Jihebeleu 3 - O Mikanda Ikola

Jezú ua tundu Mozé

¹ Uila kiki, enu jiphange jami mu kuxikana, mua tokala mu kixanu kia Nzambi, talenu kua Jezú a mu tumikisa Nzambi phala kukala Nganga ia Dikota, tua mu fisala mu kuxikana.

² Mukonda muène ua kexile fiiele kua Nzambi, ua mu solo phala kikalakalu kiki, uila Mozé kia kexile fiiele mu kikalakalu kia dibhata dioso dia Nzambi.

³ Uoso-phe u tunga dibhata, u kala kota ku fuma, o dibhata diene ndenge. Kiene ue, Jezú, a mu mono ku fuama fuma iavulu, Mozé ndenge.

⁴ Kuma dibhata dioso di bhinga muthu u di tunga; ua tungu-phe o ima ioso, Nzambi.

⁵ O Mozé kidi kiene, ua kexi fiiele mu kikalakalu kiê mu dibhata dioso dia Nzambi. Ua kexi-phe selevende ia kidi, hé u kala mbangi ia Nzambi ia ima ioso ia xedi-ku mu ku i zuela ku hádia.

⁶ Maji-phe Kristu fiiele, kuma Mona mu dibhata dia Nzambi. Etu-phe tua kà kala tu dibhata diê, se tua jijila o kubhua uôma ni kudielela kuetu ku tua di fiiala ku kioso ki tua kinga, katé bhu disukilu.

O dinhohenu dia mundu ua Nzambi

⁷ Uila kiki, ki ambe o Nzumbi Ikôla: Lelu se mu ivua dizui dia Nzambi,

⁸ kana kukola miẋima kala mu thembu ia kulokalala, kala o kizuua ki mua ngi tele ku polova mu kikangalakata.

⁹ Ngana Nzambi-phe uixi: Kia ngi thendala o jitata jenu, anga a ngi ta ku polova, sumbala ikalakalu iami a i mono mu makuinhi a uana a muvu.

¹⁰ Kia ngi bhekela kufutuluka ni muiji uenʼ ió, ngixi: O kulueza mu ixinganeku iâ iaiibha ka ku eha, jinjila jami a tokoka ku jʼ ijiia.

¹¹ Anga ngi loka kia ngi kuata o kutema, ngixi: Enʼió nuka a kà bokona mu dinhohenu diami.

¹² Enu phange jami, alukenu, sumba mudienu mu kala muthu ni muẋima uaiibha ua kuxibhaka, u mu bhangesa kuxia Nzambi ia muenhu, nʼ a baluke.

¹³ Di suinisienu-phe mudienu izuua ioso, kioso o kizuelu kia kuila lelu, ki ambe o Mikanda Ikôla, hanji kia tu tokala etu. Bhangenu kienʼ iki phala kana muthu a mu bhomba kuala o ituxi nʼ a kole muẋima.

¹⁴ Kuma o kubhanduluka ni Kristu, ki bhinga o kudielela ku tu andeka na-ku, tu ku jijila katé bhu dizubhilu.

¹⁵ Kiene ki ambe o Mikanda Ikôla, kuila: Se lelu mu ivua dizui dia Nzambi, kana kukola miẋima kala mu thembu ia kulokalala, kala ki mua mu balukila Muène.

¹⁶ Akuahi-phe, ki evu o dizui dia Nzambi a mu lokalala? Enʼ ió oso a a katuile kuala Mozé mu Ijitu.

¹⁷ Akuahi ue a a futulukila mu makuinhi a uana a muvu? Enʼ ió a tele ituxi, o imbi iâ anga i buidila mu kikangalakata.

¹⁸ Akuahi ue a a lokela Nzambi, kuila: Enʼ iá nuka a kà bokona mu dinhohenu diami? Oko enʼ ió a mu balukila.

¹⁹ Tua mono kuma a tokoka kubokona mukonda dia kukamba o kuxikana.