Jihebeleu 6 - O Mikanda Ikola

¹ Uila kiki, tu di sungienu ku pholo, ku uadiakime, o maka ma Kristu ma ku di longa-ke ma xale ku dima. Etu ki tuanda kualukila kuta dingi disesa dia maka iâ: o kudiela ibhangelu ia di fuila ni ma kuxikana Nzambi;

² ni dia mabonzo ma jibatizu, ni dia kutula athu maku ku thandu; ni dia madifundu kufukunuka, ni dia kuêla ni kulunga kua hádia.

³ Tuienu ku pholo! Kiene ki tu bhanga Nzambi kia tu kuatekesa.

⁴ O ió a lueza o kuxikana a bhuluka-phe kiebhi lua mukuá? Kuma ene a kexile kiá mu mukengeji ua Nzambi. A lolele kiá o mbote ia diulu, a nomuene kiá kua Nzumbi Ikôla.

⁵ A lolele kiá o maka ma mbote ma Nzambi, ni jinguzu ja thembu ià keza-ku.

⁶ Maji o ku pholo ku eza kunu a lueza, o kuxikana a ku texi! Ki ki xikina ku a bheka dingi mu kudiela, kiosuʼiki kiala kuila o Monʼa Nzambi a mu tona ku mu ta ku dikulusu, a mu sebulula bhu pholo ia mundu.

⁷ Kuma o mavu mʼombama ni mvula iene ku noka jinga, se ma bana idima ia mbote i uabhela oso ene ku ma dima, ma tambula dibesá kua Nzambi.

⁸ O ki kala-phe ma bhana ngó minha ni holokoso, ma kuata usudi; kua kambe ngó a ma ta mazui kuala Nzambi, o hinu kua suka a ma ta mu tubhia.

⁹ Sumbala tua zuela kienʼiki, enu-phe akuetu ki iene ima i tua mi fika enu. Tua mi fika ni ima ia lungu ni kubhuluka.

¹⁰ Kuma Nzambi ki mukua kaxixi. Muene ka landuka uila sedivisu i mua bhange i mu jimba, mba o henda i mu edikisa o dijina dîê mu kubhindumuna jinga anʼê a ngene, ni kiki hanji enu mu bhindumuna o jikidistá.

¹¹ Tuinda enu oso mu idikiza muanu uenʼiú mu kutambula ioso i mua dielela katé mua zubha.

¹² Ki mu kale-phe ni usudi, inda mu fikisa ió oso a xikana, ni muanu uâ, phala mu tambule jipolomesa mu kuxikana Nzambi ni kinhenge.

O kudielela o polomesa ia Nzambi

¹³ Nzambi ua bhele polomesa kua Mbalahamu, iú ua mu lokela kuila u i kumbidila. Kuma kana-ku dingi ua mu tundu muène, a tena ku mu tumbula, Nzambi ua lokela mu dijina diê muène-muene.

¹⁴ Muène uixi: Mu kidi kiene, o kuzediua ngi ku zediuisa, o kusokolola, ngi ku sokolola.

¹⁵ O Mbalahamu kia kolokota ni kinhenge, o polomesa ia mu bhana Nzambi ua i tambula.

¹⁶ Kuma uoso u loka, u tumbula dijina dia ió ua mu tundu, bhuoso bhua di kuatesa makutu, o muloko uene u zubha o phata.

¹⁷ Uila kiki, Nzambi kia mesenene o ibhinganu ia polomesa iê u a zubha phata, kuila o kizuelu, kiê ki kiene dingi kulueza, ua bhitisa-bhu muloko. Mukonda dia kiki, ku thandu dia muloko, ua bhana o polomesa.

¹⁸ Phala bhu kale ima iiadi iakolo, ia bhingi Nzambi mu ku i tanga ka tena ku kala ni makutu, phala ku tu suinisa kiavulu o miẋima, etu oso tua lengela kua Muène, tueza, tua kuata o kudielela kueniʼuku kua tu bhana.

¹⁹ Kudielela kua kidi, ku kuatesa mienhu ietu mukua ni ombua ia naviiu. Kuene kua kuata, kua kolo, ku bhixila katé kuema dia kibatulu kia tembulu mu diulu, anga ku bhita katé moxi dia kididi kikôla.

²⁰ Kuenioko kuene kua tu tuamenena kubokona musonguedi uetu, Ngana Jezú. Muene iú ua di bhange Nganga ia Dikota i xalela-ku, mu kihindu kia ungana ua Melekizedeke.