Jelemiia 49 - O Mikanda Ikola

Jelemiia u zambula ima ia-ndu bhita ni akua Amone

¹ Ku mbandu ia anʼa Amone, Jihova uambe kiki; Manhi Izalaiele ua kambe anʼa mala, mba jindundu? Mukonda diahi-phe, Malkane muene ua lundula Ngade, o Kifuẋi kiê ia a tungu mu jimbanza jêʼmuene?

² Uila kiki, Jihova uixi: Talesa, izuua í iza, mu Labáh dia anʼa Amone, nganda kuivisa-mu kikoue kia ita, anga mu di bhanga ndunji ja maxita o ididi iê ia tumina jinga a ka ioha mu túbhia; anga Izalaiele ua kà lundula oso a mu lundula muene, Jihova ua ki tange.

³ Dila kala kimbungu, eie Hexebone, kuma Hai a mu sengulula; di kodienu, enu mu anʼa Labáh, di kutienu idinhaji bhu kinhonga, tenu jingololo, muende ni kuimajana mu ikanzu; kuma Malkane ua-nda kuia ku ubhika kumoxi ni jinganga jé ni ilamba iê.

⁴ Mukonda diahi u di ximanena jihonga, jihonga jé ja uabha kinéne, eie monʼa kilumba ua ẋinuka, eie ua dielela ku jimbongo jé, uixi: Nanhi muene uiza mu kuzoka nʼeme?

⁵ Tala-ze; nga-nda kubheka kiteketela ku thandu dié, kia eneʼoso a ku kala mu jimbandu jé, kiene kiambe Ngana, Jihova dia Huxi; anga a kà mi takuila ku kanga, kala muthu a kà mu lunduila ku pholo, ki bhua ká kala uongeka uoso ua jimbidila.

⁶ Maji ki a-nda kuzubha ku bhita iosuʼiii, jihutile, jʼanʼa Amone, nga-nda kua kà a vutula dingi, Jihova ua ki tange.

Jelemiia u zambula ia ndu bhita ni akua Idomo

⁷ Ku mbandu ia Idomo, Jihova dia Huxi, uambe kiki: Mbé mu Temane kana-mu dingi kuijiia? Mulongi iuná ua athu ejiia ki uala-mu dingi? O kuijiia kuâ kua tumbuluka kiá?

⁸ Lengenu, Vutukenu, mu tunge mua zongo, enu mua tunga mu Dedane, mukonda eme nga bheka kibuika kia Izaú ku thandu diê mu kithangana ki nga mu zungila.

⁹ Se akua kumuna ejiie kokué, kʼeje kuxisa manonena? Se miii, mʼusuku, kʼeje ku ku nhana ue kioso kia a soko?

¹⁰ Maji eme Izaú nga mu zula, nga tukulula o masuamenu mê, ka-nda kutena dingi kusuama; muiji uê ua senguluka, kiene kimoxi ue ni jiphange jê ni jinzukame jê, o muene ue ka moneka dingi.

¹¹ Jihukunhi jé xisa naju, eme ngʼa bhaka ku muenhu; o atudiʼé a-nda ku ngi dielela eme.

¹² Mukonda Jihova uambe, kiki: Talesa, kuma iá ka a xindile kúnua kopho, a-nda ku i nua muene iene ioso, eie anga u subhukʼé muene? Kana, ka kambe ku ku belesa muene, eie ue uanda ku i nua.

¹³ Mukonda nga di lokela eme-muene-muène, eme ngi Jihova, kuila Bozola ua kà di bhanga kima ki kakukisa, ni lusebu, ni dibuikilu, ni kisunji; o jimbnonge jê joso ja kà di bhanga jingundu ji nangenena.

¹⁴ Ngʼevu fuenge ia tundu kua Jihova, kuila a tumikisa mukunji ku akua jixi, phala ku a tangela, kuila: Bhongolokenu muize mu kuzoka-nê, balumukenu mu lue ita.

¹⁵ Kuma, talesa, nga ku bhange u ndenge muʼaxaxe ka Huxi, mu kizomba kia athu, eie a ku sebulula.

¹⁶ O ku dizangeleka kué ni ku di temeneka kua muẋima ué kua ku nganala kiavulu. Eie ua tunga mu mabànda ku matadi, ua tulama bhu thala dia milundu, né-mbé kikalanga kié u ki ta bhua dileka kala holokoko, hanji, kuenhoko kuene ku nga-nda ku ku lundumuna, Jihova ua ki tange.

¹⁷ Kienhiki, Idomo ua-nda ku kala kima kia kidiuanu; uoso-uoso u bhita bhu mbandu iê ua-nda kudiuana anga u xika muphióphio mukonda dia mabhebhu mê.

¹⁸ Ua kèla kala bhu kibuika kia Sodoma ni Ngomola ni iá a zukamene na-u, kiene kia tange Jihova; ki bhua kà moneka uoso u tunga bhobho, monʼa muthu u tunga bhobho ka moneka.

¹⁹ Kuma mukuá ni hoji ki i tunda ni kubanda ku Njolodá, iendela kubula dibhata dia dizonda; mbata mu kithangana kiofele ngó, bhua kexile ngi mu kaiesa-bhu, o ngi mu sola eme nanhi, ni ngi mu te ditala dia ku mu tumina? Mukonda, nanhi ua di fuangana nʼeme? Nanhi u ngi xindila kithangana? Mubidi nanhi u tena kuimana bhu pholo iami?

²⁰ Kala kiki, ivuenu kaiula ka Jihova, ka tange muene kua Idomo; ni ixinganeku ia thulu iê, mu kuzoka ni iá a tungu bhu Temane; mbata ni kidi kiene, o jindenge mu kilunga ja-nda kua kà a sunga-sunga; kuma ni kidi muene, mabhata mâ ua kà ma senguluila ku thandu diâ.

²¹ O mu kulundumuka kuê, o kibazu kiê, ngongo ia tunguta; o mutendu uê katé ni ku Kalunga ka Kusuka a uivu o kinuminu.

²² Tala-phe, ua kà banda kala holokoko, u tuka, uoleka mabhabha mê ku thandu dia Bozola; o muẋima ua mazonda ma Idomo, mu kizuuʼokio, ua kèla kala muẋima ua muhetu uala bhu mika ia kuvuala.

Jelemiia u zambula ima ia tokala Damasku

²³ Bhu kaxi ni Damasku. Ni Hamate ni Alapade sonhi ja a kuata; o kievu njimbu ja ibha, mueza kuambuka; ku musanza ua kalunga kuala phaxi; kutululuka ki ku moneka.

²⁴ Damasku ua iokojoka; ue te-ku dikunda phala kulenga, kiteketela kia mu kuata; kimbuua ni misusu ia mu tambula mukutu uoso kala muhatu ua mu vuala.

²⁵ Mbonge ia fumana, mbonge ia ditonokenu diami, kiki a i ehelela ku i ehelela kuahi ngó!?

²⁶ Kala kiki, minzangala iê ia mala ia kà tembujukila mu nzunga; o makuenze oso a ita mu kizuuʼokio a kà jikinina, kiene kia tange Jihova dia Ifuẋi

²⁷ Anga nga kà uika túbhia mu lumbu lua Damasku, tuene hé tua kà jikatesa mazemba oso a Bene-Hadade.

²⁸ Kialulukila Kedale ni kia bilukila mautuminu ma Hazole, a buikisa Nabukodonozolo, sobha ia Babilonha, Jihova uambe kiki: Balumukenu mu bande mu kuzoka ni Kedale; ana oso a tokala ku Thunda buikisenu na-u.

²⁹ Jibalaka jâ a ka a bhunda-ju ni ibhaku iâ, ni jikolotina jâ, ni ingolongondo iâ ioso, ni jikamelu jâ a kà jʼambata phala ene; hé a ká a kolela, exi: ku mbandu joso kuala uoma!

³⁰ Ndokuenu, lengenu, sandukenu dikanga, mu tunge mua zongo, enu mua tunga bhu Hazole, kiene kiambe Jihova, mukonda Nabukodonozolo, sobha ia Babilonha, ua mi te kikutu kia ufe, iú ua xinganeka ku mi bhanga phulu.

³¹ Balumukenu mu bande mu kúlua ni muiji ua tululuka, ua tunga ua soma Jihova ua ki tange, muiji ki u moneka mabhitu mba makumba, kuma ene a tunguʼâ ngó.

³² O jikamelu jâ ja-nda ku kala mbole, o ndumba ia ibhaku iâ, ia-nda ku kituka ngó ima ia kubhunda; anga ngi muangena ku itembu ioso, ió oso a a bhutu o jindemba bhu jihota jâ, o ku mbandu joso nga-nda ku a bhekela kibuika, Jihova ua ki tange.

³³ Bheneʼobho, Hazole ua-nda ku kituka tungilu dia midikixi, ngùndu i nangenena; ki bhua kà kala u tunga-mu mba monʼa muthu u bhanga-mu dibhata.

Jelemiia u zambula ima ia tokala akua Elame

³⁴ O kizuelu kia Jihova, kieza kua Jelemiia, polofeta, ku mbandu ia Elame, mu dimatekenu dia utuminu ua Zedekiia, sobha ia Juda, kiexi:

³⁵ Jihova dia Ifuẋi uambe kiki: Tala, hádia mufula ua Elame nga-nda ku u bukula, o mufula ua nguzu iê kiá muene.

³⁶ Hé ngi bheka kua Elame o itembu i uana ia thungi ji uana ja diulu, ene anga ngʼa uanena kua tungu o itembu iuana ienhiʼii; ki bhua kà kala ixi mu kamba kuiza jingômbo ja lenge ku Elame.

³⁷ Hádia ngi bhangesa Elame ku kala ni uoma bhu pholo ia jinguma jê, ni bhu pholo ia oso a bhindamena ku mu jibha; nga-nda ku bheka hadi ku thandu diâ, ni kutema kua njinda iami, eme ngi Jihova, nganda kutumikisa xibhata iia ni ku a kaiela katé ki i zubha ku a jimisa o mbutu.

³⁸ Anga kiandu kiami ngi ki ta mu Elame; ni sobha ni ilamba iê ngʼa sengulula-mu, ka kala-mu dingi, Jihova ua ki tange.

³⁹ Kia kà kala phe kiki, kuila mu kizuua kia kà sukidila-ku, kiene ki nga kà bhangesa ku vutuka jihutile ja Elame, Jihova ua ki tange.