Jihebeleu 8 - O Mikanda Ikola

Jezú, muène Nganga ietu ia Dikota

¹ Kiki-phe, o ima i tua kuata kuzuela, o diba diê dia kate-ku dienʼidi: Tuala ni Nganga ia Dikota iú, ua xikama ku madilu bhu kiandu kia Ungana-ua-diulu, kia Nzambi-Muteni-a-Ioso.

² Mukua kubhanga sedivisu ia nganga ia Dikota mu Kididi Kikôla mu balaka ia kidi ia tungu Ngana, kana ku athu.

³ Kuma Nganga ioso ia Dikota a mu xindi o kubhana maujitu ni jisata ja iama. Kiene ue Nganga ietu ia Dikota ua bhingi u kala ue ni kima kia kubhakula.

⁴ Se ua kexile hanji mu ngongo keju kala dingi nganga, mbata sai jinganga jene kubhana o maujitu kala kia tumu o Kitumu kia Jijudé.

⁵ O sedivisu iene mú bhanga o jinganga jiji iala ngó idifua, mba ilembeketa ia ima iene mu diulu. Kiene Nzambi ki ambela Mozé. Kioso muène kia kala mu kuiudika o balaka Nzambi u mu dimuna, uixi: Talesa, ima ioso ki u i bhanga, o ulungu uê (o kidifuanganu kiê) u kala kala u nga kuidikisa ku mulundu.

⁶ Maji mu kidi kiene Ngana Jezú ua tambula sedivisu ia beta kota ku ujitu o ia jinganga ndenge. O kikutu kiate bhu kaxi ka Nzambi ni athu, kiala ue kota, mukonda a ki tesa ni jipolomesa ja makota, ja uabha.

⁷ Kuma se o kikutu kia diangele-ku kia kambele kuseluka, hinu kejú sota dingi kubheka-ku kikutu kia mukuâ.

⁸ Maji Nzambi ua sange ibhengele muʼaxaxe ka mundu uê, iú ua a bazela, uixi: Hinu kuanda kukala izuua—eme ngi Ngana, nga kà ta kikutu kiobhe ni mundu ua Izalaiele, ni akua muiji ua Juda.

⁹ Ki kia kà kala uila o kikutu ki nga tele ni jitata jâ, kizuua ki nga a kuatele mu lukuaku, phala ku a katula mʼoxi ia Ijitu. Kuma ene ka nangene-mu mu kikutu kiami, eme uami ki nga a suuile—eme ngi Ngana.

¹⁰ O kikutu-phe hinu ki nga kà ta ni mundu ua Izalaiele, eme ngi Ngana, izuua ieniʼoio,—kia kà kala kiki: Nga kà ta o ijila iami mu thulu iâ, anga nga kà i soneka mu miẋima iâ. Eme nga kà kala ngi Nzambi iâ, ene a kà kala mundu uami.

¹¹ Kà kala dingi mu kuila muthu ulonga mukua diembu diê, mba u longesa pange iê, a tungu-nê, uixi: Ejiia Ngana. Kuma ene oso a kà ngʼijiia, tunde ku ndenge katé ku dikota.

¹² Anga Eme nga kà loloka o ibhengele iâ, o ituxi iâ ki ngà i lembalala dingi.

¹³ O Nzambi kia zuelʼiki kuila kikutu kiobhe, o kikutu kia dianga ua ki mono kiokulu kiá. O kimbamba-phe kiokulu, kiala kiá mu kukuka, kindala kianda kujimuka athu ku mesu.