Jipoxolo 15 - O Mikanda Ikola

O jiphata ja kijila kia Mozé ji bhekela maka mu Jeluzaleme. Mukanda ua jipoxolo

¹ Ku kala athu ku Judeia a kulumuka kuenioko, ku Andiioka, hé a kala mu longa jiphange, exi: Se mu kamba ku mi saia, uila kia-xi Mozé o kijila, mu Kitumu, ki mu tena kubhuluka.

² Anga ki bhekela Phaulu ni Barnabé kukuata jiphata ni mala enʼió, hé ku kala kufunda kuavulu. Bhenhobho, o jiphange anga a sola Phaulu ni Barnabé, ni akuâ dingi, phala a bande ku Jeluzaleme ku Jipoxolo ni adiakime, phala a tetulule o makʼ ama.

³ Ene-phe kia a xinjikila kuala o Ngeleja ia Andiioka, a bhita mu Fenixa, ni mu Samádia, ni kukunda kioso kia biluka o matumbu, kua Nzambi, anga ki bhekela jiphange kusanguluka kiavulu.

⁴ O kia zubha kutula mu Jeluzaleme, a a tambulula kuala o Ngeleja, ni Jipoxolo, ni adiakime. Ene anga a a kunda ima ioso ia bhange Nzambi mua ene.

⁵ Kieniokio-phe, kuimana athu amoxi, akua kisoko kia jifalizeu, a xikana kiá, exi: Athu oso ki Jijudé, kikale tu a saiesa, ni tu a tendelela kukuata o Kitumu kia Mozé.

⁶ Bhenhobho o Jipoxolo ni adiakime anga a di bhongolola mu kutetulula o makʼ ama.

⁷ Kia bhiti kufunda kuavulu, Phetele uemana anga ua ambela, uixi: Enu akuetu mu jiphange, mua kʼ ijiia kuma izuua kiá tunde kia ngi solele Nzambi eme mudienu, phala o matumbu a diange kuivua ku dikanu diami o Maka Mambote, nʼa xikane.

⁸ O Nzambi uejiia o muẋima ua ene-oso, mu ku a bhana o Nzumbi Ikôla, kiene kimoxi ni kia tu bhana etu, uedikiza kuila u xikina ue katé ni ió ka tokala mu muiji ua Jijudé.

⁹ Kuma Muène ka tu di kaielesa ni etu ni ene, maji ua zelesa ue miẋima iâ mu kuxikana.

¹⁰ Kiki-phe mu bhumina-hi Nzambi, mu zuika jixibulu ja mu diela-ke, jungu mu xingu, ia bhingi etu-ene ni jitata jetu tua lembua ku i ambata?

¹¹ Kana, ngana! Mbata tua xikana-phe kuma etu tu bhulukila mu kiadi kia Ngana Jezu; ene uâ kiene.

¹² Kieniokio Mundu uoso anga a dixibha, evidila Barnabé ni Phaulu a mu jimbulula o isumua ni madiuanau ia kalakala Nzambi ni ene mu ʼaxaxe ka matumbu.

¹³ O kia tula o mahezu, Tiiaku u kumbulula uixi: Enu akuetu, ivenu kunu:

¹⁴ Ximá ua mi jimbuila kioso kia diangele Nzambi kuzungila matumbu, o mu kaxi kâ iú ua solo kukatula-mu o mundu uê uangene mu dijina diê.

¹⁵ O maka ma jipolofeta ue mu ima iii ma lungu-mu, kia soneka exi:

¹⁶ Ngana uixi, hinu ki bhua o izuuʼ oio ngi vutukila-ku ngi soma dingi o balaka ia Davidi ia budika; ngi tunga dingi kibhela kiê, ngi i sokejeka, hé ngi imika dingi.

¹⁷ Phala athu a kamukuâ a sote Ngana, ni matumbu oso a exana mu dijina diami,

¹⁸ eme ngi Ngana, nga tumu kuijidisa imʼ iii tunde mʼ okulu.

¹⁹ Uila kiki, eme nga batula kuma: Etu ki tu kale mu tatesa oso ku matumbu a biluka kua Nzambi.

²⁰ Inda tu a sonekena ngó mukanda kuila, kadie jinge kúdia kua kasana, o kúdia xitu iojibhe anga a i satela itèka. Tu a tangela ue kuila, a lenge undumbu, ni kúdia xitu ia kiama kiokhuenhe, mba ue kúdia manhinga.

²¹ Kuma o Kitumu kia Mozé tunde ʼxahulu sai mu mbonge joso akua kutanga ulongelu uê mu malombe, jisábhalu joso.

O mukanda ua Jipoxolo phala oso ki Jijudé

²² Kieniókio Jipoxolo ni adiakime ni Ngeleja ioso, a ki mono kiauabha kusola athu mu dianda diâ, ni ku a tuma ku Andiioka kumoxi ni Phaulu ni Barnabé. Anga a nona Juda a mu ixana Barsaba, ni Sila, athu ala ku pholo mu jiphange ja Ngeleja, ene ue ku a xila kuala oso.

²³ Anga a a sonekena mukanda ua kuila kiki: Ni etu tu Jipoxolo, ni Adiakime, jiphange, tua tumu kumenekena o jiphange ja akua ʼxi mu Andiioka, ni mu jimbandu joso ja Sídia, ni mu Silixa.

²⁴ Mukonda tua kʼ ivu kuma athu a tundu mu dietu a mi tatesa o miẋima ni jiphata mu ioso ia mi tangela, sumbala etu ki tua a tumu phala kuia mu kubhanga kieniókio.

²⁵ Kienʼiki kunu etu oso tua tetuluka, mukonda tua ki mono kia uabha kusola athu, ni ku a tuma ko kuenu. Ene a muia kumoxi ni Barnabé ni Phaulu.

²⁶ Akuetu enʼiá a bhiti mu iluezu ia kubhulaka ku a jibha mukonda dia dijina dia Ngana ietu Jezú Kristu.

²⁷ Tua katula-phe Juda ni Sila, ene ue ki tua mu sonekʼ iki, a ka mi kunda-kiu ni lekalu ia dikanu.

²⁸ Kuma ni Nzumbi Ikôla ua ki mono kiauabha, ni etu-ene, kuila kana ku mi xina kimbamba kia dikota, kikale ngó o ima ia kate-ku, ieniʼii:

²⁹ Kana kudia xitu ia iama iojibhe phala ku i satela iteka. Kana kudia manhinga moso-moso, mba xitu ia kiama kiokuenhe. Ki mu bhange ue undumbu. Ima ieniʼii se enu muenda ni ku i lenga, mua bhange kiambote Tua mi menekena! Mahezu.

³⁰ Kieniokio ene, kia zubha ku a sulula kiki, a kulumuka ku Andiioka. O kia bhongoloka o mundu, a thelekala o mukanda.

³¹ Ene kia zubha ku u tanga, a sanguluka kiavulu, mukonda dia maka ala-mu, a bhekela kusiuna dingi.

³² Ni Juda ni Sila, kuma ala jipolofeta, a longesa jiphange ni maka mavulu, a a kolesa miẋima ni ku a bhana dingi huiii.

³³ O kia zubha kubhanga-bhu thembu, a a sulula ni uembu kuala o jiphange, hé a vutukila ku ió oso a a katuile. [

³⁴ Sila-phe u sola kuxala hanji bhenhobho.]

³⁵ Phaulu-phe ni Barnabé, ni akuâ avulu aia-nê, a xala mu Andiioka ni kulonga, ni kubhana Jingolokela ja Ngana.

Phaulu ni Barnabé a di muangununa

³⁶ Kia bhiti izuua, Phaulu uambela Barnabé, uixi: Tuie dingi ku hindula o jiphange mu madiembu muoso mu tua bhitile ni kulonga o maka ma Ngana, tu di mone-nâ, mbé tu mone kioso ki ala kubhita.

³⁷ Barnabé anga u inda ambate-nâ Nzuá, a mu ixana Marku.

³⁸ Maji o Phaulu-phe ki kia mu uabhela kuambata muthu ua a xile kiá mu njila. Kuma muene ua vutukila mu Pamfidia, kele-nâ njila ioso ku sedivisu ia ukunji katé ku dizubhilu.

³⁹ Kienʼiki anga ki bheka iẋanju, ene hé a zoka, katé a di batuka. Barnabé uambata Marku, u zauka mu naviiu katé mu kikôlo kia Xipele.

⁴⁰ Phaulu-phe u sola Sila, hé u katuka, kia mu sulula o jiphange ni ku mu bhakula mu kiadi kia Ngana.

⁴¹ Phaulu anga u bhita mu, Sidia ni mu Silisia ni kukolesa o miẋima ia akua jingeleja.