I Tesalonika 2 - O Mikanda Ikola

Kioso ki endele Phaulu ni akua Tesalonika

¹ Enʼuenu, jiphange, muejiia o Ubokuenu uetu mu diembu dienu, kuma ki ua ngoho.

² Muejiia ue kuila kioso kiluua tu bhixila koko ku Tesalonika, tua diangele-phe kutala hadi ni kulebhuka mu Filipe. Luavulu muene a sotele ku tu fudisa, maji etu-phe tu bhua uôma mua Nzambi ietu mu ku mi tangela enu o Njimbu Iambote ia Nzambi ni kubângama kuoso.

³ Kuma o kulonga kuetu ki ku tundu mu kutondala, ki kua ufusa, mba kua makutu mu kusota kunganala muthu uoso-uoso, lémbua.

⁴ Inda tua mu tanga o Maka kala kia mesena Ngana. O Nzambi-phe, kia tu mono ni ufiiele, ua tu lundisa o Njimbu Iambote, phala tu i tange kuoso, kala ki tuene kiá mù zuela; kana mu kuuabhela athu, maji mu kuuabhela Nzambi u tena kulola miẋima ietu.

⁵ Tundietu, kiluua tu kala ni maka ma kuhanza athu, enʼuenu mua kʼ ijiia, kiluua tu kala ni maditatu ma luimbi lua kutambujula itadi. Nzambi mbangi ia ima ienʼiii.

⁶ Kiluua tu sota fuma ia ku tu ximana kuala athu, né ko kuenu enu, né ku athu engi. Sumbala se tuambele ku ki bhanga, tuejù tena ku mi nemena ue, kuma tu jipoxolo ja Kristu.

⁷ Maji-phe, etu ki tua kexile mu ʼaxaxe kenu, tua lendukile mukuâ ni mama ia kiledi, ki âkata o tuana tuê.

⁸ Ni etu ue kiene, mukonda etu tua mi kuatela vondadi iavulu, tuendile tu mi bhana kana ngó o Njimbu Iambote ia Nzambi, maji ni mienhu ietu-èlele iene. Mukonda tua mi zola kiavulu.

⁹ Mu xinganeka, jiphange, o kukalakala kuetu ni hadi i tua tale! Kioso ki tua mi tudila o Njimbu Iambote ia Nzambi, tua kalakala muanha ni usuku phala kana muthu mudienu tu mu nemena.

¹⁰ Enu mu jimbangi, Nzambi ue mbangi, kuma tu athu a ujitu, tu athu aiuka, tu athu ki tu moneka kikuma, mu kuenda kuetu mu ʼaxaxe kenu oso mua xikana.

¹¹ Enʼuenu mua kʼ ijiia kioso ki tua di tumine ni enu oso, kala tata kia di tuma ni anʼê. Tuenda jinga ni ku mi longesa, ni ku mi suinisa, ni ku mi dimuna.

¹² Mbebhu enu phala muende kioso kia fuama kuuabhela Nzambi ua mʼixana kuzuama ku Utuminu uê ni ku fuma iê.

¹³ Mukonda dia kiki ue, tuene mù sakidila jinga Nzambi, sé ngó kufula. Kuma o thembu ia mi sange o Maka metu ma Ukunji koko, maka mene ma Nzambi, enu mua evu, mua a tambulula, kana kuma maka a muthu maji kuma ene o Maka ma Nzambi, mu kidi. Mukonda o Nzambi uala ku mi kalakala moxi dienu oso mua xikana.

¹⁴ Kuma enu, jiphange, o kia mi bhiti enu, kiene kia bhiti ku akua Judeia. Enu mua bokona mù fikisa o Jingeleja ja Nzambi ku Judeia, mua Kristu Jezú. Mukonda mua tale jihadi jene jimoxi, ni ku mi zukutusa ku akua ʼxi ienu, kala ja tale ene ku Jijudé.

¹⁵ Kuma o Jijudé edi ni kujibha Ngana Jezú, ni kujibha o jipolofeta jâ, ni ku tu kaiesa etu. Athu a kamba kuuabhela Nzambi, ia a di bhange jinguma ja mundu uoso.

¹⁶ Etu tuandala tu zuela ni akua jixi jengi, phala a bhuluke, maji ene a tu kidika. Mu kubhanga kiki-phe, hanji a kuata kutenesa o konda ia ituxi iâ iene mù ta. Maji-phe kindala kua a tulukila o njinda ia Nzambi, katé bhu mbambe ku thandu diâ!

O vondadi ia Phaulu ia kuvutukila ku Tesalonika. Ni kusanguluka kuê ki evu o hundu iambote kua Timote

¹⁷ Etu-phe, jiphange, ki tua muangunukʼ okio, mu kithangana kiofele ngó, sumbala mikutu ngó ia muangunuka, miẋima kana—tuendi kiavulu kuila tu mi mona dingi jipholo, mukonda dia ngunzu ia dikota ia tu kuatele.

¹⁸ Mukonda dia kubhindamena ku mi sanga koko, mbé tu di mone dingi, eme Phaulu nga sotele kuia, maji ngi sota ngi tona, Satana-phe ua tu fudisa.

¹⁹ Kuma kudielela kuetu kuahi kuene, mba ngalasa ietu iebhi, mba dibete dioso di tu ta bhu pholo ia Ngana jezú, bhuoso hinu bhua kà tukulukila, manhi ki enʼuenu ngó?

²⁰ Kuma ni kidi kiene, enu muala mu fuma ietu! Enʼuenu mu ngalasa ietu!