I Malunda 29 - O Mikanda Ikola

O maujitu a Davidi, ni a ilamba, ni a mundu phala kutunga o Tembulu

¹ Davidi anga uambela dingi o kionge kioso, uixi: Solomá, monʼ ami, a mu solo kuala Nzambi, uala hanji munzangala uòfele, o kikalakalu kiki kiavulu. Mukonda ki dizemba phala muthu, maji phala Jihova Nzambi.

² Eme-phe, ni nguzu iami ioso, nga iudika kiá phala inzo ia Nzambi iami, ulu phala ikalakalu ia ulu, phalalata, phala o ikalakalu ia phalata, kobidi, phala o ikalakalu ia kobidi, ni felu, phala o ikalakalu ia felu, ni miẋi ia thungu, ni matadi a saldonika, ni matadi osete, ni matadi a kusokejeka, ni matadi oso a fina, ni matadi a nzungule a málmole.

³ O ku mbandu iami ememuène, mu vondadi iami, phala inzo ia Nzambi iami, nga bhana o ulu ni phalata, i ngala na-iu ia ndumba, katu-ku o ima ioso i nga iudika kiá phala o inzo ikóla ia dibhezelu.

⁴ Midi jitatu ja talendu ja ulu, o ulu ua Ofidi, ni sambuadi dia midi ia jitalendu ja phalata iòzunze phala kukembesa ku jiphalelu ja inzo.

⁵ Ulu phala o itutu ia ulu, ni phalata phala o itutu ia phalata; ni phala kikalakalu kioso ku maku a jimesene ja ufunu. Nanhi ue mudienu uala lelu polondo ia kubhana mu vondadi iê, ujitu kua Jihova?

⁶ Bhenhobho-phe, o makota ma jitata, ni ilamba ia miji ia Izalaiele ni jikabhitangu ja jimidi ni ja jihama, katé ni jikabhitangu ja kikalakalu kia sobha, a bhana mukungu mu vondadi iâ.

⁷ Anga a bhana midi jitanu ja jitalendu ja ulu, phala o kikalakalu kia inzo ia Nzambi, ni kuinhi dia midi ia iphaka ia phalata, ni kuinhi dia midi ia jitalendu ja phalata, ni kuinhi dia midi ni nake ia jitalendu ja kobidi, ni hama ia midi ia jitalendu ja felu.

⁸ Oso a kexi ni matadi a te kiavulu, a a bhana mu dilundilu dia inzo ia Nzambi, bhu maku a Jehiiele, Levita, mukua Ngelesone.

⁹ O mundu anga a sanguluka ni ima ia bhana mu vondadi iâ, mukonda a i bhana ni vondadi ioso kua Jihova, ni muẋima ua tenena. O sobha Davidi ue kia mu bhekela kusanguluka kuavulu.

Davidi u fumanesa Nzambi

¹⁰ Mukonda dia kiki, Davidi kia mu bhekela kuximana Nzambi bhu pholo ia kionge kioso, uixi: Tana-ku, eie u Jihova Nzambi ia tatʼ etu Jakobo, ku mivu ni minginda!

¹¹ Unéne ué eie u Jihova, ni kutena, ni kijingu, ni kutolola ni ungana. Mukonda ima ioso ié-eie u Jihova, eie u Suke-ku uala ku thandu dia ima ioso.

¹² O umvuama uoso ni fuma i tunda kokué; eie u tumina o ima ioso, o bhu lúkuaku lué bhene bhuala o nguzu ni kutena; o bhu lúkuaku lué bhene bhuala o kuzangeleka o muthu ni kubhana nguzu ku ima ioso.

¹³ O kiki-phe, Ngana, Eie u Nzambi ietu, tua ku sakidila, tua ximana ue o dijina diê di kôla.

¹⁴ Mukonda eme-eme nanhi, o mundu uami ue à nanhi, ni tu kale ni kutena kua ku ku bhana ni vondadi o ima ia difu kiki? Mukonda o ima ioso i tunda kokué, etu ue tua i bhana bhu lukuaku luê.

¹⁵ Mukonda etu tu jinzuángiza bhu pholo iê, tuala tu jingenji kala o jitata jetu joso; o izuua ietu iedi kala izúzumbia kulu dia mundu, kanaku kima kiengi ki tua dielela.

¹⁶ Jihova, Nzambi ietu, o ima iavulu kiki i tua iudika phala ku ku tungila dibhata mu Dijina diê dikola, ia tunduʼê bhu lukuaku luê, o iene ioso iê-Eie.

¹⁷ Eme nga kʼ ijiia muene kiambote, Nzambi iami, kuma Eie uene mù lola o mixima, o kia ku uabhela o kidi. Eme ue mu kidi kia muẋima uami, nga ku bhana ni vondadi, o ima ioso iíi. O kiki-phe, nga mono ni kusanguluka kuoso kuila o mundu ué ala bhabha, a ku bhana uâ ni vondadi ioso.

¹⁸ Eie Jihova, u Nzambi ia jitata jetu Mbalahamu, ni Izake, ni Jakobo, imʼ íii lunda-iu mu ilunji ni mu ixinganeku ia muẋima ua mundu uê; o mixima iâ, lungisa-iu kokué.

¹⁹ O Solomá dia monʼ ami, mu bhane muẋima ua tenena, phala aluke o ijila iê, ni maumbangi mê, ni itumu iê; ni kubhanga ioso, ni kutunga o dizemba didi di nga mu lungila o ima ioso íii.

²⁰ Bhenhobho Davidi uambela o kionge kioso, uixi: Kindala, Ximanenu Jihova Nzambi ienu. Bhenhobho o kionge kioso anga ki ximana Jihova Nza mbi ia jitata jâ, hé a bhetama, a fukama bhu pholo ia Jihova ni bhu pholo ia Sobha.

²¹ O mu kizuua kiamukuá hé a satela Jihova o jisata ni kubhana kua Jihova o maujitu ma kuoha, midi ia ngalote ia ngombe, midi ia ilumbe ia mbudi, midi ia tumbudi, ni mibhaku ia makunua; ni jisata ja nzungule ja sate akua Izalaiele oso.

²² Ene oso kizuua kienhokio anga adia, anua, ni kutana kuonéne bhu pholo ia Jihova. Anga Solomá dia monʼ a Davidi a mu hingisa lua kaiadi ku usobha, hé a mu lumbila kua Jihova mu kukala musonguedi uâ, o Zadoke a mu lumbila ku unganga.

²³ Kie nhiki Solomá anga u xikama ku kiandu kia Jihova mu kukala sobha, bhu kididi kia tatʼâ Davidi, anga u zediua; o akua Izalaiele oso a mu tumaka.

²⁴ O ilamba ioso, ni makota, katé ni ana oso a sobha Davidi, a tolokela sobha Solomá.

²⁵ O Jihova anga u zangeleka Solomá ditala dionéne bhu pholo ia akua Izalaiele oso. Anga u mu bhana kijingu kia ungana, kia bhingi ki kua kexile luua sobha mu Izalaiele ua kexile na-kiu.

Kubhitulula mu utuminu ua Davidi

²⁶ Kienhiki Davidi, dia monʼ a Jese, kia tumina ku thandu dia mundu ua Izalaiele,

²⁷ mu makuinhi auana a mivu. Mu Hebolone ua tumina-mu sambuadi dia muvu, o mu Jeluzaleme ua tuminamu makuinhi atatu a muvu ni itatu.

²⁸ Anga ufua, ua kukila-ku muene, mu ndumba dia izuua, ni ndumba dia jimbongo, ni kijingu, o Solomá dia monʼê, anga u hinga ungana bhu kididi kiê.

²⁹ O dilunda dia ima ioso ia bhangele sobha Davidi, kutale ia dianga, uixi ia sukidila-ku, tala, iòsoneke mu divulu dia Malunda a Samuuele, o mukua lumono, ni mu Malunda a polofeta Natane, ni mu Malunda a Ngadi, mukua lumono lua kumona.

³⁰ Kumoxi ni utuminu uê uoso, ni kutena kuê kuoso; ni ima ioso ia bhiti na-iu muène, ni ku thandu dia Izalaiele, ni ia bhiti ku thandu dia mautuminu oso a jixi jenhojo.