I Timote 5 - O Mikanda Ikola

O jivelu ni atudi a xikana

¹ Kana kubazela muadiakimi, inda u mu dionda kala tatʼenu. Minzangala ia mala di tume-nâ kala jiphange jé,

² o ikulakaji ia ahatu kala ene a mamʼenu, o ana-ilumba kala ene o jiphange jé ja ahatu, mu kuzela kuoso.

³ O atudi a ahatu, oso ala atudi a kidi, a bhane ujitu.

⁴ Mutudi uoso-phe uala ni anʼê, mba alaula, ene a diange kuidikiza o ubhezelu uâ mu jindandu ku bhata diâ. Kuma mu kubhanga kiki, ene uâ ende ni kufuta ku mbote ia tambula jinga ku jitata jâ ni ku jikuku, mukonda o Nzambi kia mu uabhela kienhiki.

⁵ Muhatu uoso-phe uala mutudi mu kidi, ka moneka thumba ni samba u mu tambula konda, ió o kudielela kuê kua kuata ngó kua Nzambi, kuma u jijila kusamba usuku ni muanha mu kubhinga dikuatekesu kua muène.

⁶ Mutudi uoso-phe ua baluka mù bhanga o jivondadi jê, ió uafu kia nè-mbe ualʼê ku muenhu.

⁷ Eie Timote a tume kubhanga o imʼiii i nga ku tendelela, phala ki bhu kale muthu u a mona kutondala kima.

⁸ Maji muthu-phe kia kamba kutambula konda ia ene a mu tokala, kota-kota dingi o dianda diê-muène, muthu muenhó ua ditunu o kuxikana, ua tûndu mu kuiibha, ió kiluua a xikana uala ndenge.

⁹ Ki u soneka atudi, kana kusoneka muhatu kuila mutudi, se muène kiluua a tenesa makuinhi asamanu a mivu, iú ua sakanene ni diiala diê dimoxi diene ngó.

¹⁰ Muène kikale ue a mu tumbula o ikalakalu iê iambote iene mu kubhanga, se ua sase kiambote ana, se ua zalela jinga asonhi, se ua sukula jinga o inama ia akua Ngana, se ua bindumuna jinga jingadiama, mba o imbamba ioso iambote ua i bhanga jinga ni muanu.

¹¹ Maji ahatu oso-phe kiluua a kuka, eie kana ku a soneka, ditune-nâ; mukonda kioso kia-nda ku a kuata o jihânji jâ, hé a mesena kukazala, a kala ni usudi ua Kristu anga a mu ambudisa.

¹² Mu kubhanga kiki-phe a kala ni kuêla, mukonda aluluka mu kizuelu kiâ kia bhele kua Nzambi.

¹³ Kua di te dingi kuila a di longa usonde, hé a kuata kunhunga ngó inzu ni inzu. O kia beta dingi kuiibha, o kuila ku usonde ene a ta-ku dingi kabódio, a kala itoka, a zuela ima ki ia tokala.

¹⁴ Mukonda dia kiki, nginda-phe atudi oso kiluua a kuka, a sakane, a kale ni ana, ongeke mabhata mâ, phala o nguma jetu ka a bhane bhuma bhua tu tela môndo ni ku tu zuela kiaiibha.

¹⁵ Kuma sai-ku kiá atudi amoxi-mu a jimbila ni kukaiela Satana.

¹⁶ Maji se bhu kala diiala mba muhatu ua xikana, uala ni atudi a mu tokala, muène a a bindumune, phala diialʼodio mba muhatuʼô ka xine kimbamba ku Ngeleja. Mbé o Ngeleja i bindumune oso atudi a kidi kene thumba ni samba, ala ubheka uâ.

¹⁷ Adiakime a tumina ni kukalakala kiambote mu Ngeleja, mu xinganeka kuma a fuama o ujitu uâ u di budika, uoso u mu a bhanga, kota-kota-phe a kalakala mu kuboka o Njimbu Iambote ni kulonga o uendelu uambote mu ukidistá.

¹⁸ Kuma o Mikanda Ikôla iambe, iexi: O ngombe i titidila masa, kana ku i kuta dikanu. O bhua mukuâ, iexi: Mukalakadi kene ku mu imina o nganhu iê.

¹⁹ Kana kuivua muthu uiza mu kutatela muadiakime ua Ngeleja, kikale uiza ni mbangi jiiadi mba jitatu.

²⁰ Oso a ta ituxi, a bazele bhu pholo ia ene oso, phala akuâ a kale ni uôma.

²¹ Nga ku tendelela ku mesu ma Nzambi, ni ma Jezú Kristu, ni ma jianju jangene, kuila mu ioso i u bhanga jinga, ima iii u i kumbidila muene sè hèle mba kubhanga kima ni kathômbo ka muthu.

²² Ku bhange lusolo mu kutula maku ku thanduʼa muthu, phala ku mu lumbila mu kikalakalu kia Ngana. Ku bhange ue kisangela ni athu engi mu ituxi iâ. Di bhake eie-muène ni kuzela.

²³ Kunue jinge menha ma hatu, maji u nua ni tuvinhu mukonda dia mu mala, ni makukata mé mene ku ku kuata.

²⁴ Athu amoxi-moxi-mu, ituxi iâ ia di monekena muene, i lenguluka kutambula kuêla kioso ngó kiluua a i fundisa. Maji o ituxi ia athu amukuâ, i tukuluka ku pholo ku aia.

²⁵ Kiene ue ni ikalakalu iambote, sai-ku imoxi-mu ia di monekena kiá; o ioio ue ia kambe kumoneka, kenʼu tena ku i sueka.