Jihebeleu 13 - O Mikanda Ikola

Kioso kia sakidila Nzambi

¹ O kudizola ni jiphange ki mu ku ehe.

² Kana kufula kutambulula asonhi mu mabhata menu. Kuma amoxi mu ku ki bhanga, a langeka ji-anju sé ku kʼijiia.

³ Lembalalenu oso ala ku malubhambu, kala enu uenu a mi kuikila-nâ kumoxi. Lembalalenu oso ala ku tala hadi, kala enu uenu mualù tala-nâ hadi kumoxi.

⁴ O ukaza u kale ku ujitu kua ene oso, o mala ni ahatu a sakana a di kale jifiiele mudiâ. Kuma Nzambi ua kà fundisa o jindumbu ni akuâ jiphanda.

⁵ Ki mu kale mu akua luimbi lua kitadi, ioso i mua mono i mi soke. Kuma Nzambi u ambe uixi: Eme nuka nga kà mi xisa, ki nga kà mi ehelela ue, kana.

⁶ Uila kiki, tu kolokotienu ni kuila: Ngana muène mukuatekexi uami, eme ki ngi kala ni uoma. Hé muthu u ngi bhanga-hi?

⁷ Lembalalenu athu a mi kexile ku pholo, a kexile ku mi tangela o maka ma Nzambi. O ki mu xinganeka jinga bhua sukila o uendelu uâ mu ngongo, a fikisienu mu kuxikana kuâ.

⁸ Jezú Kristu muène umoxi, ni mazá, ni lelu, katé ku hádia.

⁹ Ki mu ehele ku mi sendumuna ku maulongelu mengi mʼeza-ku, ma vulu o matelu ni a mi katule mu njila ia kidi. Kima kia uabha o muẋima ku kuata kididi mu kiadi kia Nzambi, kana mu kutumaka ijila ia kutungula makudia. Kuma oso a tumaka o ijila ienʼiii, ka tena kubhanduluka-ku kima.

¹⁰ O jinganga jene mù sedivila mu Tembulu ia jijudé, ka tena kudia ku sata iosatele ku kalatodio ketu.

¹¹ O Nganga Ia Dikota ia jijudé, u bheka manhinga ma ibhaku moxi a Kididi-Kikola-Kinéne phala kubhana o sata ia ituxi. Maji o xitu ia ibhaku a i ohela ku kanga dia kilombo.

¹² Kiene ue Jezú, ki ambe kuzelesa o mundu ku ituxi iâ ni manhinga mé muène, ua tundile mu mbanza, o hadi ia kufua kuê ua i talela ku kanga.

¹³ Uila kiki-phe, tu tundienu mu kilombo, tu kane Jezú muène, ku kangʼoko, ni kuambata o dilebhu diê.

¹⁴ Kuma mu ngongʼumu ki tuala-mu ni dibhata di nangenena, maji tua mu sota dibhata hinu dià keza-ku.

¹⁵ Mukonda dia Jezú Kristu tu bhanienu kilumbu kia kuximana jinga Nzambi. O diximanu didi, iene o sata i tua bhakula—ujitu ua tundu ku mizumbu i fisala o dijina diê.

¹⁶ O kubhanga o mbote ni ku di bhindumuna mudienu ki ku mi jimbe, mukonda ilumbu kala iii Nzambi ia mu uabhela kiavulu.

¹⁷ Enió oso a mi kala ku pholo a tumakienu, mu itaie ioso ia mi mesena ku bhanga. Kuma ene a mi lange o mienhu ienu, mbata athu a bhinga hinu a kà ki bhela konda kua Nzambi. Se enu mu a tumaka, ene o kikalakalu a ki bhanga ni ngalasa, kuma se o kikalakalu a ki bhanga ni malamba, enu ki kala kima kia kuxixima kuenu.

¹⁸ Kolokotenu ni ku tu sambela. Kuma tua di fika kukala ni kitongoluelu kia zele, mbata tua mesena kubhanga mu kidi o ima ioso.

¹⁹ Nga mi bhingi, ku ngi sambela kiavulu, phala Nzambi a ngi vutule kindala ku mi sanga ku mualʼoko.

O kusamba

²⁰ Kiki-phe Nzambi ua fukununa Ngana ietu Jezú mu madifundu, o mukonda dia kufua kuê, muène o Mubidi ua Dikota ua jimbudi. Uila kiki, mu manhinga ma Jezú, o kikutu ki nangenena a ki kolêsa ni kidimbu.

²¹ O Nzambi ia paze a mi bhane ioso ia uabha i mua bhindamena phala mu tene kubhanga o vondadi iê. O muène, mukonda dia Ngana Jezú Kristu, a bhange ioso ia mu uabhela mu miẋima ietu. O Kristu a mu fumanese kuoso, tunde kiki, katé ku hádia ni hádia. Amén.

Kumenekena ni kulekela

²² Nga mi bhingi-phe enu jiphange, kuila, o hundu íii ia ku mi longesa, ivenu-iu ni muanu. Kuma o tumaka tu nga mi sonekena mu mukanda iú, nga tu fikisa muène.

²³ Ijiienu-kiu kuila o phange ietu Timote ua jituka kiá muʼaleia. Se muene nʼeza kindala kunu, ngʼila-nê kumoxi mu ku mi kunda.

²⁴ Makota oso a mi kala ku pholo a menekenienu, ni akua mundu uoso ua Nzambi. O jiphange ku Itália kunu, a tumu ue ku mi menekena.

²⁵ O kiadi kia Ngana Nzambi ki kale ni enu oso.