Jihebeleu 9 - O Mikanda Ikola

O ubhezelu ua kidi

¹ Katé ni kikutu kia dianga mʼukulu kia kexile ni ijila ia ubhezelu, anga ki kala ue ni kididi kiê kià ngene kia kubhezela.

² Ku mbandu ia kanga ku kala balaka i exana Kididi-Kikôla. Mueniomo mua kexi b kandeia, ni meza, ni jimbolo jʼobhakuile Nzambi.

³ O kuema dia kibatulu kia kaiadi, balakʼoio a ixana mu Kididi-Kikôla-Kinéne.

⁴ Muene mua kexi o kalatodio ka ulu, ka fumasa ia dizumba, ni álaka ia kikutu, iene ioso iofolale ulu, o moxi dia álaka mua kexile ni imbia mua bhake o maná, ni mbangala ia Alá ia buingitile mafe, ni matadi ma iadi ma basakasa, kuosoneke o ijila.

⁵ O ku thandu dia álaka kua kexi jikelubini jibenha jʼedikiza o Kizunda kia Nzambi, joleka o mabhabha mù vungina o kididi kia kulolokela o ituxi. Ima ioso iii-phe ku i lombolola kindalʼiki mu kimoxi-kimoxi, ki tu tena.

⁶ Kia zubha-phe kuiudika imʼiii, o jinganga ji kala mu kubokona jinga mu balaka ia suku ku kanga, mu ku kumbidila o sedivisu ia kubheza.

⁷ Mu balaka ia mukuá-phe kikale o nganga ia dikota ubheka uê u bokona-mu lumoxi ngó ku muvu. Uambata ue manhinga ma ibhaku ma kubhakuila Nzambi mukonda diê muène, ni mukonda ue dia itondalu ia mundu, ia bhange sé ku kʼijiia.

⁸ Mu ku bhanga kiki, o Nzumbi Ikôla ua tu longo ni kutetuluka kuoso kuma o njila ia kubokona mu Kididi-Kikôla-Kinéne kiluua i jikuka, kioso o balaka ia kangʼoio hanji ialé kieniokio.

⁹ O kiene a ki bhangela kijimbuete phala mu izuua ia lelu. Kia jimbulula kuma o maujitu, ni jisata ja ibhaku ia bhakula kua Nzambi, ki i soko kuila o muthu ueza mu kubheza i mu zubhisa kutenena mu muẋima uê.

¹⁰ Iene ioso íii ia tange ngó makudia, ni makunua, ni nzungule ia jifesa ja ku di zelesa. Ilekelelu ia xitu i sedivila ngó kathangana katé Nzambi kia kà bhangulula o ima ioso.

¹¹ Maji-phe Kristu ueza kuma Nganga ia Dikota ia ima iambote ieza-ku. O balaka mua mu kalakela, ia beta kota, ia beta kutenena, ki iokalakale ku maku ma athu, ki ia ubhangelu ua mu ngongʼ umu.

¹² Kioso-phe Kristu ki eza, ua bokona ngó lumoxi kuabhu, mu Kididi-Kikôla-Kinéne, muène kambatele manhinga ma jihombo, mba ma anʼ a jingombe phala kubhakula kala sata. Maji ua bhana o manhinga mê muène, iú ua zubha o ku tu kula, ki kua bhingi dingi ku ki tona.

¹³ O manhinga ma jihombo ni jingombe, ni uthokua ua vitela ia ngombe, a u sangela ku thandu dia athu a xidi mu kukumbidila o kijila, phala ku a zelesa o mukutu ku kanga.

¹⁴ Se phe kienʼ iki kiene, xinganekenu hanji kioso kia soko ukota uê, mba o kutena kua manhinga ma Kristu! Kuma ku Nzumbi iê ia kaiela-ku, ua di bhakula muène-muène kala sata ia tenena kua Nzambi. O manhinga mê ma tu iẋika-phe o itongoluelu ietu, ku ibhangelu ia di fuila, phala tu tene kubhiẋila Nzambi ia muenhu.

¹⁵ Kienʼ iki-phe, Kristu kiene kia mu bhekela kukala mutesi a kikutu kiobhe, phala oso ngó a exana kuala Nzambi a tene kutambula o mabesá ma nangenena ma polomesa iê. Kuma sai kalunga ka bhitile-bhu phala kutena kukula o athu ku ituxi iâ ia tele mu thembu ia kikutu kia diangele-ku.

¹⁶ Kuma bhu a ta o kikutu, ki bhinga ió uoso ua te kikutu, u londekesa kuila o muthu ió ua ki bhange uafu kiá.

¹⁷ Mukonda o kikutu ki ki kala ni valolo ia kima, se o ua te kikutu uala ku muenhu. Kiene ki kala ngó ni valolo, kioso kila o muthu ua te o kikutu uafu kiá.

¹⁸ Uila kiki, katé, ni kikutu kia dianga, kia mateka ngó kioso kia bhitisa-bhu o manhinga ma ibhaku.

¹⁹ Kima kia dianga, Mozé ua tangelele o mundu o ijila ioso kala kia tumu o Kitumu. Hé u katula o manhinga ma anʼ a jingombe ni jihombo, kumoxi ni menha ni kindemba kia mbudi kia kusuka, ni kisasa kia hisopo, anga u sangela ku thandu a Divulu dia Kitumu, ni ku thandu dia mundu uoso.

²⁰ Uixi: Ene o manhinga ma te kidimbu ku kikutu kia tumu Nzambi phala enu ku ki tumuka.

²¹ Kiene ue Mozé kia sangela o manhinga ku thandu dia balaka, ni ku thandu dia ingolongondo ioso ia sedivisu mu kubheza.

²² Mu kidi, kala kia tumu o Kitumu, kifua ima ioso muène ia bhingi ku i bonza ni manhinga. Mukonda sé kulundulula manhinga, ki ku kala muloloko ua ituxi.

O sata ia Kristu, i katula ituxi

²³ O ima iii-phe, kuma ifikisu ia ima ia kidi ku diulu, a i zelesa ue kienʼ iki. Maji o ima muène ia diulu, ia bhingi jisata ja beta ujitu.

²⁴ Kuma Kristu ka bokona mu Kididi-Kikôla kiokalakale ku maku ma athu, ki fikisa ngó mu kidi o Kididi-Kikôla. Maji ua bokona muene ku kidi mu diulu, iú ua tu imanena kindala bhu pholo ia Nzambi mu ku tu diondela.

²⁵ O Nganga ia Dikota ku jijudé, uene kubokona muvu ni muvu mu Kididi-Kikôla ni manhinga ma kibhaku. Maji-phe Kristu ka bokona phala ku di sata luavulu, kana.

²⁶ Hé kiene, hinu ueji ku tona jinga luavulu o kutala hadi tundé ku dimatekenu dia ʼxi. Maji inda o muène ua tukuluka lumoxi-elêle kunu kua suku o jithembu, phala kukatula o ituxi ni sata ia mukutu uê muène.

²⁷ Kala ue o athu kia a xindi kufua ngó lumoxi, o kia zubha o kufua, hé ku kala o ku a fundisa kuala Nzambi.

²⁸ Kiene ue, Kristu kia di lumba lumoxʼ iki kala sata, mu kukatula o ituxi ia mundu. Hádia ua kà tukuluka lua kaiadi, kana dingi mu kufuila ituxi, maji phala kubhulula ió oso ala ku mu kinga muène.