Jihebeleu 10 - O Mikanda Ikola

¹ O kitumu kia Jijudé ki ki tenena ni ufiiele ua ima ia kidi. Mukonda kizuzumbia ngó kia ima iambote ianda kuiza-ku. O jisata jenʼ iji ene ku ji bhana muvu ni muvu. Manhi o Kitumu kia jisata jiji ki tena kuzubhisa athu ku tenena, oso a bhixila kua Nzambi?

² Se o akua kubheza Nzambi a zubhile kuzela ku ituxi iâ, o jisata joso-phe ue hinu jeji kubhua-ku.

³ Maji o jisata jenʼ iji ji bhangesa o athu kulembalala o ituxi iâ, kutunda muvu kiene, kuiza muvu kiene.

⁴ Mukonda ki ki xikina kuila o manhinga ma jingombe, ni jihombo ma tena kukatula ituxi ia muthu.

⁵ Uila kiki, Kristu kioso ki eza mu ngongo, u ambela Nzambi, uixi: Eie ku indi jisata, ni maujitu ma ibhaku, maji ua ngi bhangela o mukutu.

⁶ O jixitu ja kuoha bhu kalatodio, ni ilumbu ia ituxi, ki ia ku kala mu vondadi. Né mbé o jisata ja kukatula ituxi.

⁷ Ngixi-phe, kiua—Eme ngeza kiabhuʼó, eie u Nzambi, mu kubhanga o vondadi ié, kala kia ngi soneka-kiu mu Divulu dia Kitumu.

⁸ Mu ku mateka muene uixi: Eie ni jisata, ni mibhaku, ni jixitu ja kuoha, mba o maujitu ma ibhaku io uohe bhu kalatodio, mba o jisata ja ku katula o ituxi, iene ioso kua i indi. Muene u ambe kienʼiki sumbala jisata joso ene ku ji bhana kala kia tumu o Ngonge.

⁹ Iú u ambe dingi, uixi: Eme ngeza kiabhuʼó, eie u Ngana, mu kubhanga o vondadi ié. Mu kubhanga kiki, Nzambi jisata joso jʼokulu ua ji katula-ku, iú ua bhinganesa-ku o sata ia Kristu.

¹⁰ Kuma-phe Jezú Kristu ua bhange kioso kia uabhela Nzambi, etu a tu zelesa ku ituxi mukonda dia kilumbu kia mukutu ua Jezú Kristu, kia bhana lumoxi ngó kuabhu.

¹¹ O nganga ioso ia Jijudé izuua ioso u imana ni kusedivila, ni kubhana jinga o jisata jene jimoxi. Maji o jene nuka ji tena kukatula ituxi.

¹² O Ngana Jezú Kristu-phe ua bhana sata imoxi ngó, ia soko, ia kaiela-ku, iú ua xikama ku madilu ma Nzambi.

¹³ Iú ua mu kinga kuenioko, katé Nzambi kia tula o jinguma jê kala mbenza bhoxi dia inama iê.

¹⁴ Uila kiki, ni kilumbu kiê ngó kimoxi, muène ua a zelesa bhoxi bhuabhu, ene oso a a zelesa ku ituxi.

¹⁵ Ni Nzumbi Ikôla ue ua tu bhela umbangi ku ima ienʼiii. Kuma ua zuela uixi:

¹⁶ Kiene o kikutu hinu ki nga kà ta ni ene ki zubha kubhita o izuuʼoio, eme ngi Ngana. Nga kà ta o ijila iami mu miẋima iâ, anga nga kà i soneka mu ilunji iâ.

¹⁷ Hé u zuela dingi, uixi: Ni ituxi iâ, ni mangonha mâ, ki ngà kà i lembalala dingi.

¹⁸ Uila kiki, se o ituxi a i loloka kiá, ki kua bhingi dingi kilumbu kia ituxi.

Ku a longesa kukolokota mu kuxikana

¹⁹ Uila kiki, enu jiphange, mukonda dia kufua kua Jezú, tua tambula disesa dia kubokona mu Kididi-Kikôla-Kinéne.

²⁰ Muʼaxaxi ka kibatulu, kifua o mukutu uê; muène ua tu jikuila njila ia ubhe, ia muenhu.

²¹ Tuala ni Nganga ia Dikota u tumina o dibhata dia Nzambi.

²² Uila kiki, tu bhiẋidienu kua Nzambi, ni muẋima ua kidi, ni kuxikana kua soko, ni ku tu zelesa miẋima mu ku tu bhuisa o kitongoluelu kiaibha, ni ku dʼixika o mikutu ni menha ma zele.

²³ Tu kolokotienu ni kufisala o kixikanu kietu sé kubhuila, kuma Nzambi ua tu bhana kizuelu uala fiiele.

²⁴ Tu di xinganekienu mudietu, tu di suinise mu ku dizola, ni kubhanga o mbote.

²⁵ Kana kufula ku di bhongolola jinga, uila amoxi ki ene kufula, maji tu di longesa mudietu. Uila kiki, tu di suinisienu mudietu, kota-kota dingi kioso ki mu mona o Kizuua kia Ngana kí zukama.

²⁶ Mbata se o ituxi tu tona ku i ta ku luelu, ku thandu dia ku tu ijidisa o kidi, sata ia tokala ituxi ia xala-ku, ki i moneka dingi.

²⁷ Ku tu iza ngó jihele ni uôma ua ku xikamena kioso ki anda kuiza-ku: o Kufundisa, ni tubhia tua muzukuta tua kà buidisa oso a ditunu Nzambi!

²⁸ Uoso u xibhaka o Kitumu kia Mozé, a mu jibha sé ngó kulenduka, mu kizuelu kia mbangi jiiadi mba jitatu.

²⁹ Abha-phe kia kà bhita kiebhi ni ió ua ditunu o Monʼ a Nzambi, iú ua mono kuila o manhinga ma kikutu kia Nzambi ma mu kolêsa, kima kia ngoho? Kia kà bhita kiebhi ue ni uoso u lokalala o Nzumbi ia kiadi kia Nzambi? Xinganekenu-phe, se o kaxtiku kê ka mu tokala, ka kà soka kiebhi!

³⁰ Kuma tua mu ijiia uoso ua ki zuela uixi: O kubhana o kaxtiku kua ngi tokala eme, eme-muène nga kà bhanga-nê o jikonda. Mukuâ ue uambe uixi: Ngana ua kà fundisa o mundu uê.

³¹ Kima ki kuata uôma, o kubuila bhu maku ma Nzambi ua kola o muenhu!

³² Lembalalenu-phe kia bhitile mʼ ukulu: Mu izuua ienioio, kioso o mukengeji ua Nzambi ki ua muikina ku thandu dienu, enu mua talele hadi iavulu, maji mua kolokota, a lembua ku mi tolola mu mvunda.

³³ Amoxi mudienu, muedi ni ku mi sebulula bhu pholo ia mundu, a mi ta muondo, a mi tatesa; muedi ue ni kubanda akuenu a a bhangele kienʼ iki.

³⁴ Enu mua tale o hadi kumoxi ni ene oso a kexile ku malubhambu mu jikaleia. O kia mi bhundu o imbamba ioso i mua kexile na-iu, mua xididika ni ngalasa mu ima ioso íii, mukonda mu ejiia kuma mu avu jimbongo ja beta ujitu, ja kà xalela-ku, ku diulu.

³⁵ Uila kiki, o kubhua uôma ku muala na-ku, ki mu ku ehe, mbata sai ni dilau diê dia dikota.

³⁶ Mua bhingi mu kala ni kinhenge, kuma ki mua kà zubha o kubhanga vondadi ia Nzambi, mua kà tambula polomesa iê.

³⁷ Mukonda, kala kia tange o Mikanda Ikôla: Kuma kua kambe ngó kathangana, kathangana kʼ ofele muène, o Ió tua mu xikamena, uiza; uanda kuiza muène, ka kokoloka.

³⁸ O mundu uami-phe uaiuka, ua kà bhulukila mu kuxikana. Maji uoso ualuluka ku dima, muẋima uami ki u mu kala dingi ni vondadi.

³⁹ Etu-phe ki tu tokala ku akua usudi, a vutuka ku dima, hé a texika. Maji tuala ni kuxikana kua kidi, ku tu bhekela o kubhuluka.