Jelemiia 11 - O Mikanda Ikola

Kikutu kiò jingunune

¹ O kizuelu kieza kua Jelemiia, kia tundu kua Jihova, kixi:

² Ivenu maka ma kikutu kiki, mu ambele athu akua Juda, ni akua bhata mu Jeluzaleme.

³ A tangele-phe: Jihova, O Nzambi ia Izalaiele, uambe kiki: Uoso u kamba kuívua o maka ma kikutu kiki, mukua mázui,

⁴ kikutu ki nga tendelela o jitata jenu mu kizuua ki nga a katula mʼoxi ia Ijitu, mu kidijiku kia felu; ngixi: Bhanenu mátui ku dízui diami, muende ni kubhanga kioso ki ngi mi tuma; enu-phe mua-nda ku ngi kala mu mundu uami, eme ue nga-nda ku mi kala ngi Nzambi ienu:

⁵ bhenhobho-phe nʼeme bhene bhu nga-nda ku di ẋikinina o ku kumbidila muloko u nga lokele, ku jitata jenu kuila hinu ngʼa bhana oxi i zunzumuka lete ni uiki, kala ki mua mu ki mona leluʼidi. Eme bhenhobho nga kumbulula, ngixi: Èué, Jihova tata!

⁶ Jihova anga u ngambela: Boka maka mene mosʼuama mu madiembu ma Juda, ni mu jinzunga ja Jeluzaleme, uixi: Ivenu maka ma kikutu kiki, muende ni ku ma bhanga.

⁷ Mbata nga lokele kinéne ku jitata jenu, mu kizuua ki nga a katuile mʼoxi ia Ijitu, katé mu kizuua kia lelu, nga kuata o ku di meneka ni ku loka, ngixi: Bhanenu matui ku dízui diami.

⁸ Maji ene-phe kuívua kana, mba ngó kuila azendeleka matui mâ, maji a di texila muthu ni muthu kuoso kua mu tumu o muẋima uê ua kubhuma: Kienhiki-phe nga a bhekela ku thandu diâ o maka moso ma kikutu kienhiki, ki nga a tumu kualuka, maji ene-phe ka ki aiuka.

⁹ Jihova ua ngambela luamukuá: Sai kikutu kia usuéia muʼaxaxi ka akua Juda, ni mu akua bhata mu Jeluzaleme.

¹⁰ A vutukila ku uséia ua jitata jâ, athu a di tunine kuivua o maka mami; ia a kaiela o jinzambi jengi phala ku ji bhikila: Dibhata dia Izalaiele ni dibhata dia Juda, kikutu kiami a ki selula, ki nga tele ni jitata jâ.

¹¹ Uila kiki Jihova uambe, uixi: talesa, nga-nda ku a bhekela divuua ku thandu diâ, o dienhidi ka-nda kutena ku di bhulaka, a-nda ku dikola kokuami, eme-phe ki nga-nda kua evua.

¹² Bhenhobho ni madiembu ma Juda, ni akua bhata mu Jeluzaleme, a kà-ia mu ku di tenda ku jinzambi johela jinga o uasu ua dizumba; jene-phe ki ja-nda kutena, né ngó, o ku a kudila bhu kithangana kia divuua diâ.

¹³ Mukonda kala kia soko o dialuilu dia jinzambi jé, eie Juda, kiene kia soko o jinzambi jé! O kia soko ue o dialuilu dia jinzunga joso ja Jeluzaleme, kiene ue ki ua tungila jikalatódio ku ima ia jisonhi, o jikalatódio ja kuohela uasu ua dizumba kua Bale.

¹⁴ Eie-phe, mundu iú kana ku u sambela, kana ku a tela nzongo ia kudila mba musambu; mbata mu kithangana kia ku dikola kokuʼami ki nga kà evua mukonda dia kuiibha kuâ.

¹⁵ Kima kiahi kazola kami, kiʼu bhanga mʼonzo iami, mukonda avulu ala ku tela-mu isunji ia makota, o jixitu jʼòkolese a ji bhitisila kuengi? Eie-phe ua mu kuila kioso ki u bhanga kiaiibha, uenda ni kutumbujuka dingi ni ngalasa.

¹⁶ Jihova ua ku luku u mudiva ua uisu, ua uabha, mukua ku bhana ibundu iambote; o kiki-phe, ua tumu dízui diná dia kibulukutu kia dikota, dia mu uikila túbhia mu jimbandu, o jithangu jê ja bukujuka.

¹⁷ Mbata Jihova dia Ilombo leta, ua ku phaphe, muene ua ku xindila divuua, mukonda dia usuéia ua bhange o dibhata dia Izalaiele ni ua dibhata dia Juda, dia di bhangela ene, a ngi lokalala o njinda iami, mu kuohela uasu ua dizumba kua Bale.

Jelemiia a mu ta kikutu kia ufe

¹⁸ Jihova ua ngi ijidisa-kiu, eme nga kijiia kiua; Eie-phe ua ngʼijidisa o ibhangelu iâ.

¹⁹ Eme-phe ngedile kala kambudi ka belesela, kaia bhu dijibhilu; mbata ki nga kʼijidile kuamba ala ku ngi ta kikutu, exi: Tu jikinisienu o muxi ni ibundu iê; tu mu batudienu mʼoxi ia athu a muenhu, phala ki bhu kale dingi kulembalala o dijina diê.

²⁰ Maji Jihova dia Uombo Ieta, u Mufundixi Uaiuka, uene kutungula o ilunji ni miẋima, tamanu ngi mona o phonzo ié ku thandu diâ; nga ku bhakuila-phe o milonga iami.

²¹ Uila kiki, Jihova uambe uixi: ku mbandu ia mala mu Anathothe ala ku sota ku ku jibha, exi: Kana ku kuata upolofeta mu dijina dia Jihova, phala kufuile bhu maku metu.

²² Xi, Jihova dia Ilombo Ieta uambe, kiki: Talesa, eme nga-nda ku a bhana njumbu, o minzangala hinu a kà fua ku xibhata, anʼâ a mala ni a ahatu, hinu a kà diua ku nzala.

²³ Ki bhuanda kuxala masubhu, mukonda eme nga-nda ku bheka divuua ku athu akua Anathothe, bhu muvu ua kua ebhula o mulonga.