Jipoxolo 16 - O Mikanda Ikola

O njila ia Phaulu ia kaiadi, ni Sila, kulonga maka mu Jixi

¹ Phaulu anga u bhixila ue ku Derbe ni ku Listra. Kuenioko anga a sanga-ku xibulu imoxi dijina diê Timote. Muenʼ iú mamʼ â Judé, ua xikana kiá, maji o tatʼ â Ngeleku.

² Muene a mu tumbula kiambote kuala o jiphange joso jala mu Listra ni mu Ikônio.

³ Phaulu anga u mu inda kuianê mu kuenda. Anga u tuma ku mu saia mukonda dia Jijudé ja tungu mu jimbanduʼ ojo, kuma ene oso a mu ijiia kuila tatʼâ Ngeleku.

⁴ O ki enda ni kubhita ku madiembu, a a thelekala o ijila, ia a tendelela o Jipoxolo ni Adiakime mu Jeluzaleme, phala a i kuate.

⁵ Kienʼiki jingeleja a ji kuatesa nguzu mu kuxikana kuâ, anga jenda ni kuvula dingi izuua ioso.

Mu Tolôua. O kisukila kia Phaulu

⁶ Ene anga a bhita mʼ oxi ia Filija, ni mu Ngalata, Nzumbi Ikôla anga u a kidika kulonga maka mu Ázia.

⁷ O kia bhixila bhu mbambe ia Mixa, a teza kubokona mu Bitinha, maji o Nzumbi ia Jezú-phe ka ehela.

⁸ Anga a somboka mu Mixa, hé a kulumuka ku ditabhu dia Tolouade.

⁹ Phaulu anga u mona kisuma muʼsuku uenʼió. Ua mono kua mu tukulukila diiala mukua Masedonha, uemana ni ku mu dionda, uixi: Zauka kunu ku Masedonha, u tu kuatekese etu!

¹⁰ Phaulu kia mono o kisumuʼ iki, tu sota kukatuka kindala mu kuia ku Masedonha, mukonda tua xinganeka kuma Nzambi ua tu ixana ku a bhana koko o Jingolokela Jambote.

Mu Felipo ku Masedonha. Lidia u xikana

¹¹ Mu Tolôua tua di longo mu naviiu, tuenda ni kitembu katé mu kikôlo kia Samotrasia. O mu kizuua kia kaiadi anga tu kuaka ku Neiapolo.

¹² Kutunda bhobho tu bhixila mu Felipo, mbonge ia dianga ku jimbandu ja Masedonha, o iene ue pelezidio, kolonia ia Roma. Mu mbongeʼumu anga tu nanga-mu izuua.

¹³ Kizuua kia Sabhalu, tuia ku kanga dia kimbaka, bhu mbanduʼ a honga, tua fika kuila bhuala kididi bhene kubhongolokela o Jijudé mu kusamba. Anga tu xikama, hé tu ta maka ni ahatu a bhongoloka bhenhobho.

¹⁴ Ku ahatu a mu kuivua, anga bhu kala muhatu, dijina diê Lidia. Muenʼiú ngenji, mukua kufuna purpura ia kuteka, o ku bhata diê ku Tiiatila, mubhezi a Nzambi; muene anga u tu ivua. Muenʼiú Ngana ua mu jikula o muẋima mu kutambulula o maka ma tange Phaulu.

¹⁵ O kia mu batizala ni akua-mbele iê, u tu dionda, uixi: Se mua ngi mono ni ufiiele kua Ngana, zenu mu kale mʼ onzo iami. Anga u tu jijila kukala mʼ onzo iê.

Phaulu ni Sila mu ʼaleia ia Felipo. Kasalelu u xikana

¹⁶ Mu kukala kuenioko, kizuua kimoxi ki tu kala mu kuia ku kididi kia kusambela, tu takana ni kahatu uala ni kithûtha kia kuzambula. Muenʼiú mukua kunganhalesa jingana jê kitadi kiavulu mu kuzambula kuê.

¹⁷ Anga u kaiela Phaulu ni etu, ni kudikola, uixi: Mala iá jiselevende ja Nzambi u kôla. Ene a tu tangela o njila ia kubhuluka.

¹⁸ Munzangala muenʼiú anga u ki bhanga izuua iavulu. Phaulu-phe kuma kia mu iibhila kiavulu, ua mu alulukila, hé uambela o dimonho, uixi: Nga ku tumu, mu dijina dia Jezú Kristu, kutunda mu mukutu uê. Anga di tunda kithangana kieniokio.

¹⁹ Jingana jê-phe, kia mono kuma o nganhu iâ ia dielela ia di boto, a kuata Phaulu ni Sila, aia ni ku a sunga-sunga katé bhu kitanda, bhu pholo ia afundixi.

²⁰ Kia tula-nâ ku jixefe, exi: Mala iá Jijudé, a tatesa kiavulu o mbonge ietu.

²¹ A tubhula ifua iengi ia bhingi mu Kitumu kietu etu a tu kidika-iu ku i tambulula, mba ku i kuata, kuma tuala tu akua Loma.

²² Bhenhobho o mundu uoso anga a a salumukina. O jixefe anga ji tuma kutandula izuatu ia Phaulu ni Sila, ni ku a bha jixikote.

²³ Kia zubha ku a bha mixinga iavulu, a a ta mu ʼaleia, o kasalelu a mu tendelela ku a kuika kiakolo.

²⁴ O Kasalelu kia mu bhana orde uila iii, u a jikila mu kaleia kasuku moxi, o inama iâ ua i kolesa mu itutu.

²⁵ Mu kaxi ka usuku-phe, Phaulu ni Sila a kala mu kusamba ni kuimbila Nzambi, o jipelezu ni akuâ ji kala mu kuividila.

²⁶ Anga a tukumuka kinuminu kia mavu kia dikota, o inzu ia kaleia anga i tunguta katé ku madisesa. Kithanganʼ okio o mabhitu moso ma jikuka, o jipelezu joso ji jituka ku malubhambu.

²⁷ Kasalelu-phe kia phaphumuka ku kilu, u mona mabhitu moso ma jikuka, muene ua fomona o xibhata iê, hé u sota ku di jibha, kuma ua fika jipelezu joso ja lenge jiʼ ja mu xiê.

²⁸ Phaulu-phe ua mu handekela, uixi: Ku di bhange kiokio! Etu oso etuʼ etʼú!

²⁹ Kasalelu anga u ixana kuila eze ni jikandeia, hé u bokona lusolo, ua bhuuama ni uôma, anga u di bhala bhu pholo ia Phaulu ni Sila.

³⁰ Anga kiiadi kiâ u a bheka ku kanga, uixi: Enu jingana, eme ngi bhanga kiebhi mu kubhuluka?

³¹ Kuala ene: Xikana Ngana Jezú, nda u bhuluke, ni eie ni mbèle ié.

³² Anga a mu tangela Maka ma Ngana, ni muene ni oso ala mʼ onzo iê.

³³ Kasalelu anga u a katula ola ienioio ia usuku, hé u tumba iẋenge iâ. Anga a mu batizala ni akua mbèle iê ioso kithangana kieniokio.

³⁴ Anga u bheka Phaulu ni Sila mʼ onzo iê, u a zalela meza, hé u sanguluka kiavulu ni dibhata diê dioso, kuma a xikana Nzambi.

³⁵ Ki kuakie mu kimene, jixefe a tuma jisalajendu, exi: Malʼó a ehienu.

³⁶ Kasalelu anga u ki jimbuila Phaulu, uixi: Jixefe ja tumu ku mi eha. Ndokuenu mu suluke ni paze.

³⁷ Phaulu-phe ua ambela, uixi: Etu ki tu te kituxi kia kima, maji ene a tu bhesa jixikote bhu pholo ia mundu, né ngó ku tu fundisa, etu tu akua Loma, iá a tu jikila mu ʼaleia! O kiki andala a tu kaia, mu kuomboloka? Kiokio kana! Ki tu xikina. Inda ene eze a tu tundise.

³⁸ Jisalajendu anga a vutuila jixefe kioso kia zuela. Ene anga a kala ni uôma, ki evu kuma o Phaulu ni Sila akua Loma.

³⁹ Anga eza, a a dionda, hé a a katula mu ʼaleia. O kia zubha ku a katula-mu, a a bhinga kutunda mu mbonge.

⁴⁰ Phaulu ni Sila anga a xa kaleia, a bokona mʼonzo ia Lidia. O kia zubha ku di mona ni jiphange, ni ku a longesa, a katuka.