I Malunda 24 - O Mikanda Ikola

Davidi u uana o jinganga mu makuinhi aiadi ni uana a ibuka

¹ Mu kutanga o ana a Alá, o iuanu iê ienhʼiii: O ana a Alá enhá: Nadabe, ni Abihú, ni Eliiazale, ni Itamale.

² O Nadabe-phe ni Abihú afu sé kuxisa ana, kala tatʼâ iú hanji ku muenhu; o Eliiazale-phe ni Itamale, anga akala mu kubhanga o kikalakalu kia unganga.

³ O Davidi-phe ni Zadoke, ua tokala ku ana a Eliiazale, ni Abimeleke, ua tokala ku ana a Itamale, anga a uana ana a Alá mu ibuka iâ kala kia tokala mu ufunu uâ ni mu ukunji ua kikalakalu kia Jihova.

⁴ Anga a ki mona kuila kioso kia a uane, o ana a Eliiazale abetele kota mu kuvula muʼaxaxe ka atumini a mabhata, o ilamba, o ana a Itamale, ndenge. Mukonda kioso kia a uane, ku ana a Eliiazale kua kexile kuinhi ni kisamanu dia atumini a mabhata, o makota ma jitata, maji, ku ana a Itamale, dinake ngoho kala kia tokala ku mabhata a jitata jâ.

⁵ Hé a a uana mu ibhuku enhoso kumoxi mudiâ, mukonda muʼaxaxe ka ana a Eliiazale, ni muʼaxaxe ka ana a Itamale, mua kexile makota mu kididi kikôla kinéne, mu dibhezelu, ni makota mu inzo ia Nzambi.

⁶ Semaia, o musoneki, mona a Natanaiele, uatundu mu akua Levi, anga u a soneka mu divulu bhu pholo ia sobha ni ia adiakimi (o makota), ni ia Zadoke, o nganga, ni ia Abimeleke, mona a Abiiatale, ni ia atumini a jitata muʼaxaxe ka jinganga, ni muʼaxaxe ka akua Levi; Kibhuku kimoxiʼ muʼaxaxe ka mabhata ma jitata a ki tambula phala o dijiku dia Eliiazale, o kiamukuá a ki tambula phala o dijiku dia Itamale.

⁷ Kibhuku kia dianga kia tundila Joiadibe, o kia kaiadi Jedaia,

⁸ o kia katatu kua Hadime, o kia kauana kua Sehodime,

⁹ o kia katanu kua Malikiia, o kia kasamanu kua Mihamine,

¹⁰ o kia kasambuadi kua Haku, o kia kanake kua Abiia,

¹¹ o kia kavua kua Jesuua, o kia kakuinhi kua Sekaniia,

¹² o kia kakuinhi ni umoxi kua Eiiiasibe, o kia kakuinhi ni kiiadi kua Jakime,

¹³ o kia kakuinhi ni kitatu kua Hupa, o kia kakuinhi ni kiuana kua Jesebeiabe,

¹⁴ o kia kakuinhi ni kitanu kua Bilika, o kia kakuinhi ni kisamanu kua Imele,

¹⁵ o kia kakuinhi ni sambuadi kua Hezele, o kia kakuinhi ni nake kua Hapise,

¹⁶ o kia kakuinhi niʼvua kua Petaia, o kia makuinhi aiadi kua Jehezekele,

¹⁷ o kia makuinhi aiadi ni umoxi kua Jaxime, o kia makuinhi aiadi ni iadi kua Ngamuli,

¹⁸ o kia makuinhi aiadi ni kitatu kua Delaia, o kia makuinhi aiadi ni kiuana kua Mahaziia.

¹⁹ O ufunu ua enhá, ukunji uâ, o kubokona jinga mu inzo ia Jihova, kala kia a tendelela kuala tatʼâ Alá, kala kia mu tendelela ue muene, kuala Jihova, Nzambi dia Izalaiele.

O makota ku majiku ma anʼa Levi

²⁰ O atumini a masubhu a subhuka ku ana a Levi: Ku ana Amalame Subaiele; Ku ana a Subaiele, Jediia.

²¹ Ku ana a Lehabiia, Isiia muene o mutumini.

²² Ku akua Ixala, Selomote; ku ana a Selomote, Jahate.

²³ O ku ana a Hebolone, Jediia uadianga, Amadiia uakaiela, o Jahaziiele ua katatu, Jekamame, ua kauana.

²⁴ Ku ana a Uziiele, Mika ngó, ku ana a Mika, Samile.

²⁵ O phange ia Mika, Isiia; ku ana a Isiia, Zakadiia.

²⁶ Ku ana a, Meladi, Mahedi ni Muxi; o ku ana a Jahaziia Mbenu.

²⁷ Ku ana a Meladi, kua Jahaziia: Mbenu, ni Sahame, ni Zakule, ni Hibidi;

²⁸ O kua Mahedi, Eliiazale; maji muenhú ka kexile ni ana.

²⁹ Mu kutanga Kixi: Ku ana a Kixi, Jelamiiele;

³⁰ o ana a Muxi, Mahedi, ni Edele, ni Jedimote; iá atokalele ku ana a akua Levi, kala kiatokala mu mabhata a jitata jâ.

³¹ Ene ua anga a-ta ibhuku iene imoxi ni jiphange jâ, o ana a Alá bhu pholo iâ Davidi, ni Zadoke, ni Abimeleke, ni atumini a jitata, muʼaxaxe ka jinganga, ni muʼaxaxe ka akua Levi. O ki tambula o mutumini ua dibhata dia jitata, kiene ue ni phange iê ia ndenge.