Jelemiia 25 - O Mikanda Ikola

O makuinhi sambuadi a mivu ia uhutile

¹ O kizuelu kieza kua Jelemiia ku mbandu ia kifuxi kioso kia Juda ku muvu ua kauana ua Nzuakí, monʼa Joziia, sobha ia Juda (uene-phe muvu ua dianga ua Nabukodonozolo, sobha ia Babilonha).

² Jelemiia, polofeta, anga u ki tangela kifuxi kioso kia Juda ni kua ene oso a tungu mu Jeluzaleme, kuila:

³ Tundé mu muvu ua katatu ua Joziia, monʼa Amone, sobha ia Juda katé mu kizuuʼiki kizuelu kia Jihova kieza kokuami, nga di meneka ni kuzuela eme nga mi tangela-kiu enu, maji enu mua ditunu kuívua.

⁴ Jihova ue ua mi tumikisa abhikʼé oso, jipolofeta, u di meneka mu ku a tumikisa, (maji enu nguenu kuívua, ni ngó ku bheteka mátui menu phala kuívia).

⁵ Kia tange, kuila: Dielenu, muthu ku njila iê ia ibha ni mu ku ibha kua ibhangelu iê, nda mu tunge mu ixi ia mi bhana Jihova, enu ni jitata jenu, tundé mʼukulu ni ku hádia ni hádia.

⁶ Ki mu kaiele jinzambi ja ngene phala ku ji bhikila ni ku ji bheza, kana ue ku ngi thathamesa ni ikalakalu ia maku menu, phala ki ngi mi bhange kia ibha.

⁷ Maji né kienhokio-phe, enu ki mua ngi bhana mátui, Jihova ua ki tange, inda mua ngi thathamesa muene ni ikalakalu ia maku menu phala ku mi bhanga ngoho kia ibha enuʼenu muene.

⁸ Kala kiki, Jihova dia Ifuẋi uambe kiki: Kuma enu mua ditunu kuívua maka mami,

⁹ nga-nda ku tuma kutakana miji ioso iala kusuku, eme Jihova, ni mubhikʼami Nabukodonozolo ue, sobha ia Babilonha, anga ngʼa bheka mu ixi ienhiʼii ni ku thandu dia oso a tungu-mu ni ku thandu dia miji ioso mu jimbandu, anga nga kà a jimisa mbutu muene xatababá; nga-nda ku a bilula a kituka kisunji; a di bhanga supiia, a kala jingundu ji nangenena.

¹⁰ O nzongo ia kutonoka, ni nzongo ia kusanguluka ni nzongo ia mabhanga, ni kilungutu kia matadi a ku huhila ni mukengeji ua kandeia, nga-nda ku i fuisa-mu, mu kaxi kâ.

¹¹ O ixi ioso iii ia kà di bhanga kikangalakata i kituka kima ki bheka uoma; anga o miji iii ia kà bhikila sobha ia Babilonha mu makuinhi sambuadi a mivu.

¹² Kia kà bhita-phe kiki: kuila makuinhi sambuadi a mivu a tenena kiá, sobha ia Babilonha ni muiji uenhú, nga kà a zungila, Jihova ua ki tange, kikuma kiê ni kia ixi ia akua Kaldeia, ngi ki bhana kaxtiku, nga-nda kua kà a kitula jingundu ji xalelà-ku.

¹³ Izuelu iami ioso i nga tange mu kuzoka nʼoxi iii nga kà i bheka ku thandu dia ixi ienhiʼii muene, ima iosololo iòsoneke mu divulu didi, ia zambula polofeta Jelemiia ku thandu dia miji ioso ienhiʼii.

¹⁴ Mukonda ene uâ a-nda ku di uanena na-u kuala miji ia vulu ni sobha ja makota; kienhiki-phe nga-nda ku a vutuila kala ima iâ ia bhanga jinga ni kioso kiala ikalakalu ia maku mâ.

O nganza ia njinda ia Nzambi ku thandu dia akua jixi

¹⁵ Kuma Jihova, o Nzambi ia Izalaiele, ua ngi tangela kiki: Tambula nganza iii, ia vinhu ia njinda iami nda miji ioso, kuoso ku ngi ku tumukisa, u a bhane kunua-ku.

¹⁶ Phala a nue, nʼa tekete, a saluke mukonda dia xibhata i nga-nda ku tumikisa mu kaxi kâ.

¹⁷ Anga ngi tambula kopho bhu lukuaku lua Jihova, eme nga nuisa o miji ioso kua ngi tumikixine Jihova:

¹⁸ Kua Jeluzaleme ni mabhata ma Juda, ni jisobha jâ ni ilamba iâ phala, ku a kitula jingundu, a di bhanga kisunji ki kuatesa uoma, ela kala muixi, a kituka kuxixima kala ki kia di monekena lelu;

¹⁹ ni kua Falaó, sobha ia Ijitu, ni ku abhikʼê, ni ku ilamba iê, ni ku kifuxi kiê kioso;

²⁰ ni ku athu oso a di fungisa ngó kumoxi, ni ku jisobha joso ja ixi ia Uze, ni ku jisobha joso ja ixi ia akua Fidíxia, ni Axikilone, ni Ngaza, ni Ekolone, ni iá a subhuka ku Ajindode,

²¹ ni kua Idomo, ni kua Mouabhe ni ku anʼa Amone;

²² ni ku jisobha joso ja Tilu, ni ku jisobha joso ja Sidone ni ku jisobha ja ikolo ku sámbua dia musanza ua kalunga;

²³ ni ku Dedane, ni ku Tema, ni ku Buze ni kua ene oso kiá a tungu ku jihota ja suku-ku jaʼxi.

²⁴ Ni ku jisobha joso ja Alábia, ni ku jisobha joso ja mbutu joso ja athu ja di bundu kumoxi ja tunga mu kikangalakata;

²⁵ ni ku jisobha joso ja Nzidi, ni ku jisobha joso ja Elame, ni ku jisobha joso ja Mediia,

²⁶ ni ku jisobha joso ja ku Suku, ni kua iá ala bhua butu, ni kua iá ala dikanga, ku tunda iú kuiza iú, ni ku mautuminu oso ala mu ngongo Kulu-dia-mundu; o sobha ia Sezake muene kiá u sukidilaku mu kúnua.

²⁷ Mbata eie ua kà a tangela, kuila: Kienhiki kiambe Jihova dia Ifuẋi, Nzambi ia Izalaiele: Nuenu, mu kodiue, mu di lusile, mu dibhale bhoxi, mu lémbue ku balumuka-bhu, mukonda dia xibhata i nga-nda ku mi tumikisa eme.

²⁸ Kia kà kala-phe kiki: kuila se a di tunu kutambula o nganza bhu lukuaku lué phala kúnua, eie-phe ua kà a tangela, uixi: Jihova dia Ifuẋi uambe kiki: kala mu i nua muene.

²⁹ Talesenu hanji kuma mu mbonge ia luku dijina diami, muene mu ngʼandekela kubhana njumbu; kifua enu mu subhukenu? Kana, ki mu tena ku subhuka, mbata eme nga-nda kuixana xibhata ku thandu dia oso a tungu mu ngongo, Jihova dia Ifuẋi ua ki tange.

³⁰ Eie-phe ua kà a zambuila mu upolofeta maka mosoʼama, anga ua tangela, uixi: Tundé ku madimbinza, Jihova ua kà hunza, ua kà bhangesa kuila mbimbi iê a ivua tundé mu dibhata diê di kola; dibhata diê ua kà di hunzila mu kuzoka ni oso a tungu mu ngongo, kala kia ió a mu ta nzôngo ia kusanguluka mu kuvuka jiuva.

³¹ Kinuminu kia kà bhixila katé kua sukuʼoxi, mukonda Jihova ua kuata mvunda ni akua jixi, xitu ioso ua kà funda na-iu; athu a ibha ua kà a bhakula ku xibhata, kiene kiambe Jihova.

³² Jihova dia Ilombo Ieta iú uambe kiki: Tala, kuxixima kua-nda kutunda mu ixi ni ku bokona mu ixi ia mukuá, anga ku a kà fundumuka dilamba dia dikota ku maẋokololo ma jixi.

³³ Oso a kà a bhakula ku kalunga kuala Jihova kizuuʼokio, a kà dizala muene tundé kuʼandekela ixi katé ku ia suku; ka-nda ku a tela nzôngo ia kudila, mba ku a bhongolola, mba ku a funda; maji a kà di bhanga kala ditobe ku thanduʼa mavu mu ngongo.

³⁴ Enu mu tubhila, dilenu, mu te nzôngo, kundumukenu mu utôka, enu mua adiakime a kilunga, mbata izuua ienu ia tenena kiá ia ku mi jibha; eme-phe nga-nda ku mi botomona, enu anga mu dibhala kala kitutu kia makembu.

³⁵ Abidi kà ka kala ni dilengelu diâ, mba kubhuluka kua makota ma kilunga.

³⁶ Ívua ku dikola kua tubhila ni ku kumba kua makota ma kilunga! Kuma Jihova ua jikinisa o sabhelela ia kúdia kuâ.

³⁷ Mbata ilunga iâ ia uembu a-nda ku i sengulula mukonda dia kutema kua njinda ia Jihova;

³⁸ mu fundu iê ua tundu-mu kala monʼa hoji; kuma ixi iâ a i kitula jingundu mukonda dia njinda ia nguma, ni mukonda dia kusuina kua njinda ia Jihova.