I Malunda 28 - O Mikanda Ikola

Davidi u tendelela o ilamba ni monʼê Solomá

¹ Bhenhobho Davidi u bhongolola mu Jeluzaleme o ilamba ioso ia anʼ a Izalaiele, o ilamba ia miji, ni jikabhitangu ja ibuka, ene mù bhikila Sobha, ni jikabhitangu ja jimidi, ni jikabhitangu ja jihama, ni makota oso ala ku pholo mù tambula konda ia jimbongo ja Sobha, ni ima ioso ia mu tokala muène, ni ia anʼê, katé ni jingolambole, ni mala, ni makuenze oso a mazonda.

² Sobha Davidi anga uimana, uixi: Ngʼivienu, phange jami, ni enu mu mundu uami. Mu muẋima uami nga tele kikutu kia kutunga inzo ia dinhohenu phala o Álaka ia Kikutu kia Jihova, i kale kibaka kia inama phala Nzambi ietu. Eme-eme nga lùngu o ima ioso phala ku i tunga.

³ Maji o Nzambi ua ngambela, uixi: Eie kutena kutunga inzo mu dijina diami, mukonda eie u iala dia ita, ua bhubhisa manhinga mavulu.

⁴ O Jihova Nzambi ia Izalaiele ua ngi solo eme, mu dibhata dia tatʼetu, ni muiji uami, phala ngi kale ngi Sobha ia Izalaiele katé ku hadia ni hadia. Mukonda Muène ua solo o muiji ua Juda mu kukala kilamba, ni dibhata dia tatʼ etu mu muiji ua Juda. O mu ʼaxaxe ka anʼa tatʼetu, ua ngi solo-mo eme, iú ua ngi katula mu ku ngi bhanga ngi sobha ia muiji uoso ua Izalaiele.

⁵ O ku anʼ ami oso, (kuma Jihova ua ngi bhana ana avulu), Muène ua solo-bho monʼ ami Solomá phala nʼ a xikame ku kiandu kia Utuminu ua Jihova ku thandu dia Izalaiele.

⁶ Iú ua ngʼambela, uixi: O monʼ é Solomá, muène ua kà ngi tungila o Tembulu iami ni malumbu mami. Mukonda Eme nga mu solo phala nʼ a kale monʼ ami, Eme ni ngi mu kale ngi tata.

⁷ Eme nganda kuxikika o utuminu uê katé ku hadia ni hadia, se u jiza mù kualuka ni muanu o ijila iami ioso, ni itumu iami kala ki ua mu bhanga katé lelu.

⁸ O kiki-phe, bhu pholo ia anʼa oso a Izalaiele, o kionge kia ngene kia Jihova, ni mu mátui ma Nzambi ietu, nga mi tendelela kuila alukenu, mu sote jinga o ijila ia Jihova, Nzambi ienu, mbé o ixi iambote íii mu tene ku ivua, ni mu i lunduise anʼ enu hinu à kèza ku dima dienu katé ku mivu ni mivu.

⁹ Anga uambela Solomá, uixi: Eie-phe monʼ ami Solomá, o Nzambi ia tatʼ enu ua mu ijiia, mu bheze ni muẋima uaiuka, ni vondadi iê ioso. Kuma o Jihova mixima ioso uene ku i solokota, o mabanzelu moso ma ixinganeku ua mʼejiia. Eie se u mu sota, uanda ku mu sanga; maji o ki u mu xisa-phe, Muène ue u ku dituna katé ku hadia.

¹⁰ Talesa-phe kindala, kuma Jihova ua ku solo phala u mu tungile o Tembulu iê Ikôla, Suina-phe, u bhange o kikalakalu.

Davidi u bhana Solomá o muxinda ua kibhela kia Tembulu

¹¹ O Davidi anga u bhana monʼê Solomá o muxinda ua kibhela kia Tembulu, ni jinzo jê joso, ni mabhakelu mê ma jimbongo, ni jinzo ja matala, ni maxilu mê moxi, katé ni Inzo ikôla, ia kulolokela o ituxi.

¹² Muène ua mu bhana ue ni muxinda ua ima ioso ia mu kexi ku muẋima, ienʼ íiii: O malumbu ma inzo ia Jihova, ni maxilu oso mu jimbandu phala o malundilu a jimbongo ja inzo ia Nzambi, ni phala malundilu a maujitu oso a kexile mù bhakuila Jihova.

¹³ Davidi ua mu ambela ue kioso ki kala o ibuka ia jinganga, ni ia Jilevita, ni ia kikalakalu kioso kia ukunji ua inzo ia Jihova, ni kutambula o konda ia ingolongondo ioso ia inzo ia Jihova.

¹⁴ O ulu ua soko ni kinemenu kia ulu ua bhingile kubhanga na-u o ingolongondo ioso ia ukunji ni ukunji; o phalata ue a i zonga, o kunema kuê kua soko phala o ingolongondo ioso ia phalata, mbé o itutu ioso ia kikalakalu ni kikalakalu mu jimbambe jê.

¹⁵ O kunema kua jikastisale ja ulu ni jikandeia jê ja ulu, kala kia soko o kunema kua kastisale ni jikandeia jê. Kiene ue kimoxi o jikastisale ja phalata, kala kia soko o kunema kua kastisale ni jikandeia jê kala kia fuama o ku uzala kala kastisale.

¹⁶ Ua bhana ue o ulu uòzonge o kunema kuê phala o meza a jimbolo ja kutela Jihova ku meza ni meza. Ni phalata ue phala o meza a phalata.

¹⁷ Ni ulu ua fina phala o jingalafi, ni phala ue malonga a menha a pholo, ni matijela, ni jikopho ja ulu; o kopho ni kopho ni kunema kuê, kiene ue kimoxi ni jikopho ja phalata, kala kopho ni kunema kuê.

¹⁸ Phala o kalatódio ka uasu ua dizumba, ulu ua fina uòzonge, mu kunema kuê. Kiene ue kimoxi ni ulu ua tokala dikalu dia Jikelubine, jòleka o mabhabha phala kuvungina o Alaka ia Kikutu kia Jihova.

¹⁹ Davidi uixi: Ima ioso íii iòsoneke, ia ngʼ ijidisa o kizuelu kia Jihova ku ikalakalu ioso, kala ki iala mu mixinda i a kibhela kiki,

²⁰ Davidi anga uambela monʼê Solomá, uixi: Suina, u kale u kindanda, u kalakale. Ku kale ni hèle, mba u kala ni uoma. Mukonda o Jihova Nzambi, Nzambi iami, uanda kukala ni eie. Muène kanda ku ku xisa ubheka, mba u ku ehelela, katé ki u zubha o kikalakalu kioso kia inzo ia Jihova.

²¹ Tala, o ibuka ia jinganga ioio, ni ia Jilevita phala o ukunji uoso ua inzo ia Nzambi. O akalakadi phala kikalakalu kioso, uala na-u ue, athu ala ni kuijiia kuoso kua kubhanga kikalakalu kia ufunu uoso-uoso sai. Kiene ue ni ilamba ioso, ni mundu uoso phala o ima ioso i u tuma.