I Malunda 27 - O Mikanda Ikola

O konda ia mundu ni ibuka ia a bha ngi a kikalakalu ku mbeji ni mbeji

¹ Enhá ene anʼ a Izalaiele kala kia a kondala, o makota ma jitata, ni jikabhitangu ja jimidi, ni ja jihama, kumoxi ni atuminiʼâ, a kexi mù kalakela sobha mu sedivisu joso ja ibuka, iá a bokona, o iá a tunda, ku mbeji ni mbeji, ku jimbeji joso ja muvu. Kala kibuka, makuinhi aiadi a midi ni midi jiuana.

² Ku kibuka kia mbeji iadianga, ua kexi ku pholo Jazobeia, monʼ a Zabidiiele; o mu kibuka kiê mua kexile makuinhi aiadi a midi ni midi jiuana.

³ Muenhú ua kexi monʼa Peleji, ua tokala mu muiji ua Juda. Muène xefe ia kabhitangu ja ilômbo ia ita ku mbeji ia dianga.

⁴ O ku kibuka kia mbeji ia kaiadi kua kexi Dadai, mukua Ahohi, o ua mu kaiela mu kutumina mu kibukʼiki Mikelote; muenhú ue o kibuka kiê kia kexile kia makuinhi aiadi a midi ia muthu ni midi jiuana.

⁵ O kabhitangu ka katatu ka kifuẋi kia masoladi ku mbeji ia katatu, Benaia, monʼ a Joiada, o nganga, mu atumini, muène o dikota; muène ue xefe; O kibuka kiê ue kia kexi kia makuinhi aiadi a midi ia muthu ni midi jiuana.

⁶ Benaia muenhú ua kexi dikuenze mu ʼaxaxe ka makuinhi atatu, muène ue o dikota ku makuinhi atatu enhá. O ku pholo dia kibuka kiê ua kexile-ku Amizabade dia monʼê.

⁷ O uà kauana ku mbeji ia kauana, Hazaiele, phangʼia Jouabe, o kua muène kua kaiela Zabadiia dia monʼê. Muenhú ue mu kibuka kiê mua kexile makuinhi aiadi a midi ia muthu ni midi jiuana.

⁸ O ua katanu ku mbeji ia katanu, muène muadiakime Samute, ua tokala mua Izalaiele. Muenhú ue mu kibuka kiê mua kexile makuinhi aiadi a midi ia muthu ni midi jiuana.

⁹ O ua kasamanu ku mbeji ia kasamanu, Ila, monʼ a Ike, mukua Tekoua. Muenhú ue mu kibuka kiê mua kexile makuinhi aiadi a midi ia muthu ni midi jiuana.

¹⁰ O ua kasambuadi, ku mbeji ia kasambuadi, Hèle, mukua muiji ua Efalaime, ua tokala ku Pelone. Muenhú o mu kibuka kiê mua kexi makuinhi aiadi a midi ia muthu ni midi jiuana.

¹¹ O ua kanake, ku mbeji ia kanake, Sibekai, mukua Husa, ua tokala mu dianda dia Zela, akua muiji ua Juda. Muenhú ue mu kibuka kiê mua kexile makuinhi aiadi a midi ni midi jiuana.

¹² O ua kávua, ku mbeji ia kávua, Abidiiezele, mukua Anatote, ku muiji ua Bejamí. Mu kibuka kiê ue mua kexile makuinhi aiadi a midi ni midi jiuana.

¹³ O kakuinhi, ku mbeji ia kakuinhi, Malai, mukua Netofa, ua tokala mu dianda dia Zela. Muenhú ue mu kibuka kiê mua kexile makuinhi aiadi a midi ni midi jiuana.

¹⁴ O kakuinhi ni umoxi, ku mbeji ia kakuinhi ni kamoxi, Benaia, mukua Pilatone, ua tokala ku muiji ua anʼ a Efalaime. Mu kibuka kiê ue mua kexile makuinhi aiadi a midi ni midi jiuana.

¹⁵ O kakuinhi ni kaiadi, ku mbeji ia kakuinhi ni kaiadi, Helediia mukua Netofa, ku muiji ua Otiniiele. Muenhú ue o mu kibuka kiê mua kexile makuinhi aiadi a midi ia muthu ni midi jiuana.

O ukalakelu ua Miji ia Izalaiele

¹⁶ Maji o ku miji ia Izalaiele a kexiku enhá: Ku kibuka kia akua Lubene, ua kexi ku pholo xefe Eliiezele, monʼ a Zikidi; O ku akua muiji ua Ximinhá, Sefatiia, monʼ a Mahaka.

¹⁷ O ku akua muiji ua Levi, Hazabiia, monʼ a Kemuuele. O ku akua muiji ua Alá, Zadoke.

¹⁸ O ku akua muiji ua Juda, Elihude ua tokala mu jiphange ja Davidi. O ku akua muiji ua Isakale, Onili, monʼ a Mikaiele.

¹⁹ O ku akua muji ua Nzebulone, Ijimaia, monʼ a Obadiia. O ku akua muiji ua Nafitali, Jedimote, monʼ a Ajidiiele.

²⁰ O ku anʼ a Efalaime, Ozeia, monʼ a Azaziia. O ku mbandu ia muiji ua Manasa, Jouele, monʼ a Pedaia.

²¹ O ku mbandu iamukuá ia muiji ua Manasa, mu Ngiliiade, Ido dia monʼa Zakadiia. O ku muiji ua Bejamí, Jahaziiele, monʼ a Abinele.

²² O ku muiji ua Dane, Azaiele, monʼ a Jelonami. Enhá ene a kexile jikabhitangu ja miji ia Izalaiele.

²³ O ió ka tenesene luua makuinhi aiadi a muvu, katé ku ana-ndenge bhoxi, sobha Davidi ka a tele mu konda, mbata Jihova ua tanga kuila o anʼ a Izalaiele uanda ku a sokolola kala jithéthembua ku diulu.

²⁴ Jouabe, uavu mamʼâ Zeluia, ua matekene kiá o ku a kondala, maji ka a zubhile, mukonda o kienhiki kia bhekela njinda ia dikota ku thandu dia Izalaiele. Kiene kia bhekela kuila o konda iâ ka i te mu dialuilu dia malunda a sobha Davidi.

O imbadi ia jimbongo ja Sobha

²⁵ O ku jimbongo ja Sobha, a mu tele-ku Azemavete, monʼ a Adiiele. O ku jimbongo ja ʼxi, ni jimbonge, ni ja jisanzala, ni ja tuthôndo, a mu tele-ku Jonata dia monʼ a Uziia.

²⁶ O ku iá a kexi mu kubhanga o kikalakalu ku mikau, a kexi mu kudimisa o milenga, a mu tele-ku Ezedi, monʼ a Kilube.

²⁷ O ku milenga ia mivide, Simei, mukua Lama. Maji o ku matangi a kukamena o vinhu ni ku i bhaka, a mu tele-ku, Nzabidi, mukua Sefane.

²⁸ O ku midiva ni ku jifiku ja kexi kutunda mu milenga ia dima jinga mu manhana, a mu tele-ku Mbala-Haná, mukua Jedeli. Maji o Jouaji muène a mu tele mù tambula konda ia jimbongo ji tunda mu maji.

²⁹ O ku jingombe ja dila jinga mu makèla ku milundu ia Salone, a tele-ku Sitalai, mukua Salone. O ku jingombe ja dila jinga mu ibonda, Safate dia monʼ a Adalai.

³⁰ O ku jikamelu, a mu tele-ku Obili, mukua Ijimaiele. O ku jibulu ja akaji, Jediia, mukua Melonote.

³¹ O ku ibhaku iofele, Jazize, mukua Hangale. Ene osoʼâ ene a kexile o makota mu kutambula konda ia jimbongo ja kexile na-ju sobha Davidi.

O jindongixi ja Kifuandu kia Davidi

³² O Jónata, Sekuluʼ a sobha Davidi, ua tokalele ue mu kifuandu, nagànji ia maka, ua kexi ue musoneki. O muenhú, kumoxi ni Jeiele, monʼ a Hakimone, ene a kexile jimesene ja kulonga o anʼ a Sobha.

³³ O Akitofele ua tokalele ue mu kifuandu kia Sobha. O Husai, mukua Akita, kamba dia Sobha, muène mukua kikutu kiê.

³⁴ O ki afu Akitofele, kua bhingana Joiada, monʼ a Benaia, ni Abiiatale. Maji o Jouabe-phe muène ua kexi o xefe ia kilômbo kia masoladi a Sobha.