a dila jingololo mukonda dia kufua kuê.

³ Saúlu-phe u kala mu muanga o Ngeleja, ualu sota ku i zubha-ku. U bokona mu jinzu joso, u koka-mu mala ni ahatu, u a tesa mu ʼaleia.

Njimbu iambote i sambuka ku Samádia

⁴ Eniá-phe, oso a muangana, a bhita ku mabhata moso ni kulonga o maka.

⁵ Felipe anga u kulumuka mu mbonge ia Samádia ni kukolela athu koko o Njimbu ia Kristu.

⁶ Ifuẋiʼoio ni muenhu umoxi a tambulula imbamba ioso ia a tangela Felipe. Ene oso a kala mu ku mu ivua kiambote anga a mona isumua ia bhange.

⁷ Kuma ku kala athu avulu o nzumbi jaiibha jala na-ju ji tunda ni ku di kola; avulu a kate kila, ni iá a nemana, anga a disanza.

⁸ Kienʼiki, mu mbonge ia Samádia, anga mu kala ngalasa iavulu.

⁹ Bhu kala-phe muthu bhenhobho, dijina diê Ximá, ua tambula uanga, anga u kala mu kudiuanesa akua Samádia, hé u tubhula fuma kuma muène munéne.

¹⁰ Muenʼiú ene oso a tungu mu mbonge, ni makota ni jindenge a mu ivua, aia ni ku mu tanga exi: Muthu iú munène, muène o kutena kua Nzambi mu kidi, kuene mu kuixana exi: Kutena kulola.

¹¹ Ene oso a mu tambulula jinga, mukonda uandeka ukulu ni ku a diuanesa ni iphata iê.

¹² Maji ene ki a xikana Felipe-phe, uala mu ku a longa o Njimbu Iambote ia Utuminu ua Nzambi, ni dijina dia Jezú Kristu, a tambula o batizu, ni mala ni ahatu.

¹³ Ni muene Ximá, anga u xikana. O kia mu batizala, u kala mu kuenda ni Felipe, hé u kala mu talesa o isuma ni madiuanu ma makota mala kubhanga, anga u diuana.

¹⁴ Kiki o Jipoxolo ja xala mu Jeluzaleme, kia kʼ ivu kuila maka ma Nzambi a ma tambulula ue mu Samádia, a tumikisa-ku Phetele ni Nzuá.

¹⁵ Ene kia zubha kutula, a samba phala akua Samádia a tambule Nzumbi Ikôla.

¹⁶ Kuma o Nzumbi Ikôla kiluua a tuluka ku thandu dia muthu mudiâ. Ene a a batizala ngó mu dijina dia Ngana Jezú.

¹⁷ Anga o Phetele ni Nzuá a tula maku ku thanduʼ a mitue iâ, ene anga a tambula o Nzumbi Ikôla.

¹⁸ Kiki Ximá kia mono kuma Nzumbi Ikôla a mu tambuila mu ku a tula maku ma Jipoxolo ku mitue iâ, u bhana Jipoxolo kitadi, uixi:

¹⁹ Eme uami ngi bhanienu o kutenʼ uku, phala uoso ngi mu tula o maku mami, a tambule o Nzumbi Ikôla.

²⁰ Phetele-phe ua mu ambela, uixi: Phalata ié i texike ni eie-muene kumoxi mu infernu! Mukonda eie ua fika kuma usumba ujitu ua Nzambi mu kitadi?

²¹ Eie mu Njimbu iii kuala-mu ni kibatu mba kididi, kuma o muẋima ué ki ua iukila kua Nzambi.

²² Diela kindala o kubhuma kué kuku, u sambele Ngana, sumba ki ua fikile ku muẋima u ku lolola-kiu.

²³ Kuma nga ku mono uezala mu luimbi, luimbi luedi kala ndululu mu kulula, eie uafu mu múkala ua ituxi.

²⁴ Ximá bhenhobho u kumbulula Phetele ni Nzuá, uixi: Ngi sambedienu kua Ngana, nga mi diondo, phala o ima i mu tangeʼ oio ki iize ko kuami.

²⁵ Phetele ni Nzuá bheniobho kia zubha kubhana umbangi, ni kutanga o maka ma Ngana, a vutuka ku Jeluzaleme. Anga mu njila a tula Njimbu Iambote mu jisanzala javulu ja akua Samádia.

Felipe ni Ngolambole

²⁶ Mukunji ua Ngana-phe u ambela Felipe, uixi: Di iudike, u katuke, uie ku sulu katé mu ikoka ia Jeluzaleme, i kulumuka mu kiphenza katé ku Ngaza. (Ikokʼ iii-phe athu kʼ avulu ala ku i bhita).

²⁷ Muene u di iudika, anga u katuka mu kuenda. Kuenioko u sanga-phe muthu, mukua Etiiopia, Ngolambole ia Kandase, sobha ia Etiiopia ia muhatu, ua tambula konda ia jimbongo jê joso. Muenʼiú uendele mu Jeluzaleme mu kubheza Nzambi; O kiki uala mu kualuka kʼoxi iê.

²⁸ Muene ua xikama mu dikalu diê, iú uala mu tanga mu divulu dia polofeta Izaia.

²⁹ Nzumbi Ikôla anga u ambela Felipe uixi: Bhixila, u kuate dikalu ʼidi.

³⁰ Felipe anga u lengela ku dikalu, hé u mu ivua uala mu tanga mu divulu dia polofeta Izaia. Anga Felipe u mu ambela, uixi: Eie ki uala kutanga kia ku jimbulukila?

³¹ Kuala muène: Ki ngala kutanga ki ngi jimbulukila kiebhi, sé muthu ku ngi lomboluela-kiu? Anga u dionda Felipe a bande, a xikame-nê mu dikalu.

³² O kibatu kia maka mu Mikanda ia Ngana muala kutanga Ngolambole, kiambe kiki: Muène a mu sunga kala mbudi i ambatela kuia bhu dijibhilu, ua di xibha mukuâ ni monʼa mbudi ku ió a mu bhuta o kindemba kiê. Mu kienʼiki, uedi ni muène hudi, ka jikula ngó dikanu diê.

³³ A mu sebulula mu kufunda, o kulunga a mukatula-ku; kana-ku muthu hadia ua kà tena kutanga o muiji uê, mukonda muenhu uê mu ngongo a u katula-mu.

³⁴ Ngolambole anga u kumbulula, uixi: Nga ku diondo, ngi tangele hanji kima kimoxi: O polofeta bhabha, ua tange nanhi? Ua di tange muène, inga ua tange nanhi? Ua di tange muène, inga ua tange muthu uengi?

³⁵ Mu ku mu lomboluela Felipe anga u kuata kuzuela, u andekela ku makʼ ama mʼosoneke mu Mikanda ia Ngana, anga u mu tudila o Njimbu Iambote ia Jezú.

³⁶ O ki aia ni kuenda mu njila, a sanga kididi bhuala menha. Ngolambole, uixi: Talesa, menha iá! Ohi ki fudisa o ku ngi batizala? [

³⁷ Felipe, uixi: Se ua xikana ni muẋima uê uoso, ki bhuala ki fudisa. Muène u vutula, uixi: Xi! Eme nga xikana kuma Jezú Kristu, muene Monʼa Nzambi.]

³⁸ Ngolambole anga u tuma o dikalu kuimana; ene a kulumuka mu menha, ni Felipe ni Ngolambole. Felipe anga u mu batizala bheniobho.

³⁹ O ki a kala mu zauka mu menha, Nzumbi ia Ngana u katula-ku Felipe anga uia-nê. Ngolambole ka mu mono dingi mesu, maji uia ni kuenda njila iê ni kusanguluka.

⁴⁰ Felipe-phe u tukulukila ku Azoto, anga u bhita ku jimbonge joso ni kuboka o Njimbu Iambote, katé kia bhixila ku Sezaleia.