Jihebeleu 4 - O Mikanda Ikola

¹ Nzambi ua tu bhana polomesa kuila tu tena kubokona mu kunhoha ni muène. Tu kalienu-phe ni uôma, sumba mba kia xie o kizueluʼ iki kia kubokona mu dinhohenu diê, bhu kala muthu mudienu u ki tokoka.

² Kuma kia kidi kiene, etu a tu tudila o Jingolokela Jambote kala ene. Ene-phe ka bhandulukile kima mukonda o maka ki ma takana ni kuxikana mu miẋima ia oso a evile.

³ Uila kiki, etu oso tua xikana, tua bokona kiá ni Nzambi mu dinhohenu diê, kala kia ki tange muène, uixi: Anga ngi loka, kia ngi kuata o kutema, ngixi: Enʼ ió nuka a kà bokona mu dinhohenu diami! Muène uambe kienʼ iki, sumbala ikalakalu iê ua i zubha ukulu, tunde ku dimatekenu dia ʼxi.

⁴ Kuma sai ni bhuma bhua tange o kizuua kia kasambuadi, mu Mikanda Ikôla, uixi: Nzambi anga u nhoha kizuua kia kasambuadi, u zumbuka ku ikalakalu iê ioso.

⁵ O bhabha uixi dingi: Enʼ ió nuka a kà bokona mu dinhohenu diami.

⁶ O ió oso a diangele ku a tudila o Jingolokela Jambote, a tokoka kubokona ni Nzambi mu dinhohenu diê, mukonda dia kukamba kuxikana. Kala kiki, saiku amukuá anda kubokona ni Muène mu dinhohenu diê.

⁷ Mukonda dia kienʼ iki, Nzambi ua solo dingi kizuua, ki exana lelu. Muène ua zuela kiki, ku pholo kunu mua Davidi, ki kua bhiti kiá mivu iavulu, mu verso ia Mikanda Ikôla i tua tange: Lelu se mu ivua dizui diê, kana kukola muẋima.

⁸ O ki kala Josuué ua a bhele dinhohenu, Nzambi hinu keji ku di kumuna dingi ku pholo kunu, anga u tanga kizuua kiamukuâ.

⁹ Uila kiki-phe, hanji kua xala dinhohenu dia ngene dia athu a Nzambi, kala o dinhohenu dia Nzambi mu kizuua kia kasambuadi.

¹⁰ Kuma uoso ua bokona mu dinhohenu dia Nzambi, ua zumbuka ku ikalakalu iê, uila kia zumbukile Nzambi ku kikalakalu kiê.

¹¹ Uila kiki, tu kuatienu-phe muanu mu kubhanga ioso phala tu tene kubokona ni Nzambi mu dinhohenu diê. Ki bhu kale muthu mudietu u di bhala mu kuxibhaka Nzambi, kala ene kia xibhakele ia a tokokele kobokona.

¹² Kuma o kizuelu kia Nzambi kima kia muenhu, ki ala ni kutena. Kia beta kutua o xibhata ia mazu a iadi ndenge. O kubatula kuê, ki sesa ni muenhu, ni nzumbi, ni masokuelu, ni uongo ua ifuba. Ki tungula ni jivondadi, ni mabanzelu ma miẋima ia athu.

¹³ Kana-ku kima kiobhange ki kamba ku moneka ku mesu ma Nzambi. Ima ioso iobhange, iene ioso ia tukuluka, ia zula ku mesu mê. O kua muène, etu-ene oso kuene ku tua kà bhakula o jikonda.

Jezú, muène o Nganga ia Dikota

¹⁴ Uila kiki, tu kolokotienu mu kuxikana ku tuala na-ku. Kuma tuala ni Nganga ia Dikota uala bhu pholo ia Nzambi—Jezú, o Monʼ a Nzambi.

¹⁵ O Nganga ietu ia Dikota u tena kuivua o malamba metu. Mukonda o Nganga ia Dikota muenʼiú, a mu thendalele mu ima ioso kala etu-ene, maji sé ngó ku ta kituxi.

¹⁶ Uila kiki, tu bhiẋidienu bhu kiandu kia kiadi sé hele, phala Nzambi a tu kuatele henda. Bhenhobho tua kà tambula o kiadi ki tena ku tu bhandulula mu kumbi dia kubhondalala.