Jelemiia 52 - O Mikanda Ikola

Jeluzaleme a mu konda, a mu tolola, hé a mu muanga-muanga

¹ Zedekiia kioso kia hingi ungana, ua kexile mu makuinhi aiadi a mivu ni umoxi, iú uandeka kutumina, hé u tumina kuinhi dia mivu ni kamoxi mu Jeluzaleme; o dijina dia manhʼâ, a muʼila jinga exi Hamtale, monʼa Jelemiia dia Libina.

² Anga u bhanga ioso ia ibha ku mesu ma Jihova, kala ioso kiá ia bhanga jinga Nzuakí.

³ Mukonda dia kienhiki-phe, anga ki bhita kuila, mukonda dia njinda ia Jihova ia kuatela Jeluzaleme ni Juda, Jihova ua a kaie bhu pholo iê; anga Zedekiia u lungulukila sobha ia Babilonha mu kuzoka-nê.

⁴ Mu ku bhiẋila-phe mu muvu ua kávua, ua utuminu uê, bhu mbeji ia kakuinhi, mu kizuua kia kakuinhi ku mbeji kiene kieza Nabukodonozolo, sobha ia Babilonha, mu kúlua ni Jeluzaleme, muene ni Kifuẋi kiê kioso kia masoladi anga a mu tela kibènge hé a mu kandeia jimbonge mu jimbandu joso.

⁵ Mbonge anga a i konda kienhiki katé mu muvu ua kakuinhi ni umoxi ua utuminu ua sobha Zedekiia.

⁶ Bhu mbeji ia kauana, ku kizuua kia kávua ku mbeji, kioso o nzala ki ia tundu kinéne mu mbonge, o Kifuẋi kia akuaʼxi kúdia a ku lémbua.

⁷ Kiene kia jikula dizungu mu mbonge anga makuenze oso a mu lua ita hé a lenga, a tunda ni usuku, a di tela njila i lunga bhu dibhitu, bhu kaxi ka imbaka i iadi ia zukamene ni jindombe jà itulu ia sobha, anga a ila mu njila ia kuia ku kiphenza.

⁸ Maji o Kifuẋi kia masoladi ma jikaldeu sobha a mu kaiela hé a mu kuatela mu kiphenza kia Jedikó, o Kifuẋi kiê kioso kia masoladi anga ki muangana makidikidi, a mu xa ubheka uê.

⁹ O iá anga sobha a mu kuta, anga a mu bandesa kua sobha ia Babilonha, bhu Dibalah, mu ixi ia Hamate, bheneʼobho bhene muene bhua mu elesela.

¹⁰ Anʼa Zedekiia anga a a batula mitue kuala sobha ia Babilonha, bhu mesuʼê muene; o ilamba ioso ia Juda anga u i batula ue mitue bhu Dibalah bhene.

¹¹ Anga u tufula o mesu a Zedekiia, u mu kuta ni malubhambu aiadi a ngondo; hé sobha ia Babilonha u mu ambata uia-nê ku Babilonha, anga u mu bhaka mu kiboiongo katé bhu kizuua kiê kia kufua.

O kusenguluka kua Tembulu

¹² O bhu mbeji ia katanu, mu kizuua kia kakuinhi ku mbeji, (uenhu-phe uene o muvu ua kuinhi niʼvua, ua utuminu ua Nabukodonozolo, sobha ia Babilonha) kiene kieza Nebuzaladane, mu Jeluzaleme, kabhitangu ka kilangidilu, ua kexile mu kunanga bhu pholo ia sobha ia Babilonha.

¹³ Anga uoha inzu ia Jihova ni dizemba dia sobha, kumoxi ni jinzu joso mu Jeluzaleme; jinzu joso ja adiakime ua jiʼoha mu túbhia.

¹⁴ O Kifuẋi kioso kia masoladi ma akua Kaldeia, kia kexile kumoxi ni kabhitangu ka kilangidilu, kia bulu imbaka ioso ia kondolokele Jeluzaleme.

¹⁵ O jingadiama ja ngadiadia mu Kifuẋi, ni mbandu ia mundu ua xalele mu mbonge, ni iá a balukile ia a di tele kiá ku mbandu ia sobha ia Babilonha, ni iá a subhuka kua eneʼoso, Nebuzaladane kabhitangu ka kilangidilu, ua a kuika iú uai na-u.

¹⁶ Maji ku jingadiama ja ngadiadia mu ixi, Nebuzaladane, kabhitangu ka kilangidilu, uaxi-ku amoxi-moxi-mu phala kudima ji-úva ni kukala idimakaji iaʼxi.

¹⁷ Jikaldeu inga a bula dingi o jiphiladi ja ngondo ja kexile mʼonzo ia Jihova, ni maxikikilu, ni musanza ua kalunga ua ngondo ua kexile mʼonzo ia Jihova, inga ngondo ioso a i ambata, aia na-iu ku Babilonha.

¹⁸ Ambata ue ni jímbia, ni jipá, ni jingalufu, malonga a menha a pholo, ni jingutu, ni itutu ioso ia ngondo ia kubhangela ukunji mʼonzo ia Jihova.

¹⁹ Kabhitangu ka kilangidilu anga u zangula ue ni jikopho, ni ididi ia kuohela uasu ua dizumba, ni malonga a menha a pholo, ni jímbia, ni jikandiielu, ni jingutu, ni itutu ia kutela maji ni mvindangele; kutale ima ioso ia ulu mu ulu, uixi ia phalata mu phalata.

²⁰ Ni jiphiladi jiiadi ni musanza umoxiʼèlele ua kalunga, ni kuinhi dia ngombe ni kiiadi ja ngondo ja kexile bhu kididi kia ibaka, o maxikikilu a iudikile sobha Solomá phala inzu ia Jihova; ima iosuʼiii, o ngondo iê, ka i pezalele.

²¹ O jiphiladi-phe, imoxi ngó o kitala kiê, i kala ni kuinhi dia kóvadu ni nake, hé a i kondoloka kuala nzenzela ia kuinhi dia kóvadu ni kiiadi; o mukomo uê ua milembu iuana, o moxi diê mu kubuka ndungulu.

²² Ku mútue ua philadi kua kexile kapitele ka ngondo; o kitala kia kapitele, kia kóvadu jitanu, ni kitanda ni jilomá ja kondoloka o kapitele, ja ngondo joso; o philadi ia mukuá ue ni jilomá jê, ia di fuile kienhiki.

²³ Kala mbandu ku kala makuinhiʼ vua a jilomá ni kisamanu, kitanda kioso a ki kondoloka kuala hama ia jilomá.

O Mundu ua Juda a uambata ku Babilonia

²⁴ Kabhitangu ka kilangidilu, uambata ue ni Selaia, nganga ia dikota, ni Sofoniia, nganga ia kaiadi, ni alangi a mabhitu kitatu.

²⁵ O mu mbonge uambata-mu ue ngolambole imoxi ua kexi mu kutumina athu oso aia ku ita; ni sambuadi dia athu ngambi ja maka a kexile kumoxi ni sobha, a a sangele mu mbonge, kumoxi ni musoneki ua kangane, ua kexi mu kusoneka ene oso aia ku ita, ni makuinhi a samanu dingi a athu ku mundu, a a sangele mu kaxi ka mbonge.

²⁶ Kioso Nebuzaladane, kabhitangu ka kilangidilu, kia ambata, ua a bheka kua sobha ia Babilonha bhu Dibalah.

²⁷ O sobha ia Babilonha anga ua a beta u a jibhila bhu Dibalah, mʼoxi ia Hamate. Kienhiki kiambata Juda mʼoxi iê, phala ku mu bheka ku ubhika.

²⁸ O mundu uambata Nabukodonozolo ku ubhika mu muvu ua kasambuadi uenhú: Midi jitatu ni makuinhi aiadi ni kitatu kia jijudé.

²⁹ O mu muvu ua kuinhi ni nake dia utuminu ua Nabukodonozolo, muene uambata dingi mu Jeluzaleme, hamaʼnake ni makuinhi a tatu ni kiiadi kia mienhu, ku ubhika.

³⁰ O mu muvu ua makuinhi aiadi ni kitatu ua utuminu ua Nabukodonozolo, Nebuzaladane, kabhitangu ka kilangidilu, mu jijudé uambata-mu dingi, ku ubhika, hamaʼsambuadi ni makuinhi auana ni kitanu kia mienhu; anga mienhu ioso i kala midi jiuana ni hama jisamanu.

³¹ Anga ki bhita kuila mu muvu ua makuinhi a tatu ni sambuadi ua uhutile ua Nzuakí, sobha ia Juda, mu mbeji ia kakuinhi ni kiiadi, bhu kizuua kia makuinhi aiadi ni kitanu ku mbeji, kia muvu ua dianga ua utuminu ua Evile-Melodake, sobha ia Babilonha, kiene sobha muenhú kia bhetula mútue ua Nzuakí, sobha ia Juda, iú ua mu katula mu inzu ia dikuikilu;

³² Anga u mu zuelesa ni ujitu uoso, anga u tudika kiandu kiê ku thandu dia iandu ia jisobha joso ja kexile na-ju mu Babilonha.

³³ Anga u mu zula izuatu iê ioso ia kexile na-iu mu kiboiongo; hé uia ni kudia jinga kúdia bhu pholo ia sobha izuua iê ioso ia kexile ku muenhu.

³⁴ Anga aia muene ni ku mu bhanga kiambote kuala sobha ia Babilonha, ni kutambula dikanda diê dia mu tokala izuua ioso, katé bhu kizuua kiê kia kúfua, kienhiki muene izuua ioso ia muenhu uê.