Jihebeleu 5 - O Mikanda Ikola

¹ O Nganga ia Dikota, a mu sola mu ʼaxaxe ka athu, anga a mu xinda o kukaiela o mundu ku pholo mu ima ia tokala Nzambi. Muène u bhana o ilumbu, ni jisata mukonda dia ituxi.

² Kuma muène ue ua zuata dibhuilu, u tena kulendukila ió a tobho, ni oso a jimbidila, a di bhale mu kutondala.

³ Mukonda dia kiki, kiene kia bhingi kubhakula o jisata ja ituxi ia mundu, ni iê-muène-muène.

⁴ Kana muthu ue u di metena kusola o ujitu ua Unganga ua Dikota uenʼ iú. Kikale ngó uoso a mu ixana kuala Nzambi kukala Nganga ia Dikota, uila ki exanene Alá.

⁵ Kristu ue kiene, ki muène ua di zangeleka kukala Nganga ia Dikota. Maji Nzambi muène ua mu ambela, uixi: Eie u monʼami. Lelu muène nga ku vuala, nga di bhange ngi Tatʼenu.

⁶ Bhu kididi kiamukuá mu Mikanda Ikôla, muène u ambe uixi: Eie uanda kukala u nganga ia kà xalela-ku, ki di fuangana mu kihindu kia unganga ua Melekizedeke.

⁷ O muène kia kexile mu ngongo, u samba, u dionda, ni kudila masoxi, kua Nzambi u tena ku mu kudila mu kufua, anga a mu ivua, mukonda dia kudibha-kula kuê, ni kubatama.

⁸ Sumbala muène Mona, ua di longo kutumaka mu ima ia tale na-iu o hadi.

⁹ O kia zubha ku di longʼ iki, ua di bhange Kibhamuenhu u tena o kubhulula oso a mu tumaka, katé kia zubha.

¹⁰ O Nzambi ua mu solo kukala Nganga ia Dikota mu kihindu kia unganga ua Melekizedeke.

O kiluezu kia ku-xia o kuxikana

¹¹ Ku mbandu íii tuala ni maka mavulu ma kutanga, ma bhonzo o ku ma lombolola, mukonda dienu-enu mualù sota kuxiluka.

¹² Kuma thembu kiá katé bhu tuezʼa bha, mua fuamene ku kala kiá mu jimesene ja kulonga. Maji-phe hanji mua bhingi bhu kala muthu u mi longa dingi enʼuenu bhu matekena o mizambu ia Nzambi. O kudia kua nguzu ki mu ku tena, hanji mua bhindamena lete.

¹³ Kuma uoso u amua lete, hanji ala monʼa ndenge, kala luua ni kilunji kia kuijiia kioso kiaiuka, mba kiaiibha.

¹⁴ O kudia kua nguzu-phe kua tokala adiakime, mukonda dia ku di longa, a sungu kiá kilunji kia kutungula kioso kiauabha, mu kiki kiaiibha.