I Tesalonika 5 - O Mikanda Ikola

Kulangidila mukonda dia kuiza kua Ngana

¹ Kuila-phe tu kuata ku jithembu ni ibatu, kianda kua kà bhita o ima ioso iii, enu jiphange, ki mu bhingi ngó muthu ku mi sonekena kima.

² Mukonda enʼuenu mua kijiia kiambote, kuma o Kizuua kia Ngana, hinu kʼiza kala kiza o muiii mu usuku.

³ Bhuala kuila athu: Kuma kua batama, kua tululuka, a kà tukumuka kibuika kiâ kia tula! Kia kà kala ue mukuâ ni muhatu ki mu kuata o mika ia kuvuala, kana bhuma bhua bhitila nʼa lenge.

⁴ Enu-phe, jiphange, ki muala mu ʼavundu kuila Kizuua kia Ngana ki mi tukumuisa kala muii.

⁵ Mbata enu oso muala mu anʼa mukengeji, mu anʼ a muanha. Etu ki tuala tu akua usuku, mba tu akua kitombe.

⁶ Uila kiki, kana kukala ku kilu kala ki bhanga athu amukuâ, maji-phe tu tonienu, tu kale ku mesu azele.

⁷ Kuma oso aia ku kilu, o kilu kʼijiia mu usuku; oso a kodiua, a kodiuila mu usuku.

⁸ Etu-phe tua tokala ku muanha, tu kadienu ku mesu azele. O kivunga-thulu kia ita ki tu zuata, o kuxikana ni henda; o kudielela o kubhuluka, kene o kapasete.

⁹ Kuma Nzambi ka tu solo phala kutambula kaxtiku kokuê, maji ua tu lekelela o kubhuluka kua Ngana ietu Jezú Kristu.

¹⁰ Mukonda Kristu muene ua tu fuidile bhu kididi, phala tu tene kukala ku muenhu kumoxi ni Muène, kixi tu afu kixi tua kolo muenhu hinu Muène kià kʼeza.

¹¹ Uila kiki, di longese jingienu mudienu, ni kudikuatekesa, mu di sokejeke kumoxi, kala ki muene kubhanga jinga kiá katé kindala.

Kutendelela ni kulekela

¹² Tua mi bhingi-phe, jiphange, kuila muijiia jinga enʼió a kalakala mu ʼaxaxe kenu, a mi tela Ngana ku pholo, phala ku mi endesa ni ku mi longa.

¹³ Athu kala ió, mu a xila kiavulu muene, ni ku a edikiza jinga o henda, mukonda dia kukalakala kuâ. Enu uenu, kalenu ku paze mudienu.

¹⁴ Tua mi ambela dingi, jiphange, lembalesenu oso a juuala, imonha a bazedienu, suinisenu oso a toloka miẋima, kuatekesenu oso a bhuila mu kuxikana, athu a lendukidienu ene oso.

¹⁵ Alukenu phala kana muthu a vutule phulu mu phulu. Inda mu jijila jinga kubhanga o mbote, ni ko kuenu mudienu, ni ku athu oso.

¹⁶ Izuua ioso sanguluka jingʼenu;

¹⁷ Sambenu sé kufula;

¹⁸ Sakidilenu Nzambi mu ima ioso; kuma iene o vondadi ia mi kala na-iu muène, mua Kristu Jezú.

¹⁹ Kana kujima o kikalakalu kia Nzumbi Ikôla.

²⁰ Kana kutenda o mizambu ia jipolofeta.

²¹ Tungulenu jinga o ima ioso, phala mu kuate-bhu ioso iauabha,

²² mu lenge jinge ioso i mua mono iaiibha.

²³ O muène Nzambi, mukua ku tu bhana o paze, a mi zelese katé mua zubha; a mi bhake kivimba ni nzumbi ni muenhu, ni mukutu, sé dixaka, mba kuêla kua kima, katé bhua kà tukulukila Ngana ietu Jezú Kristu.

²⁴ Muenʼió ua mʼixana, kuma uala fiiele, kienʼiki u ki kumbidila muene.

²⁵ Phange jetu, tu sambedienu ue etu.

²⁶ Jiphange joso koko a menekenienu ni beju ia ujitu.

²⁷ Nga mi lokesa mu dijina dia Ngana, kuma mukanda iú mu tu tangela o jiphange joso.

²⁸ O kiadi kia Ngana ietu Jezú Kristu ki kale jinge ni enu ku mualʼ oko.