I Samuuele 1 - O Mikanda Ikola

Elikana ni akajiʼê

¹ Ku kala muthu mukua Lamataimu dia Zofi, mukua ʼxi ku milundu ia Ifalaime, dijina diê Elikana, monʼa Jelohamu, monʼa Elihu, monʼa Tohu, monʼa Zufu, mukua Ifalaime.

² Muenhú anga u kala ni akajiʼê aiadi; umoxi dijina diê Hana, o mukuá dijina diê Penina. Penina u kala ni anʼê, Hana-phe ka moneka mona.

³ Diialʼidi mukua kuila muvu ni muvu uia kubheza Jihova dia ifuẋi, ni ku mu bhakuila jisata mu Silo. O jinganga ja Jihova-phe ia bhobho. Anʼa aiadi a Eli, Hofini ni Finehase, jinganga ja Jihova, bhene bhuala.

⁴ Anga ki bhita kuila, kutula bhu kizuua ki bhana Elikana o sata iê, u uanena Penina ni anʼê a mala ni a ahatu o makânda mâ.

⁵ O Hana-phe u mu bhana mbandu ia mbote; mukonda ua zola Hana, maji-phe Jihova ua mu jika divumu.

⁶ Mukajinʼê anga uia ni ku mu ondolola kiavulu phala ku mu ẋinuna nʼa kale ni dilamba, mukonda Jihova ua mu jika o divumu iu ua lémbua kuvuala.

⁷ O diiala kia kala mu kubhanga kiki mivu ioso, o muhatu u kala ue mu tatesa mukuâ ki aia kʼonzo ia Jihova: mukonda dia kiki muene u kala mu dila, u fula kúdia.

⁸ Bhenhobho-phe Elikana munumiʼê anga u mu ambela, uixi: Eie Hana ua mu didila-hi? ua mu fudila-hi kúdia? ihi kia ku kate ku muẋima? manhi eme ki nga ku kala kota, kuinhi dia mona ndenge?

Hana u bhinga mona kua Nzambi

⁹ Kienhiki Hana u balumuka mu Silo, kia zubha ene kúdia ni kúnua. Eli-phe, o nganga, bhenhobho, ua xikama bhu kialu kiê bhu ngunji ia tembulu ia Jihova.

¹⁰ O muhatu mukonda kia mu ludila ku muẋima, u kala mu sambela Jihova, anga u kala mu dila kiavulu.

¹¹ Anga u di hambelela, uixi: Jihova dia ifuẋi, se ni kidi kiene u ngi tala o kutata kuami eme ngi mubhikʼé, se u ngi ta muẋima, nʼu kambe ku ngi jimba eme ngi mubhikʼé, phala ki ngalʼiki ngi mubhikʼé u ngi bhane monʼa diiala, eme-phe ngi mu bhana kua Jihova izuua ioso ia muenhu uê, ki kua bhita phoko ia bhutu ku mútue uê.

¹² Bhenhobho kiala kuenda ni kusamba kiki bhu pholo ia Jihova, Eli ua mu tongolola ku dikanu.

¹³ Kuma Hana uala kuzuela ni muẋima uê, mizumbu ngó iala kuzamba, ki muala kutunda dízui mu kanu diê; mukonda dia kiki, Eli ua mu fika ua kodiua.

¹⁴ Eli anga u mu ambela, uixi: Mbambe bhebhi, eie bhu ua-nda kusuka ni kukodiua? Vinhu ié tula-iu. I ku bhue kiá ku mesu.

¹⁵ Hana-phe anga u vutula, uixi: Kana, ngana iami, tata! Ngi muhatu ua mukua malamba; ki nga nu, né ngó vinhu, mba kúnua kuengi kuoso-kuoso ku kodiuisa; maji nga mu lunduluila o muenhu uami bhu pholo ia Jihova.

¹⁶ Mubhikʼé ua muhatu ku mu fike-phe uixi monʼa kadia-phemba; mukonda dia ku di tenda kuami kuavulu, ni kutata kua ngi tatesa kinene, kuene ku nga kuata kuzuelela kiki katé kindala.

¹⁷ Bhenhobho Eli u mu kumbulula, uixi: Ndeie ni kutululuka, Nzambi ia Izalaiele a ku bhane ujitu uoso u ua mu bhingi,

¹⁸ Hana anga u mu vutuila, uixi: Ngi sange kiadi ku mesu mé, eme ngi mubhikʼé ua muhatu. Muhatu anga u ila njila iê, u kala mu kudia kiá; pholo iê ki ia di suuata dingi ni malamba.

Samuuele a mu vuala hé a mu lumbila Nzambi

¹⁹ Ki kúkia a di meneka, a bheza bhu pholo ia Jihova, anga a vutuka ku bhata diâ ku Lama. Elikana anga u ijiia mukajiʼê Hana, Jihova phe anga u ta muẋima kua Hana u mu lembalala dingi,

²⁰ kubhiẋila bhu thembu iê, Hana anga u imita u vuala monʼa diiala; anga u mu luka dijina dia Samuuele, uixi: Mukonda nga mu bhingi kua Jihova.

²¹ Diialʼidi, Elikana, ni dibhata diê dioso, anga a banda kua Jihova mu ku mu satela, kala ki ene mu banga mivu ioso, ni kukumbidila o polomesa iê.

²² Hana-phe u fula kubanda; kuma uambela munumʼie, uixi: Eme ki ngi bande luua, katé mona kia sumuka; o kia sumuka-phe kiene ki ngi mu ambata phala ni ngi mu bhakule bhu pholo ia Jihova, nʼa kalelè-ku kiá kuenhoko.

²³ Elikana munumʼiê anga u mu ambela, uixi: Bhanga kioso kia ku uabhela ki ua mono kia beta kuiuka; xala kunu katé kioso ki u mu sumuna; Jihova phe a kolese ngó o kizuelu kié ki ua zuela. Muhatu anga u xala ku bhata, u amuisa monʼê katé kia mu sumuna.

²⁴ Kia zubha ku mu sumuna anga u banda ni mona, ni ngalote jitatu ja ngombe ja kiubha, ni kinda kia fuba, ni kisudi kia vinhu, anga u mu bheka ku inzu ia Jihova mu Silo; kienhokio kambonga kene, hanji ala monʼa uisu.

²⁵ Anga a jibha ngalote ia ngombe, hé mona a mu bheka kienhiki kua Eli.

²⁶ Ana anga u zuela, uixi: Eué! Ngana iami kia kidi kiene kala eie ki uala ni muenhu ué moxi, kuma eme-muene ngi muhatu ió ua kexile bhabha ni eie mù sambela Jihova.

²⁷ Nga sambelele ku ngi bhana mona muenʼiú; Jihova iú ua ngi bhana ujitu uoso u nga mu bhingile.

²⁸ Mukonda dia kiki, eme uami nga mu lumbila Jihova, katé bhuoso bhua kà suka o muenhu uê. Ukala muthu uangene ua Jihova, mukonda ko kuê kuene ku nga mu bhingi. Anga u bheza Nzambi bhenhobho.