Jelemiia 7 - O Mikanda Ikola

Jipolomesa ni jindumu, a ji zuela bhu muelu ua thembulu

¹ Kizuelu, a ki jimbuila Jelemiia, kuala Jihova, uixi:

² Imana bhu muelu uaʼnzu ia Jihova, u boke o hundu iii, uila kiki: ivenu hundu ia Jihova, enʼuoso mu akua Juda, oso mua mu bokuena bhu mielu iii, mu kubheza Jihova.

³ Jihova dia Ilombo Ieta, Nzambi ia Izalaiele, uambe kiki: Iukisenu o jinjila jenu ni ikalakalu ienu, nda ngi mi tungise mu kididi kiki.

⁴ Ki mu dielele maka ma ngoho, muexi: Tembulu ia Jihova, Tembulu ia Jihova, Tembulu ia Jihova ienhiʼii.

⁵ He kima, se mu iukisa jinjila jenu ni ikalakalu ienu mu kidi kiene, se mu fundisa mu kidi muthu ni mukuá.

⁶ Se mu kamba ku talesa hadi ku nzuá-ngiza ni monʼa difundu ni mutudi, mba kuzunza manhinga ma muthu ua kambe kikuma, bhu kididi kiki, mba ku kaiela jinzambi jengi mu ku di bhanga enuʼenu phulu,

⁷ Eme nga-nda ku mi tungisa mu kididi kiki, mu ixi i nga bhana kiá ku jitata jenu, ku mivu ni mivu.

⁸ Nga mono kuma enu mua dielela maka ma difila, ki ma tena kubhandulula kima.

⁹ Enu muila ni kunhana ni kujibha, ni kuta jiphanda, ni ku di lokela mu makutu, ni kuohela Bale uasu ua dizumba, ni ku kaiela jinzambi jengi, ji mua kambe ku jijiia.

¹⁰ Anga muiza kiua, ni mu imane bhu pholo iami monzo mumu, ia luku dijina diami, anga muila: Tua di xala, tu tena kiá o kubhanga isunji iosuʼiii?

¹¹ Onzo iii-phe ia luka dijina diami, mbé i kala ngenda ia ingumba ku mesu menu? Talesa, kienhiki eme, eme-muène ngi Jihova nga di muena-kiu, Ngana ua kiambe.

¹² Maji kindala ndenu-phe ku kididi kiami, kia kexi mu Silu, mu nga xikikile o dijina diami ku dimatekenu, mu tale kioso ki nga mu bhange, mukonda dia unzangi ua mundu uami ua Izalaiele.

¹³ Kindala-phe, kuma enu ima ioso iii, iene i mua mu bhanga, eme Jihova, o ki nga zuela, nga mi tela maka, enu o kuivua nguenu, o ki nga mʼixana, nguenu kuitaia.

¹⁴ Onzo-phe iii, ia lukila mu dijina diami, i mua mu dielela, ni kididi kiki, ki nga mi bhana enu ni jitata jenu, nga-nda ku i bhanga kala ki nga bhange Silu.

¹⁵ Hinu ngi mi texi koko, mu ngi bhue ku mesu, kala ki nga texi koko o jiphange jenu joso, o muiji uoso ua Ifalaíme.

O Kuxibhaka Kua Mundu

¹⁶ Eie bá, kana kusambela o mundu iú, kana ue ku a tela nzôngo mba musambu, mba u ngi zukutisa, mbata eme ki nga-nda ku kuivua.

¹⁷ Eie kua mono kia kuata ku bhanga mu madiembu ma Juda, ni mu jinzunga ja Jeluzaleme?

¹⁸ O ana a ẋanga jihuinhi, o jitata anga ji uika o túbhia, o ahatu-phe a toxa fuba ia tiliku phala kubhanga jimbolo ja kusatela mvuale ia diulu, ni kubhakula mubhaku ua makúnua ku jinzambi jengi, phala ku ngi lokalala o njinda.

¹⁹ Jihova phe uambe uixi: Mbé eme a ngi lokalala o njinda kiokio, ki ene muene a di bhange-kiu phala o jisonhi ja pholo jâ?

²⁰ Kala kiki, Ngana Nzambi uambe uixi: Talesa, njinda iami ni ngânji iami nga-nda ku i lunduluila ku thandu dia kididi kiki, ni ku thandu dia athu ni ku thandu dia iama, ni ku thandu dia miẋi ia mikáu ni ku thandu dia ibundu iaʼxi; o ki iila léku, ki ia kà jima dingi.

²¹ Jihova dia Ilombo Ieta, Nzambi ia Izalaiele, uambe kiki: Mibhaku ienu ia kuoha bhongololuenu-iu ku jisata jenu, nda mudie xitu.

²² Mbata eme nuka ngʼambelele jitata jenu, bhu kizuua ki nga a katuile kʼoxi ia Ijitu, mbe ngʼa jimbuila kima kioso-kioso ku mbandu ia sata ja kuoha mba mibhaku.

²³ Maji eme nga a tendelele kiki, ngixi: Bhanenu mátui ku dízui diami, eme ngi kale ngi Nzambi ienu, enu mu kale mu mundu uami; endenu ni kuendela mu njila ioso i ngi mi tuma eme, nda mu bhanduluke.

²⁴ Maji ene-phe kʼevu, mba a bheteka o matui mâ nʼevue, inda a kaiela jiphangu ja ene, kima kia kane muẋima uâ ua kudianguka; anga enda ni kuvutuka kuema, o kusuluka ku pholo nguâ.

²⁵ Tundé mu kizuua kia tundile jitata jenu kʼoxi ia Ijitu, katé leluʼidi, nga kuata ku mi tumikisa jiselevende jami joso, o jipolofeta, izuua ioso kukia ngó, nga a katula, ngixi ndenu.

²⁶ Maji ene nguâ ku ngi bhana mátui, mba kubheteka o mátui, maji o jixingu jâ a ji hinanesa, ima ia bhange ia beta kuzangiua o ia bhangele jitata jâ ndenge.

²⁷ Ua-nda ku a tangela maka mosuʼama, maji ene-phe ka-nda ku ku bhana mátui; ua-nda kua exana muene, maji ene-phe ka-nda ku ku tambuijila.

²⁸ Eie ua kà ambela uixi: O kiki kiene o kifuxi kia lembua ku bhana o mátui ku dízui dia Jihova Nzambi iâ, ka xikina kuivua kibazu: Kidi kia jimbidila, mu kanu diâ kiòkatule-mu.

O ibhangelu ia ituxi mu Dikôlo dia Hinome

²⁹ Kolola jindemba ja mútue ué, u ji texi, u bhita-bhite ku matala ni kuta o nzôngo ia kudila; mbata Jihova ua ẋimbuka iú uehelela o muiji ua njinda iê.

³⁰ Mbata anʼa a Juda a bhange muene kia ibha ku mesu mami, eme ngi Jihova; isunji iâ a i tula muene mʼonzo iʼexanena mu dijina diami, phala ku i kasanesa.

³¹ Ia a tungu matala ma Tofete, mala mu dikolo dia monʼa Hinome, phala muene mu ohela anʼâ a mala ni a ahatu mu túbhia; o kima nuka ngʼa tuma-kiu, mba ki ngi tunda ngó ku muẋima.

³² Kala kiki, Jihova uambe, kua-nda kuiza izuua, ia kuila kididi kiokio ka kʼixana dingi Tofete, mba dikolo dia monʼa Hinome; maji a kʼixana dikolo dia Kijibha; hé o imbi a kènda ni ku i funda mu Tofete muene kuma kididi né-ku dingi.

³³ O imbi ia mundu iú ia kà di bhanga huta ia jinjila ja bhulu ni ia iama ia mukáu; u ji kaiesa ka moneka.

³⁴ Hé nga kà zumbula o dízui dia kutonoka ni dia kusanguluka mu madiembu ma Juda ni mu jinzunga ja Jeluzaleme, ni dízui dia ngaiala ni dia dibhanga: mbata oxi ia-nda kua kà di kuata mukondo.