Jihebeleu 2 - O Mikanda Ikola

Kristu, kuma Mona, uala kota, ji-anju ndenge. Muène o Nganga ia Dikota u kudila o athu

¹ Uila kiki, tua fuama tu kuata dingi muanu ua ima ioso ia kidi i tuevu, sumba se tu di ehelela, tu kunguluka.

² Kuma se o maka maná ma zuelela ku ji-anju, ma xalela ni kukolokota, o kutondala kuoso, mba kuxibhaka, ku kala ni kaxtiku kê koso ka tokala.

³ Etu-phe tua kà lengela bhebhi, se o kubhuluka kuosʼ-uku kua tu kuata usudi? Ngana Jezú muène o kubhuluka kuku ua diànga kiá ku ku tanga, etu anga a tu kunda na-ku kuala ió a ku ivu, kuila kubhuluka kua kidi.

⁴ Nzambi ue mbangi iâ, kuma ua a bhana kubhanga isumua ni madiuanu, ni jinguzu javulu, ni mauhete ma Nzumbi Ikôla, kioso kia mu kala mu vondadi iê.

Jezú Kristu, muène Mubhuludi

⁵ Kuma ji-anju kene a a bhana kuala Nzambi o ku tena kua kutumina o mundu uiza-ku u tuala kutanga.

⁶ Sai-phe ni bhuma mu Mikanda Ikôla, bhua bhana muthu o umbangi, uixi: Muthu kima kiahi, eie u Nzambi ki u mu suuila? Mba muthu kima kiahi, eie u Nzambi, ki u mu zungila?

⁷ Kuma ua mu bhange kukala kathangana ndenge ia ji-anju, ua mu zuika kitundu kia fuma ni ujitu, ia tokala o sobha,

⁸ Ua mu bhana kutena kua kutumina o ikalakalu ia maku mé. Ima ioso ua i te bhoxi dia inama iê. O kia tangʼ iki kuila Nzambi ua mu bhana kutumina ima ioso, kana kima kia xala-ku kia kamba ku ki tumina. Tua mono-phe kuma muthu kiluua zubha kutumina o ima ioso.

⁹ Etu-phe tua mono Jezú! A mu bhangele kathangana ku kala ndenge ia ji-anju, phala mu kiadi kia Nzambi a lole kalunga mu mulonga ua mundu uoso. Kiki-phe tua mu mono kuila mukonda dia phaxi ia bhiti na-iu, a mu zuika kitundu kia fuma ni ujitu.

¹⁰ O ima ioso i laia phala Nzambi, mukonda dia muène. O muène-phe ua mesena anʼê oso a nomona ue ku fuma iê. Uila kiki, kia fuamena kuila Nzambi u ehela Jezú ku tala jihadi mukonda dia kuiuka. Kuma Jezú muene musonguedi uâ ua kubhuluka.

¹¹ Kuma Jezú u zelesa athu ku ituxi iâ, ene oso-phe, kixi iá a a kôlesa, uixi muène, a kala akua Tata imoxi. Kiene kia mu kambesa kukala ni sonhi ia ku a exana jiphange.

¹² Kala ki ambe muène, uixi: Eie u Nzambi, o dijina dié nga kà di tumbula ku jiphange jami, O mu ʼaxaxe ka mundu nga kà kuimbila mimbu ia diximanu dié.

¹³ O bhua mukuá, uixi: Muène eme nga kà mu dielela. O bhua mukuá dingi, uixi: Talesa, eme-amʼiú ni ana a ngi bhana Nzambi.

¹⁴ O ana-phe, kala kia exana muène, a kala athu a nomona ku xitu ni manhinga. Uila kiki, Jezú muène ua di bhange kala ene, mu kutambula o kidifuanganu kia muthu, phala mu kubhita ni kalunga a tene kutolola ió uoso ua kuata o nguzu ia kalunga, muène Diabhu.

¹⁵ Phala a kudile ió oso tunde kia a vuala, hanji a xikama mu ubhika ua hele ia kalunga.

¹⁶ Kidi kiene o ji-anju ki jene ja kudila. Maji kala ki ambe o Mikanda Ikôla: Ueza mu kukudila o mbutu ia Mbalahamu.

¹⁷ Uila kiki, Jezú kia mu fuama mu ima ioso o kusokela ni jiphange jê, phala a tene kukala Nganga iâ ia Dikota, ia lenduka, ia fiiele, mu sedivisu iê kua Nzambi. Mu kienʼ iki nʼ a kale kiluuluilu kia ituxi ia mundu.

¹⁸ Kuma kia tale muène o hadi ni ku mu thendala, ua soko-bho kukudila oso a a thendala.