I Malunda 23 - O Mikanda Ikola

¹ Davidi kia kuka kiá, iu uezala kiá ni izuua iavulu, uabhange Solomá, dia monʼê, kukala sobha ia Izalaiele.

Davidi u hingisa usobha kua Solomá, hé utendelela o ibuka-ibuka ni ukalakelu ua Jilevita

² Iu ua bhongolola o ilamba ioso ia Izalaiele, kumoxi ue ni jinganga ni akua Levi.

³ O akua Levi anga a tuma ku a alula, tunde mu makuinhi atatu a mivu katé ku pholo; o dialuilu diâ, kala kiatokala ku mítue iâ mu umoxi-umoxi, a tena makuinhi atatu ni nake dia midi ia mala.

⁴ Davidi anga uzuela, uixi: Kua iá ku tunda makuinhi aiadi a midi ia muthu ni midi jiuana, phala kubhanga jinga o kikalakalu kia inzo ia Jihova, ni midi jisamanu ja asoneki, o jifixiiadi ni afundixi.

⁵ Kutunda dingi midi jiuana ja alangidi a mielu bhu mabhitu, ni midi jiuana phala kuximana jinga Jihova, ni ingolongondo ia kuxika mimbu i nga bhange eme-muène phala ku mu ximana jinga.

⁶ Davidi anga u a uana ku ibukaibuka kala kiatokala ku ana a Levi, Ngelexone, Kohate ni Meladi.

⁷ Ku akua Ngelexone: Ladane ni Simei.

⁸ O ana a Ladane: Jehiiele muene o mutumini uâ, ni Zetame, ni Jouele, kitatu.

⁹ O ana a Simei: Selomite, ni Haziiele, ni Halane, kitatu; iá ene akexile o ilamba ia jitata ja Ladane.

¹⁰ O ana a Simei: Jahate, Ziza, ni Jehú, ni Mbediia; iá ene akexile o ana a Simei, kiuana.

¹¹ O Jahate muene kilamba uakexile mutumini, o Ziza muene kaiadi ua mu kaiela, maji o Jehu ni Mbediia ka kexile ni ana avulu; kia bhekela o kiiadʼiki ku a aluila mu mabhata ma jitata jâ kala dijiku dimoxi ngó.

¹² O ana a Kohate, enhá: Amalame, Izahale, Hebolone, ni Uziiele, kiuana.

¹³ O ana a Amalame, enhá: Alá ni Mozé; O Alá a mu tungula phala kukolesa dingi o ima ikôla kinéne, ni muene ni anʼê, mu ithangana ioso katé ku hádia ni hádia; phala ku-ta o ima ia uasu ua mazumba bhu pholo ia Jihova, phala ue ku mu xibhidila jinga ni phala kubhana jinga o dibesá ku athu mu dijina diê katé ku hádia ni hádia.

¹⁴ O ki tuiza-phe kua Mozé, o muthu ua Nzambi, anʼê akexile mu ku a aluila jinga muaxaxe ka kibuka kia akua Leví.

¹⁵ O ana a Mozé-phe, enhá: Ngelexone ni Eliiezele.

¹⁶ O ku ana a Ngelexone, muene ngó Sebuuele, o kilamba ua kexile mutumini.

¹⁷ O ku ana a Eliiezele, Lehabiia muene uakexile o kilamba ua di bhange mutumini, kuma o Eliiezele kakexile dingi ni ana amukuá; maji, o ana-phe a Lehabiia adisokoluele kiavulu kinene.

¹⁸ Ku ana a Izahale, Selomite muene o kilamba ua kexi mutumini.

¹⁹ O ku ana-phe a Hebolone, Jediia muene o kilamba uakexile o mutumini, Amadiia muene kaiadi ua mu kaiela, Jehaziiele ua katatu, o Jekamane muene ua kauana.

²⁰ O ku ana a Uziiele, Mika muene o kilamba uakexe o mutumini, ni Izaia ua mu kaiela.

²¹ O ana a Meladi: Mahedi ni Muxi; o ana a Mahedi enhá: Eliiazale ni Kixi.

²² Eliiazale anga ufua, sé kuxisa ana a mala, maji kikala ngó ahatu; o jiphange jâ, ana a Kixi, ene a sakana-nâ.

²³ O ana a Muxi: Mahedi ni Edele, ni Jelemote, kitatu.

²⁴ Enhá ene ana a Leví, kala kia tokala mu mabhata a jitata jâ, ilamba ku jitata, kala kia fuama mu ku a tanga o dialuilu diâ ku majina-majina, mu ilamba iâ kala kiatokala o atumini-â, akexile ku ufunu ua ukunji mʼonzo ia Jihova, mu kumatekena mu makuinhi aiadi a mivu, nʼende ni kubanda.

²⁵ Mukonda Davidi, uixi: O Jihova, Nzambi ia Izalaiele, ua nhohesa o mundu uê, enhá a-nda kua kà tunga mu Jeluzaleme, katé ku hádia ni hádia.

²⁶ O ku akua Levi ue, a tange kuila ki mungu dingi à kʼambata o balaka ia kalatódio, mu kunhunga na-iu, né o imbolongondo ioso iatokala ku ukunji uê.

²⁷ Mukonda, kala kiatokala mu kizuelu kia sukidila-ku kia Davidi, o ana a Levi a aluile phala ku a kuata o konda tunde mu makuinhi aiadi a mivu katé dingi ku pholo.

²⁸ Mukonda ene o ufunu uâ uakexile phala kukala bhoxi dia kitumu kia ana a Alá mu kubhanga o ukunji ua kikalakalu kia inzo ia Jihova, mu malumbu ni mu maxilu, ni mu kuzelesa o ima ioso ikôla, ni mu kikalakalu kia ukunji ua tembulu ia Ngana Nzambi.

²⁹ O kikalakalu kala kiki: Kia jimbolo ja kutela, ni kia fuba ia fina, ni kia ujitu ua mákudia, ni kia tumbolo tua tiliku ni maiaki tua kambe o kifulufulu, ni matasu a kukangela, phala ue o jimbolo ja kuoha, ni kubhaka o izongelu ioso ia kuzongela ni iii ia kupezala na-iu.

³⁰ Ni kuiza jinga mu imene ioso, phala kuximana ni kuhingila Jihova, kiene ue kimoxi ni mu ngoloxi.

³¹ Phala ue kubhakula jinga o ujitu ua jisata ja kuoha ua Jihova mu jisabhalu joso, ni mu jimbeji ja thethama, ni mu ionge ia ujitu, mu ku i alula, kala kiatokala mu ifua iê, izuua ioso bhu pholo ia Jihova.

³² Phala a kuate ue muanu ua kutambula o konda ia balaka ia kionge, ni kulangidila o kididi kikôla kinéne, ni kutalela o ana a Alá, o jiphange jâ, mu kikalakalu kia ukunji ua inzo ia Jihova.