Jelemiia 48 - O Mikanda Ikola

Jelemiia u zambula ima ia-nda bhita ni Mouabhe

¹ Mu kulungulukila Mouabhe, Jihova dia Ifuẋi, Nzambi ia Izalaiele, uambe kiki: Nebu, kokolo diê, kuma a mu sengulula; Kidiataimi, sonhi ja mu kuata, kuma a mu tolola kiá; Miska sonhi ja mu kuata, ua bhuuama.

² Matunda a Mouabhe kala-ku dingi; mukonda mu Hexebone a mu xinganeka kiaiibha, exi: Zenu kunu, tu mu vuze muene phala ka kale dingi Kifuẋi kia kima; ni eie ue Madimene a-nda ku ku vuza; o xibhata ia-nda kuia ni ku ku kaiela.

³ Dízui dia ku dikola kua Holonaime: Kua muʼiza kibuika ni kusenguluka kua dikota!

⁴ Mouabhe a mu sengulula kiá; tuana tuê a tuivu nzongo ja kudikola.

⁵ Kuma ene ia aiʼó ni kudila kua kiiokoioko bhu kalundu ka Luhiti; mbata bhu dikulumukinu dia Holonaime, o jinguma ja Mouabhe evila-bhu mikemu ni kudikola.

⁶ Exi: Lengenu, bhululenu o muenhu uenu, muile kala muẋi ua mutamálaka mu ixi ia kisekele.

⁷ Mbata, mukonda dia kudielela ku uala-na-ku ku ima ié i uene kubhanga ni jimbongo ji uala na-ju, eie ue a-nda ku ku tolola; o Kamu ua-nda kutu-nda, uia ku ubhika kumoxi ni jinganga jê ni ilamba iê.

⁸ Mbata mukua kumuanga ua-nda kuiza ku mbonge joso ki bhu kala imoxi ngó i subhuka; o dikolo ue dia-nda kujimuka; o kiphenza kia-nda kusenguluka kuma Jihova ua ki tange.

⁹ Mouabhe mu bhanienu mabhabha kuma kia tuka, ua-nda ku tundʼé, o jimbonge jê ja-nda kukituka jíngundu, ki mua-nda kumoneka muthu u tunga-mu dingi.

¹⁰ Lamba dia ió uoso u bhanga o kikalakalu dia Jihova ni mangonha; lamba dia ió ue uoso u bhaka o xibhata iê ku manhinga.

¹¹ Mouabhe uene ni kunhoha kuê tundé mu undenge uê, o mavunze mê ma tula muene bhu hole; ka mu lunduluila kitabhu nʼeze kitabhu, mba uia ku ubhika; kiene kia mu bhangesa kuila o utoualelu uê uene hanji umoxi, uʼòlunde, ni dizumba diê ki di tumbuluka luua.

¹² Kala kiki, izuua i iza, Jihova ua ki tange, i nga-nda ku mu tumikisa alunduludi, a-nda ku mu tukisa mazalu, anga o ithabhu iê a i lundulula o isudi iê a i bula.

¹³ Kieneʼokio-phe Mouabhe ua kà kala ni jisonhi ja Kamu, mukuá ni Izalaiele ki ala ni jisonhi ja Betele, ua mu mexile kidielelu kiê.

¹⁴ Mua-nda ku kiʼamba kiebhi, muexi: Tu mazonda, tu malʼa nguzu mu ita?

¹⁵ Mouabhe a mu sengulula kiá, ua tundu mu jimbonge jê ni kubanda, o minzangala iê ia mala ia solele, ia kulumuka mu kijibha, Sobha ua ki tange, o dijina diê Jihova dia Ilombo Ieta.

¹⁶ Kujimbila kua Mouabhe kueza kiá, o hadi iê ia lenguluka kuiza; o hadi iê iza muene lusolo.

¹⁷ Mu kuatedienu henda, enuʼenu oso mua mu kala mu jimbandu jê, enuʼenu oso mua muʼijiia o dijina; zuelenu-kiu, muexi: o mbangala ia kolo, dikoue dia iuka kinéne, dia bukuka kiebhi?

¹⁸ Eie u muhatu ua tungu, u monʼa Dibone, ku fuma ié tuluka-ku, u xikame bhoxi dia kukuta; mukonda ió ua sengulula Mouabhe, ua bande, ueza kokué, imbaka, iéʼeie, ua i sengulula kiá.

¹⁹ Di te-ze mu njila u zongole, éʼmonʼa muhetu ua tungu bhu Alouele; uoso ua muia ni lusolo, muʼibhule; o ió ua bhulaka, u muʼila: Kia bhiti kiebhi?

²⁰ Mouabhe sonhi ja mu kuata kuma a mu (tatesa) tohola; dikodienu mu dile kala imbungu; tulenu-kiu hundu mu Anone, muixi: Mouabhe a mu sengulula.

²¹ O kiki difundisilu dieza ue ku ixi ia kiphenza, kua Holone, ni kua Jaza ni kua Mefate,

²² ni kua Dibone, ni kua Nebu, ni kua Bete-Dibalataime,

²³ ni ku Kidiataimi, ni kua Bete-Kamulu, ni kua Bete-Meone,

²⁴ ni kua Kidiote, ni kua Bozola; katé ni ku jimbonge joso ja ixi ia Mouabhe, kixi jala makanga, uixi jala bhua butu.

²⁵ Nguzu ia Mouabhe iòbatule, lukuaku luê a lu batula, Jihova ua ki tange.

²⁶ Mu kodiuisienu, mukonda ua di zangeleka mu kuzoka ni Jihova; Mouabhe ua-nda kua kà di dimbula mu ima iê ia lusu muene; ua kà kituka kima kia kasekelu.

²⁷ Mukonda eie ue Izalaiele ku mu bhanga jinga kasekelu? Manhi a mu sange mu kaxi ka miii? Phalaʼhi-phe ua mu kuila ki uiza mu ku mu zuela uolela?

²⁸ Jimbonge xé-nu-ju mu tunge mu matadi, enu muà tunga bhu Mouabhe; muile kala diembe ki di tunga o kikalanga kiê ku nzènde ia dikenhe.

²⁹ Ku di zangeleka kua Mouabhe tuevu ku ku zuela, ni kidi kiene, muene ua di zangeleka kinéne muene; ni izala iê ni ukumbu uê, ni ku di tudika kuê ni bhu ditala bhuoso bhuala o muẋima uê.

³⁰ Jihova uixi: Eme ngʼejiia muene o kuthathamana kué, maji ki kimʼé luua; o makutu mê ka-nda kubhanga kima.

³¹ Kienhiki nga-nda kukema mukonda dia Mouabhe; xi, ngi dikola muene mukonda dia Mouabhe dioso; mbata akua Kidi-Helese a kà dila jingololo.

³² Eie-phe nga-nda ku ku dila ni udidilu ua Jahezale, eie u muẋi ua muvide mu Sibama; jithangu jé ja bhiti musanza ua kalunga jí ja bhixila katé ku musanza ua Jahezele; maji o mubuikixi ua laukila ku ibundu iê ia kudinji ni ku dibhongoluelu dié.

³³ Mu mukáu ua mbote ua uabha ku kuna idima ni mu ixi ia Mouabhe, o kutonoka ni kusanguluka a ku katula-mu kuma nga bhangesa vinhu kúbhua mu makamenu; jiúva ka-nda ku ji kama dingi ni kutana; o kutana ue kuene ki kua-ndu kala dingi kutana.

³⁴ O ku dikola kua Hexebone a kuʼivu katé ku Eleale ni ku Jahaze, tundé mu Zouale katé mu Holonaime mbimbi iê ia kudikola a ivu, iedi muene kala mona ua ngombe ua mivu itatu; mukonda katé ni menha ma Nidimi a kà kituka dibuikilu.

³⁵ Anga ngi bhangesa kuila mu Mouabhe, oso a bhakuila jinzambi jâ ni ku jiʼohela uasu ua dizumba bhu ididi ia dileka, a jimukamu, Jihova ua ki tange.

³⁶ Kienhiki ki bhangesa kuila o muẋima uami u dʼitaia kala mbèndu, mukonda dia akua Kidi-Helese; mbata nzungule ioso ia bhongoluele ia di boto.

³⁷ Mukonda mítue ioso ia kà kituka mabhaia, o miezu ioso ia kà bhueka; majuʼoso a kʼezala iẋenge, o bhu inhonga a kà di kumba jisaku.

³⁸ Bhu thala dia jinzu joso ja Mouabhe ni mu jinzunga mua kà kala kibulukutu kia dilamba kua ene oso; mukonda Mouabhe nga mu bulu kala kitutu kia kambe kuiuka, eme ngi Jihova.

³⁹ Ua budijika, tata! Ku kumba kuahi! Mouabhe ua lunguluka dikunda, sonhi jahi ngó ja mu kuata! Kienhiki Mouabhe ua-nda ku kituka kima kia lusebu ni kimbuua kua iò oso a mu kala mu jimbandu.

⁴⁰ Mukonda Jihova uambe kiki: Tala, Muene ua-nda kubhita bhulu kala holokoko, anga uʼoleka mabhabha mê ku thandu dia Mouabhe.

⁴¹ Jimbânza a ji tambula, o jimbonge a ji bhundu, bhu kumbiʼ-ʼodio o muẋima ua mazonda ma Mouabhe, ua kà di bhanga kala o muẋima ua muhetu kia kala bhu mika ia kuvuala.

⁴² Mouabhe-phe a-nda ku mu sengulula mbé ka kale dingi kifuẋi; mukonda ua di zangeleka mu kuzoka ni Jihova.

⁴³ Ni uoma, ni dikungu, ni dibhebhe, iá eza ku thandu dié eie ua tunga bhu Mouabhe, Jihova ua ki tange.

⁴⁴ Uoso u lenga ku uoma, ua kà di bhala mu dikungu; o ió u tunda mu dikungu, ua kà fua bhu dibhebhe; mukonda nga-nda kubheka ku thandu dié, ku thandu dia Mouabhe, o muvu uê ua ku mu zungila, Jihova ua ki tange.

⁴⁵ A kexile mu kulenga, nguzu jabhu ia a sukamena mu kilembeketa kia Hexebone; maji túbhia tua tundu mu Hexebone, ni mulengu mu kaxi ka Sihone, ua jikinisa thungi ja Mouabhe ni nguzu ia iiala ia bhumu.

⁴⁶ Eie Mouabhe, kokolo dié! Kifuẋi kia Kamu kia jimi! Mukonda anʼê a mala ala jihutile, anʼê a ahatu ala ku ubhika.

⁴⁷ Maji kua kà suka izuua, kikexilu kia Mouabhe nga kà ki lungulula, jihutile jê ja kà vutuka dingi, mu kizuua kia sukidila, Jihova ua ki tange katé bhabha bhene bhua suku o difundisilu dia Mouabhe.