Jihebeleu 11 - O Mikanda Ikola

Kioso ki kala o kuxikana

¹ O kuxikana-phe ku ijidisa ima i tua dielela, ku idikiza ima kiluua i moneka.

² Mu kuxikana muene o ikulakaji mʼ ukulu mua tambuila o umbangi uambote kua Nzambi.

³ Tua kʼ ijidila mu kuxikana, kuila o ngongo ia di bhangele mu kizuelu kia Nzambi, o imbamba ia moneka, ia tomboka mu íii ia kambe kumoneka ku mesu.

⁴ Kiejila mu kuxikana, Abele kia bhakuile kua Nzambi o sata ia beta ujitu, ki i soko ni ia Kaini. O mu kuxikana anga u tambula umbangi ua kuiuka kuê, kuma Nzambi muène ua mu bhela umbangi mukonda dia maujitu mê. O mu kuxikana kuê, Abele sumbala uafua, hanji iú zuela.

⁵ O mu kuxikana, Enoko a mu ambata sé kumona kalunga. Anga ubhua athu ku mesu kuma Nzambi ua mu ambata sé muthu dingi ku mu mona, mukonda Nzambi muène ua mu ambata. O Mikanda Ikôla i ambe kuma kioso kiluua a mu ambata, muène ua kexi mukua kuxila kiambote Nzambi.

⁶ Muthu-phe ua kambe o kuxikana ka tena kuuabhela Nzambi. Kuma uoso uiza kua Nzambi ki kala u xikana kuila sai-ku Nzambi, kuma muène mukua kubhandulula oso a mu sota ni muanu.

⁷ Kiejila mu kuxikana, Noué kia mu dimuna kuala Nzambi, ku ima ianda kubhita, o iene kiluua i moneka. Noué anga u tumaka Nzambi, hé u tunga álaka, ia mu bhulula muène ni akua bhata diê. Mu kubhanga kiki anga u belesa o mundu uoso, hé u tambula kua Nzambi o kuiuka kuijiia mu kuxikana.

⁸ Kiejila mu kuxikana, Mbalahamu kia mu ixana kuala Nzambi, muène anga u itaia, u xikina kuia mu kusota o ixi ia polomesa, iʼ ambe Nzambi o ku mu bhana. Hé u xia oxi iê-muène, u katuka, sé kuijiia kuoso kuanda kuia.

⁹ O mu kuxikana, muène u kuata kunhunga mʼ oxi ia polomesa, kala ki ixi iê, u tunga mu jibalaka, ni Izake, ni Jakobo, a sokela-nê mu kukala alundudi a Nzambi mu polomesa imoxi ienʼ íii.

¹⁰ Mukonda Mbalahamu ua kingile dibhata di kala ni madisesa ma nange nena, o mesene iê ni mutungi muène Nzambi.

¹¹ Kiejila mu kuxikana, kuila Mbalahamu u kala tata, sumbala ua kexile kiá kikulakaji, o Sala ue muene, thembu ia kuvuala ia mu bhiti kiá. Muène-phe ua xikanene kuila Nzambi uanda kukumbidila polomesa iê.

¹² Uila kiki, ku muthu umoxi, o muène mukua ni kuila uafu kiá, kua sokoloka mundu, mu kuvula a sokela ni jithethembua ku diulu, ni kisekele ku mbandu ia kalunga, o ku a kondala ki ku xikina.

¹³ Athu oso enʼiá afua, ezala ni kuxikana. O jipolomesa ja a bhele Nzambi ka ji tambuile luua, maji a ji muena ngó mu kanga, hé a ji tanesa ku makanga kuenioko ku ja monekena. Anga a di fisala kuila asonhi, jingenji mu ngongʼ umu.

¹⁴ Oso-phe a zuela kiki, a di monekena kuila a mu sota o ixi iâ ia bhindamena.

¹⁵ Ka mu xinganeka kuvutuka dingi ku ixi ioio kua tundu kiá. Se andalele, hinu a mono kithangana kia kuvutukila-ku.

¹⁶ Uila kiki, o bhezabha-phe a mu sota ixi ia beta o kuuabha, o ixi ia diulu. Nzambi kiene kia mu kambesa kukala ni sonhi ia ku mu luka kuma muène Nzambi iâ-ene, mukonda muène ua a iudikila kiá dibhata.

¹⁷ Kiejila mu kuxikana, Mbalahamu kia mu lola, anga u bhakula Izake kala sata. Muène Mbalahamu a mu bhele o polomesa kuala Nzambi, ia ku di sokolola ndumba ia miji, sumbala kiene, muène ua bhakuile monʼê umoxi-eléle mu ku mu vuala.

¹⁸ Nzambi ua mu ambelele uixi: Mua Izake mua kà sokoloka miji ia ndumba, i kala mu dijina diê.

¹⁹ Mbalahamu kia mu tetulukila kuila Nzambi ua soko-bho kubheka dingi Izake ku muenhu, né ku ʼalunga ku aii, o ki kia bhiti kifua Mbalahamu ua tambula muene monʼê Izake ku ʼalunga.

²⁰ Kiejila mu kuxikana, Izake kia bhana Jakobo ni Ezaú o mabesá ma keza-ku, anga u tanga o ima kiluua ngó iza-ku.

²¹ Kiejila mu kuxikana, Jakobo kia kumbama, u bhana dibesá kua ana kiiadi a Zuze. Muène anga u xamenena ku mbangala iê, u bheza Nzambi.

²² Kiejila mu kuxikana, Zuze kia mono o kufua kuê kua zukama, u tanga o kukatuka kua anʼ a Izalaiele mu Ijitu, anga u a lekelela kioso kia bhanga o kimbi kiê.

²³ Kiejila mu kuxikana, Mozé kia mu vuala, a mu sueka mu mbeji jitatu kuala o jitata jê. Mukonda ene a mu mono kuma mona ua di sanze, o ngonge ia sobha ka i lenge.

²⁴ Kiejila mu kuxikana, Mozé kia zubha kukula, u dituna ku mu ixana dingi monʼ angene a monʼ a Falaó.

²⁵ Ua solo-bho o kutala hadi ni mundu ua Nzambi, kana o ku di uabhela muène mu jivondadi ja ituxi ji bhanga ngó kathangana.

²⁶ O muondo ua Kristu phala muène kota dia nganhu, o jimbongo joso ja Ijitu ndenge. Kuma muène ua tele mesu ku dilau dià keza-ku.

²⁷ Kiejila mu kuxikana, Mozé kia tundu mu Ijitu, njinda ia sobha ka i lenge. Anga u kolokota ni ufiiele kala uala ku mona Nzambi, ió ka moneka ku mesu.

²⁸ O mu kuxikana, muène ua bhitisa o Phasu ia dianga, iú ua tumine kutesa o kidimbu kia manhinga ku mabhitu a jinzu ja anʼ a Izalaiele phala o Anju ia Kibuika ki ia a jibhile o ana a jiphande-kumbi.

²⁹ Kiejila mu kuxikana, anʼ a Izalaiele kia zauka o Musanza Uakusuka kala bhoxi dia kukuta. O akua Ijitu kia fikisa ue kuzauka, a boba mu menha a kalunga.

³⁰ Kiejila mu kuxikana, kia lundumuka o imbaka ia Jedikó, anʼa Izalaiela kia zubha o ku i kondoloka mu sambuadi dia kizuua.

³¹ Kiejila mu kuxikana, Lahaba dia kidianzunga kia kambele kufuila kumoxi ni akuâ a xibhakele Nzambi, mukonda muène o ilolo ia anʼ a Izalaiele ua i tambuluile kiambote.

³² Ngʼ ila-phe dingi kiebhi? Kuma o thembu i ngi bhua se ngedile ngi tanga ni Ngidiione, ni Balake, ni Sasango, ni Jafeta, ni Davidi, ni Samuuele, ni jipolofeta.

³³ Athu edile mu kuxikana kuâ, a tolola ilômbo ia muvimba. A iukisa milonga, hé a tambula o jipolomesa ja Nzambi. A xita o makanu ma jihoji.

³⁴ A tumbulula o nguzu ia mulengu ua tubhia. A bhulaka ku a jibha ku mazu a xibhata, mu kubhuila a tambula nguzu. A bhanga undanda ku ita, anga a tolola o ifuẋi ia matumbu.

³⁵ O mu kuxikana, ahatu a tambula dingi o madifundu mâ mu ku a fukununa mu afi. Amukuâ a a jibha ni kibetu, maji a ditunu ku a jituna phala a fukunukine muenhu uengi ua beta ujitu.

³⁶ Amukuâ a bhita ku polova ia ku a bhanga ufusa, ni ku a bhesa jixikote, o amukuâ a a ta ku malubhambu ni ku a jikila mu ʼaleia.

³⁷ Amukuâ a a buba ni matadi, amukuâ a a sesa mu ʼaxaxe, o amukuâ a a jibha ni xibhata. A nhunga mbandu ni mbandu, a zakela ibha ia jimbudi ni ia jihombo, a bhindama, a a zukutisa ni ku a bhana malebhu.

³⁸ A bungana mu mikau ia kukuta, ni ku milundu, a zeka mu mabanda ni mu makungu bhoxi. O ngongo ki i fuamene athu kala iá!

³⁹ Ene oso iá, a a bhela umbangi kuala Nzambi mukonda dia kuxikana kuâ. Maji o jipolomesa ja Nzambi ka ji tambuile luua,

⁴⁰ kuma Nzambi sai kima kia iudika, kia beta ujitu, kia tu bhakela etu. O ki andalele Nzambi—o kuila ni ene, ni etu kumoxi, ki kale tu zubha kutenena.