Jipoxolo 14 - O Mikanda Ikola

Jipoxolo a longa mu Ikônio ni mu jimbonge jamukuâ

¹ Anga kibhita dingi mu Ikônio, kala ki kia bhiti kua tundu. Kuma a bokona kiiadi kiâ mu dilombe dia Jijudé, o mu kutanga kuâ anga a bhangesa mundu uavulu ua Jijudé ni Jingeleku kuxikana.

² Maji o Jijudé-phe, joso ja xibhaka, a vunza o miẋima ia akua ʼxi, anga jiphange a ji zembesa.

³ Kienʼiki Jipoxolo anga a bhanga thembu iavulu mu Ikônio mueniomo. Ene a bhua uôma ni kutanga o maka ma Ngana. Muène Ngana anga u kala mbangi ia maka ma kiadi kiê, kuma o jipoxolo ua a bhesa o kubhanga isuma ni madiuanu ni maku mâ.

⁴ O mu mbonge o mundu ua akua bhata anga u muangunuka. Ia a di bande ku Jijudé, ia a di bande ku jipoxolo.

⁵ Jijudé-phe, ni Jingeleku, ni afundixiʼ â, hè a ta kikutu kia kusuina, ni kububa o jipoxolo ni matadi.

⁶ O Phaulu ni Barnabé hé a kʼ ivua, anga a lengela ku jimbonge ja Likaonia ku Listra, ni ku Derbe, ni ku madiembu mu jimbandu joso.

⁷ Anga a longa o Maka Mambote kuenioko.

Mu Listra, akua ʼxi a mesena ku a satela

⁸ Ku Listra anga ku kala muthu ua xikama jinga mu nzunga, kuma ua nemana inama. Muene uala huhiʼ a lenge tunde mu divumu dia mamʼ â, nuka a tena kuenda.

⁹ Muenʼ iú anga uivua Phaulu uala kuta maka. Phaulu kia mu edi sûi, ua mu mono kuma uala ni kuxikana kua kuiluka.

¹⁰ Hé u mu ambela ni dizui diasuina, uixi: Balumuka! Imana nzanza! Muene anga u tuka, uimana, hé u mateka kuenda.

¹¹ O mundu kia mono kia bhange Phaulu, anga a kola, mu mbimbi ia Likaonia, exi: Jinzambi ja tu tukulukila mu idifanganu ia athu!

¹² Barnabé anga a mu luka Nganga-Nzumba, o Phaulu, exi Kalongolo, mukonda muene kota mu kuzuela.

¹³ Nganga ia Nganga-Nzumba, uavu o tembulu iê ialulama mu mbonge iâ, u bheka jingombe ni misékeia ku mabhitu ma kimbaka, u mesena u a Satela, ni mundu kumoxi.

¹⁴ Jipoxolo-phe, Barnabé ni Phaulu, kia kʼ ivu, a tandula izuatu iâ, a lengela mu kaxi ka mundu ni kudikola, exi:

¹⁵ Enu jingana! Mu bhangela-hi kiki? Etu uetu tuala tu athu ni akuenu, o jihânji jene jimoxi! Tua mi bhana-phe o Jingolokela Jambote kuila mu-xa imʼ iii ia makutu, mu lunge kua Nzambi ia muenhu, ua tena kubhanga o diulu ni oxi, ni musanza ua kalunga, ni ima ioso iala-mu.

¹⁶ Nzambi muène mʼ okulu uehela akua-jixi joso kuenda kioso kia a tumu o miẋima iâ.

¹⁷ Maji mu thembu joso Nzambi ka kambele-phe ku dʼ idikiza kioso Muène kiene, mu mbote iê iene mu kubhanga. Kuma Muène mukua kubhindumuna, ua bhana jinga mvula ku diulu, ni idima kuvula bhu thembu ja tokala, phala mu kale ni kúdia, o muẋima uenu uizale ni kusanguluka.

¹⁸ Sumbala-phe kiene, mu ku a tela o maka kiki, kua kambele ngó keju tena kufudisa o mundu ku a satela.

¹⁹ Kueniuku-phe ue kueza Jijudé ji tunda ku Andiioka ni ku Ikônio. Anga a bhomba mundu, hé a bûba Phaulu ni matadi, a mu koka katé ku mukau, kuma a fika uafu.

²⁰ Maji kioso-phe kia mu imanena o jixibulu, a mu te bhu kaxi, muene u balumuka, hé u bokona dingi mu mbonge. O ki kuakie ni kimene, Phaulu anga u katuka ni Barnabé, aia ku Derbe.

A vutuka ku Andiioka ia Sidia

²¹ O kia zubha kulonga o Maka Mambote mu mbongeʼ omo, ni kubhanga jixibulu javulu, a vutukila ku Listra, ni ku Ikônio, ni ku Andiioka dia Pizidia.

²² Ene anga a kala mu kukolesa o miẋima ia jixibulu ni ku a longesa kujijila o kuxikana. A kala ue mu longa kuma tu bhinga tu bokona mu Utuminu ua Diulu mu kubhita ni malebhu mavulu.

²³ O kia zubha kunomiiala adiakime a kala ku pholo mu Ngeleja joso, ni kusamba, ni kujila, a a xalesa ni Ngana, uoso a mu xikana.

²⁴ Bhenhobho Phaulu ni Barnabé anga a tandulula, a bhita mu Pizidia, hé a bhixila mu Pamfidia.

²⁵ O kia zubha kutanga Maka mu Peleje, a kulumuka ku tabhju dia Atalia.

²⁶ Koko anga a di longa, hé a zauka musanza katé ku Andiioka ia Sidia, kua a suluile mu kiadi kia Nzambi, ku sedivisu ia zubha kia kukumbidila.

²⁷ O kia zubha kutula ni kubhongolola o Ngeleja, a a kunda ima ioso ia bhange Nzambi ni ene. A a kunda ue kioso Nzambi o njila ia kuxikana, kia i jikuila o matumbu.

²⁸ Anga a bhanga izuua muene mu kuinduluka ni jiphange bhenhobho.