Jelemiia 17 - O Mikanda Ikola

O Kituxi Kia Juda ni Kaxtiku kê

¹ O kituxi kia Juda kiòʼsoneke ni songo ia felu, iala ni sungu ia diiamande, kiòʼsete ku dibaia dia muẋima uâ, ni ku jimbinga ja jithungi ja kalatódio jâ.

² Ni anʼâ ue kia banza o jikalatódio jâ, ni mixitu iâ ni miẋi ia uisu, iala bhu thala dia tulundu.

³ Eʼ mulundu uami uene mu mukáu! o mvuama ué ni mabhakelu mé moso nganda ku a bhakula ku mbole, katé ni matala mé maia ue, mukonda dia kituxi, mu jimbambe jé joso.

⁴ Eʼ muenhé-phe ua di bhange-kiu, eie ua-nda ku di kakula ubhinganu ué, u nga ku bhele, anga ngi ku bhangesa ku bhikila o jinguma jé, mu ixi kua ijiia; kuma o túbhia tu ua bambula ku njinda iami tuà uamena-ku muene katé ku hádia ni hádia.

⁵ Jihova uambe kiki: Ua xixima o muthu u dielela ku muthu, hé o xitu iene mu kúfua u i kita luene o lukuaku luê, anga o muẋima uê u u katula kua Jihova.

⁶ Kuma ua-nda kukala mukuâ ni muixi ua mutamálaka mu ixi ia kisekele, kiza o mbote ka kʼijiia; kale u tunga mu ididi ia kukuta ia kikangalakata, mu ixi ia môngua, mua bhingi kana muthu u tunga-mu.

⁷ Muthu uoso-phe u dielela kua Jihova, muene ua zediua, uedi o kudielela kuê Jihova muene.

⁸ Kuma muene ua kà kala mukuâ ni muixi uó-phaphe ku mbanduʼa ngiji, u tanda jindanji jê katé ku menha, kiza muzukuta ka kala ni hele ia munza, maji o dífue diê di buingita, o bhu muvu ua kiangala, ki u tate, mba u kamba kuima kibundu.

⁹ O muẋima ua muthu u bhomba kinéne, ima ioso ndenge, ua bhukumuka kiavulu: mukuahi u tena ku uijiia?

¹⁰ Eme ngi Jihova eme ngi solokota o muẋima, eme ngi tungula o ilunji; ngi ki bhangela-phe kumona o futu ia tokala kubhana kala muthu kia fuama ku mauendelu mê, ni kia fuama ku ibundu ia ibhangelu iê.

¹¹ Mukua ni nguadi uongeka maiaki, sè ku ma langela; kiene ue ki kala o muthu u bhongolola jimbongo, ja tambula ngó kioso-kioso; o kia bhixila mu kaxi ka izuua iê u ji xa, o ku dizubhilu diê u kituka kioua.

¹² O kiandu kia fuma, kiòtule ditala dia di leka kiambote tundé ku dimatekenu, kiene o kididi kietu kia dibhezelu.

¹³ Jihova tata, kidielelu kia Izalaiele! Oso a kuxa eie, hinu sonhi ja kà a kuata; oso a ngi sondoloka eme, hinu a-nda ku a soneka o majina ku mavu bhoxi; mbata Jihova a mu xisa, muene Otho ia menha ma muenhu.

¹⁴ Ngʼilule, Jihova, phala ngʼiluke: ngi bhulule, phala ngi bhuluke; mbata eie u diximanu diami.

¹⁵ Talesa-ze ene ala ku ngʼila, exi: Kizuelu kia Jihova ki kuebhi? Kize-phe kindala.

¹⁶ Maji eme ki nga lenguluka kukala ngi kafunga kuema dié; mba ngó kuila ue nginda kizuua kia hadi, eie-muène ua kʼijiia; kioso kia tundu ku mizumbu iamiʼuku kikié bhu pholo ié.

¹⁷ Ku ngi diuanese; eie u dilengelu diami bhu kizuua kia divuua.

¹⁸ Sonhi ji kuate oso ala ku ngi langata, ki ji ngi kuate-ku eme; a bhuuame ene, ki ngi bhuuameku eme; a bhekele kizuua kia divuua ku thandu diâ nda u a buikise ni kibuika kia luiadi.

O ku kolesa kizuua kia sabhalu

¹⁹ Jihova ua ngʼambela kiki, uixi: Katuka ua kèmane bhu muelu ua ana a mundu, bhuene kubokuena jisobha ja Juda, bhuene ue kutundila; ni bhu mielu ioso ia Jeluzaleme.

²⁰ U a tangela: Ivenu kizuelu kia Jihova, enu mu jingana mu Juda, nʼeie u Juda iosololo, ni enu oso mua tunga mu Jeluzaleme, oso muene ku bokuena bhu mielu iii.

²¹ Jihova uambe kiki: Langenu o mienhu ienu, kana ku-ambata kimbamba mu kizuua kia Sabhalu, né ngó ku i bokuesa bhu mielu iii ia Jeluzaleme.

²² Kana ue kutunda ni imbamba mu jinzu jenu mu kizuua kia Sabhalu, né kuila mu bhanga kima kioso-kioso: Hé kima kolesenu kizuua kia Sabhalu, kala eme ki nga lekelela o jitata jenu.

²³ Maji ene-phe nguâ kuivua, né ngó kutekela mátui; o kiala-bhu, a hinanesa o jixingu jâ, a lengesa o kuívua, mbé a lembue kutambula o mulongi ua ku a bazela.

²⁴ Jihova uambe uixi: Kia-nda kubhita-phe kiki, se mu ta-bhu makidikidi mu kubhangela ku ngʼivua eme, hé mu fula ku bokuesa imbamba mu mbonge, bhu mielu iii, mu kizuua kia Sabhalu, anga mu kolesa o kizuua kia Sabhalu, ni ku kamba kubhanga-mu kikalakalu kioso-kioso,

²⁵ Kuabhu-phe, bhu mielu iii ia mbonge, hinu bhu kala mu bokuena jisobha ni anʼa jingana, a tulama bhu kiandu kia Davidi, endela mu makalu ni ku jimonde, ni ene ni adiakimeʼâ, o mala a Juda ni akua bhata mu Jeluzaleme: O mbonge iii-phe, i tunga muene i soma mu thembu joso.

²⁶ Ku jimbonge-phe ja Juda, ni ku maxilu ma Jeluzaleme, ni kʼoxi ia Bejamí, ni ku manhana ni ku mitunda, ni ku Sulu, kua-nda ku tunda athu, a bheka mibhaku ia kuoha ni jisata, ni mibhaku ia makudia, ni uasu ua dizumba, ni kubheka ue, kiòmuene, o sata ia diximanu monzo ia Jihova.

²⁷ Maji o ki mu fula ku ngi bhana o mátui, phala ni mu kolesa o kizuua kia Sabhalu, mbé mu fule o kubheka kimbamba kioso-kioso, mu ku bokona bhu mielu ia Jeluzaleme mu kizuua kia Sabhalu, bhenhobho-phe eme nga-nda ku bambula túbhia ku mabhitu mê, anga tu buikisa mazemba ma Jeluzaleme, o tuenhutu ki tua kà jima dingi.