Jihebeleu 7 - O Mikanda Ikola

Unganga ua Melekizedeke ua di fangana ni ua Jezú

¹ O Melekizedeke muenʼiú, ua kexi sobha ia mbanza ia Saleme, nganga ia Nzambi ua suka ku ukota. U takana ni Mbalahamu kioso kia kexi kuvutuka ku ita ia jisobha, Melekizedeke anga u mu bhana dibesá.

² Mbalahamu anga u mu bhakuila o mbandu ia kakuinhi ka ima ioso ia tambula ku jinguma mu ita. O dijina dia Melekizedeke dia lombolola luiadi: Moxi, Sobha ia Kuiuka. Mukonda-phe muène ua kexi Sobha ia Saleme, dijinʼidi dia lombolola ue dingi kuila Sobha ia Paze.

³ Ka moneka tata, ka moneka mama, Melekizedeke ka moneka Uvadiue mba ufuilu uê. O kia di fangana Monʼa Nzambʼiki, u kaiela-ku ku unganga, nuka a tunda-ku dingi.

⁴ Talenu kioso kia soko o ukota ua Melekizedeke. Katé ni kukululu Mbalahamu, ua mu bhana mbandu ia kakuinhi ku imbamba ia bhundu ku jinguma mu ita.

⁵ Kala ki ambe mu kitumu kia Mozé, o anʼa Levi, oso ala ku unganga, a a bhana kijila kia kutambula o madijimu ma ima ioso ku mundu kala kia tumu o ngonge. A ma tambula ku jiphange jâ, sumbala a tundu ue bhu nzemba ia Mbalahamu.

⁶ O Melekizedeke, ki mukua muiji ua Levi, maji ua tambula o mbandu ia kakuinhi kua Mbalahamu, ku imbamba ia bhundu mu ita, anga u mu bhana dibesá. Kiene muene, ua bhana Mbalahamu dibesá, sumbala muene ua tambuile o polomesa ia Nzambi.

⁷ Kana-bhu phata kuila uoso u bhana o dibesá ua beta o ukota, o a mu bhana o dibesá ndenge. Mu ku tanga o jinganga-phe, o mbandu ia kakuinhi a i tambula ku athu a kinga o kufua.

⁸ Maji mu ku tanga Melekizedeke, kala kiambe o Mikanda Ikôla, o dijimu dia mbandu ia kakuinhi a kexi ku di tambula ku muthu ua kolo o muenhu.

⁹ Kifua mu mukutu ua Mbalahamu, ni Levi ua futu ue o dijimu—ku luvualu luê lua kexi mù tambula o madijimu.

¹⁰ Mukonda Levi kala kiluua a mu vuala, kifua tuila ua kexi hanji mu malombo a kukuâ Mbalahamu, kioso muene kia takana ni Melekizedeke.

¹¹ Kuma o ngonge ia tambuile o mundu ua Izalaiele iejila mu unganga ua jilevita, akua muiji ua Alá. Maji-phe se o unganga ua akua Levi ua zubhile kutenena, hinu keju bhindamena dingi unganga uengi u di fangana mu kihindu kia Melekizedeke, o ua Alá kana.

¹² Kuma o unganga se a u lungulula, ki bhinga ni ngonge iene a i lungulula ue.

¹³ Mukonda o ngana Jezú muène a mu tange kuala o ima ioso íii, ua tokala ku muiji uengi. O koko kiluua ku tunda muthu u sedivila ku kala nganga bhu kalatodio.

¹⁴ Tua kʼijiia kuma Ngana Jezú ua tokala ku muiji ua Juda. O muiji iú-phe Mozé ka u tange kukala ni kima, kioso kia zuela bhu kaxi ni jinganga.

Nganga iengi, mukua ni Melekizedeke

¹⁵ Kiene kia di monkena dingi kiambote, kuila kua tukuluka nganga iengi ia di fangana ni Melekizedeke.

¹⁶ Muène ka mu bhangele nganga mu ngonge ia kihindu kia xitu. Maji ua di bhange nganga mu kutena kua muenhu ki uene mbambe.

¹⁷ Kuma o Mikanda Ikôla iambe: Eie uanda kukala u nganga i xalela-ku, mu kihindu kia unganga ua Melekizedeke.

¹⁸ Uila kiki, o kijila kia diangele-ku, a ki katula-ku, mukonda dia kuseluka kuê ni kukamba o kusedivila.

¹⁹ Kuma o Kitumu kia Mozé ki ki tenene kubhanga kima ki tenena. Kù kueza kudielela kuengi kua uabha, ku tu zukama na-ku kua Nzambi.

²⁰ Katu-ku kiki, sai ue muloko ua Nzambi. Enió a di bhangele jinganga, sé ku a bhitisa ku muloko uenʼiú.

²¹ Maji Ngana Jezú ua di bhange nganga kioso Nzambi kia mu ambela, uixi: O Ngana ua loka, ka tena kualuluka; eie uanda kukala u nganga i xalela-ku.

²² O kienʼiki kiene kia bhangesa Jezú kukala dilemba dia kikutu kiengi kia beta ujitu.

²³ Sai dingi kia di tungula: O jinganga jamukuâ ja vudile, anga aia ni ku di lendejela, mukonda akua kufua, ka tena ku nangenena.

²⁴ Maji-phe o Ngana Jezú kuma uenʼié ku muenhu katé ku hádia ni hádia, o unganga uê kene ku u lendela.

²⁵ Uila kiki, muène ua soko-bho kubhulula katé kia zubha, ene oso ejiia kua muène, ni a bhixile kua Nzambi. Kuma Jezú ua kalé kiá ku muenhu mu ku a diondela jinga.

²⁶ Mukonda dia kiki, Jezú muène o Nganga ia Dikota tua mu bhindamena. Muène u kôla. Muène ka moneka phulu, ka moneka ufusa. Ua di kalelela ku akua ituxi, iú ua zangalala ku thandu a maulu.

²⁷ Ka sokela ni jinganga ja makotʼojo. Ka bhingi kubhakula jisata izuua ioso, mu kusatela o ituxi iê-muène, ni ituxi ia mundu. Muène ua ki bhange ngó lumoxi, kuabhu, kia bhekele o sata ia mukutu uê muène.

²⁸ Mu kitumu kia Mozé a sola athu a kambe kutenena phala kukala Jinganga-ja-Makota. Maji kizuelu kia muloko ua Nzambi kia kaiela ku Kitumu kia Mozé, kia solo o Mona, muthu ua tenena ua zubha, katé ku hádia ni hádia.