I Samuuele 11 - O Mikanda Ikola

Nahaxi, sobha ia akua Amone, ni ita iê

¹ Kioso ki bhua bhiti mbeji, Nahaxi mukua Amone anga uiza u konda Jabezi-Ngiliiade ni kilômbo kiê; mala ma akua Jabezi anga ambela Nahaxi, exi: Tu bangane kioso kia tokala, phala tu ku bhikile.

² Nahaxi mukua Amone anga ua vutuila, uixi: Eme o kubangana nʼenu, nga mi xindi kima kimoxi: Ngi mi totola diesu dia kadilu enu oso, phala ki mi kale dilebhu di nga te kua Izalaiele ioso.

³ Adiakimi akua Jabezi anga a mu ambela, exi: Tu ehele hanji sambuadi dia izuua, tu tume jiphunga jiie ni jingolokela mʼoxi ioso ia Izalaiele; kibhua izuua, se tua lémbua kumona athu a tu kudila, kiene ki tu tunda hé tu di bhakula kokué.

⁴ Jiphunga anga ji tula bhu Ngibeia dia Saúlo, anga a kunda maka enhá mu mátui a mundu, mundu uoso anga a zangula mázui ni kudila.

⁵ Talesa-phe, ola ienhoio Saúlu iú uiza ni kukaiela jingombe jê, uala kutunda ku mábhia; Saúlu anga uila, uixi: Mundu ihi kia a kuata, ala mu dila kiki? Anga a mu kunda o maka ma akua Jabezi.

⁶ Nzumbi ia Nzambi anga u tula ni nguzu ku thandu dia Saúlo kievu makʼama, njinda iê anga i mu kuata kiavulu.

⁷ Anga u kuata phadi ia jingombe, u ji bhanga ku jithumba-jithumba anga u ji tumikisa ku maẋokololo Izalaiele bhu maku ma jiphunga, uixi: Uoso u kamba kutu nda mu ku banda Saúlo ni Samuuele, kiene kia mu bhanga o jimgombe jêʼiki. Uoma ua Jihova anga u kuata o mundu uoso, anga ene oso a tunda kala muthu umoxi.

⁸ Anga u a kuata konda bhu Bezeke; anʼa Izalaiele a tena hâma jitatu ja jimidi, akua Juda a tena makuinhi atatu a midi.

⁹ Anga ambela jiphunga jeza, exi: Mua kà tangela akua Jabezi-Ngiliiade, kiki: Mungu katé bhu tuila muanha, mua kà bhanduluka. Jiphunga anga jiza ji kundila akua Jabezi, ene anga a sanguluka.

¹⁰ Akua Jabezi anga a zuela, exi: Mungu tu di bhakula kokuenu, mu tu bhange kioso kia mi kala ku muẋima.

¹¹ Ki kúkia-phe Saúlo u uanununa mundu mu ibuka itatu, anga a bhixila bhu kilômbo mu makolombolo, anga a beta akua Amone katé kiatu o muanha; o a subhuka-bhu anga a muangana katé kana-bhu dingi kiiadi kia tena kuendela kumoxi.

Saúlo a mu hingisa usobha

¹² Mundu anga ambela Samuuele, exi: Ene iá kuebhi oso a ki ambele, exi: Kífua Saúlo muene u tu tuminʼá? Mala enhó a tunde, tu a jibhe.

¹³ Saúlo-phe, uixi: Kana, ki mu jibhe-bhu muthu lelu; mukonda lelu Jihova ua kalakala ubhulukilu mua Izalaiele.

¹⁴ Samuuele anga u ambela mundu, uixi: Zenu, tuienu bhu Jidingale, ungana tu u hingise ku ubhe.

¹⁵ Mundu uoso anga a katuka aia bhu Jidingale; Saúlo a mu hingisa ungana bhebhobho bhu pholo ia Jihova, bhu Jidingale; anga a bhana jisata, ni jisata ja kuluulula bhu pholo ia Jihova. Ni Saúlo ni akua Izalaiele oso anga a sanguluka kiavulu bhenhobho.