I Malunda 26 - O Mikanda Ikola

Ufunu ua alangi a mielu

¹ O ibuka ia alangidi a mielu, ienhiʼii: Ku akua Kola: Meselemiia, mona a Kola ku ana a Azafe.

² O ana a Meselemiia, enhá: Zakadiia, o phande-kumbi, Jediiale uakaiela, Zebediia ua katatu, Jatiniiele ua kauana.

³ Elame, ua katanu, Nzuanane ua kasamanu, Eliiohuenai, ua kasambuadi.

⁴ O ana a Obede-Edome, enhá: Semaia o phande kumbi, Jozabade ua kaiela, Joua ua katatu, Sakale ua kauana, Nataniiele ua katanu.

⁵ Amiiele ua kasamanu, Isakale ua kasambuadi, Peuletai ua kanake, kuma Nzambi ua mu bhele kuzediua.

⁶ Ni kua monê Semaia, ue ua vualaku ana atumina jinga ku dibhata dia tatʼâ, kuma akexile mala a mazonda.

⁷ O ana a Semaia, ene a Otini, ni Lafaiele, ni Obede, ni Elizabade ni jiphange jê, mala a mazonda, Elihu ni Semakiia.

⁸ Ene oso enhá akexile ana a Obede-Edomo; ene ni anʼâ ni jiphange jâ, mala oso a mazonda mu nguzu phala o ukunji; ene oso akua Obede-Edomo a tena makuinhi a samanu a muthu ni kiiadi.

⁹ O ana ni jiphange ja Meselemiia, o mala a mazonda akexile kuinhi ni nake.

¹⁰ O kua Hosa, uatokala muʼaxaxe ka ana a Meladi, anʼê enhâ: Zimidi o mutumini (sumbala ki muene o phandekumbi, maji hanji kiene kimoxi, tatʼâ ua mu-te kukala mutumini).

¹¹ Hilikiia ua kaiela, Tebadiia ua katatu, Zakadiia ua kauana; ana oso ni jiphange ja Hosa, akexile kuinhi dia muthu ni kitatu.

¹² Kua enhá kuene kua katula o ibuka ia alangi a mielu, o kikalakaluʼiki ia a ki bhana ku atumini oso ala ku pholo mudiâ, kumoxi ni jiphange jâ, hala kukalakala mu inzo ia Jihova.

¹³ Bhu muelu ni muelu a-te jisorte, phala kumona o kikalakalu kioso muthu ni muthu kia mu fuama kubhanga-bhu, kixi mona-ndenge kixi muadiakimi, kala kiatokala mu mabhata a jitata jâ.

¹⁴ O hasa ia dibhitu dia mutundila-kumbi ia buila Selemiia; o monʼê Zakadiia, njimu ionéne, uejiia kiavulu, Sorte iê ia mu buila ku dibhitu dialeia ku Suku.

¹⁵ Obede Edome a mu bhana o dibhitu dia kexila ku mbandu ia Sulu; o anʼê, a a bhana o inzo ia dilundilu dia jimbongo.

¹⁶ O Supime ni Hosa, Sorte iâ ia bhela ku mufuila-kumbi, ku mbandu ia njila ia kubandela. O mulangidi umoxi u lulama ni mulangidi ua mukuá.

¹⁷ Ku mbandu ia mutundila-kumbi kua kexi levita jisamanu; ku mbandu ia ku Suku, kiuana ku kizuua, ku Sulu kiuana ku kizuua. Maji o mu malundilu a jimbongo, kiiadi-kiiadi.

¹⁸ Ku Palabale, ku mufuila-kumbi, kiuana bhu mbanduʼ a njila, kiiadi bhu mbanduʼ a Palabale bhene.

¹⁹ Iii iene o ibuka ia alangidi a mabhitu a tokala muʼaxaxe ka anʼ a Kola, ni muʼaxaxe ka anʼ a Meladi.

O alangidi a jimbongo

²⁰ Mu kutanga o Jilevita: Aíia muène ua tambuile konda ia jimbongo ja inzo ia Nzambi ni jimbongo ja imbamba Ikôla.

²¹ O ku anʼ a Ladame, o anʼ a Ladame mukua Ngelesome, Ladame muène, kukululuʼ a jitata ja anʼ a Jeieli.

²² O anʼ a Jeieli: Zetamu ni Jouele dia phangʼiê; enhá a kexile mù tambula konda ia jimbongo ja inzo ia Ngana.

²³ Kumoxi ni akua muiji ua Alá, ni akua muiji ua Izahale, ni ua Hebolone, ni ua Uziiele.

²⁴ O Sebuuele, monʼ a Ngelesone, mulaulʼ a Mozé, muène ua kexi ku pholo ia alangidi a jimbongo.

²⁵ O jiphange jê enhá: Ku mbandu ia Eliiezele, Lehabiia dia monʼê, ni Izaia dia monʼ ê, ni Jolamu, monʼê, ni Zikidi, monʼê, ni Selomite, monʼê.

²⁶ O Selomite muenhú, ni jiphange jê, ene a tambuile konda ia jimbongo joso ja imbamba ikôla, sobha Davidi, ni makota a jitata, ni jikabhitangu ja jimidi, ni ja jihama, ni jikabhitangu ja ilômbo iʼeta, ia lumbilile kua Nzambi.

²⁷ Ku imbamba ia tundu ku madibhundila a ita, a lumbila-ku mbandu phala kutunga muoso mua budika ku inzo ia Nzambi.

²⁸ Kala ue o ima ioso ia lumbilile Samuuele, mukua lumono, ni Saulu dia monʼ a Kiji, ni Abinele, monʼ a Nedi, ni Jouabe, monʼ a Zeluia, ima ioso athu ia lumbila jinga kua Jihova, o Selomite ni jiphange jê, ene a i tambuile konda.

O kikalakalu kia Jilevita jamukuá

²⁹ Ku ji-izalitâ, Kenaniia ni anʼê a ate ku pholo ia Izalaiele phala o kikalakalu ku kanga, mu kukala atumini, ni kufundisa.

³⁰ Ku akua Hebolone, Hezabiia ni phange jê, makuenze a nguzu, midi ni hama sambuadi, a tambuile konda ia kikalakalu mu Izalaiele, ku sámbua kunu dia Njolodá, ku mufuila-kumbi, mu kikalakalu kioso kia Ngana, ni sedivisu ue ia sobha.

³¹ O ku akua Hebolone kuenhuku, Jediia muene ua kexile ku pholo ia akua Hebolone, ni ia miji iâ, mu ʼaxaxe ka jitata; o ku muvu ua makuinhi a uana, a utuminu ua usobha ua Davidi, kiene kia sota, iá a sange mu ʼaxaxe kâ, minzangala ia mazonda mu Jaiezele ia Ngiliiade,

³² o jiphange jê ue, makuenze a nguzu, midi jiiadi ni hamasambuadi ia muthu, ia makota a jitata; o sobha Davidi iú ua a tumbika ku thandu dia akua Lubene, ni akua Ngadi, ni kaxaxe ka muiji ua Manasa, phala o kikalakalu kioso kia Nzambi, ni sedivisu ioso ia sobha.