I Malunda 22 - O Mikanda Ikola

¹ Davidi anga uamba, uixi: Kididi kiki kiene kia kà kala o inzo ia Ngana Nzambi, o kalatódio kaka kene ka kà kala kalatódio ka sata ia kuoha phala Izalaiele.

Davidi ubhanga maiudikile phala kutunga o Tembulu

² Davidi anga uxika ngonge, kuila akua jixi jengi akexile mu ixi ia Izalaiele, a a bhongolole, anga u tuma akua kubatula o matadi, phala a iudike matadi ma kuseta mbé o kutunga o inzo ia Jihova.

³ Davidi hé usula felu ia nzungule, phala ue ku iudika jipheleku ja kuphaphela ima ku mabhitu ni kukuatesa o masokokelu mê, kala ue kobidi ia nzungule iabhingi mu kuvula kuê, ki i xikina ku i pezala o kinemenu kiê.

⁴ Ni thungu ia miẋi ia misédulu, ki i xikina ku i alula; kuma akua Sidonha ni akua Tilu a bhekelele jinge Davidi, ndumba ia miẋi ia misédulu iavulu kinéne.

⁵ Mukonda Davidi uazuela jinga, uixi: Solomá, monaʼami, hanji ala monʼa ndenge, muzebeta ua ngoho, o inzo-phe ia-nda kutunga phala Jihova, ki bhinga i uabha kiavulu muene, ni mu kijingu, i xisa dijina ni fuma mu jixi joso; eme-phe, kindala ngi mu iudikila kiá o ima ioso iatokala. Davidi anga u iudika o ima ioso iatokala, ianzungule mu kuvula, kuila ngó kiluua afua.

Davidi u lekelela Solomá

⁶ Uixana-phe Solomá, monʼê, anga u mu tendelela kuila: O Jihova, Nzambi ia Izalaiele, a mu tungile dibhata.

⁷ Davidi anga uambela Solomá, uixi: Monʼami, tata, eme bhabha, kia ngi kexile ku muẋima o kutunga inzo phala o dijina dia Jihova, Nzambi iami.

⁸ Maji-phe, o kizuelu kia jihova kieza kokuami, kiexi: Eie ua bhubhisa manhinga mavulu kinéne, eie ua-lu ue ita ia ndumba; eie kua kà tunga inzo phala o dijina diami, kuambe eie uene mu ku bhubhisa manhinga mavulu mu ngongo, bhu pholo iami.

⁹ Tala-ze, o mona ua-nda ku mu vuala, ua kà kala diiala dia tululuka; mbata nga kà mu bhana o kunhoha ku jinguma jê joso, jala mu jimbandu jaʼxi iê; mu kienhiki, Solomá, diene dia kà kala o dijina diê; ni uembu, ni kunhoha, nga-nda ku ku bhana Izalaiele mu izuua iê.

¹⁰ Muenhú muene ua kà tunga inzo phala o dijina diami; muene ua kà ngi kala monʼami ua diiala o eme ue ngi mu kala ngi tata iê; nga ka xikika o kiandu kia utuminu uê, ku thandu dia Izalaiele, katé ku hádia ni hádia, sé dizubhilu.

¹¹ Kala kiki-phe, monʼami, Jihova akale ni eie; u laie, ukale ni kuzediua, nda u tunge o inzo ia Jihova, Nzambi ié, kala muene kia ku tange-kiu.

¹² O Jihova-phe a ku bhane kiá ngoho o unjimu ua kuijiia ni kutongoloka, a ku longese bhu kaẋi ni Izalaiele, kioso ki ukala mu ku a tumina, mbé ubhake o kitumu kia Jihova, Nzambi ié.

¹³ Ua kà kala ni kuzediua, se eie ukala ni muanu ua kubhaka o itumu ni mabatuilu a tumu Ngana Nzambi kua Mozé, bhu kaẋi ni Izalaiele. Suina-phe, ubhue uoma, u kuate muanu uambote; ku kale ni uoma, mba u bhuila muẋima.

¹⁴ Talesa-ze, kuma mu hadi ni lamba di nga tale ni kukalakala kuami kuavulu, nga kuata hama ia midi ia jitalendu ja ulu, phala o inzo ia Jihova, ni luku imoxi ia jitalendu ja phalata, ni kobidi ni felu ja bhingi katena ku jʼijiia o kinemenu kiê ki ja neme, mukonda kana muthu utena ku ji pezala, mbé dia kuvula kinéne; ku tahndu diê nga lungu ue ni miẋi ni matadi, iene ioso nga i tenesa; eie-phe, hinu uta-bhu dingi kioso kia kambe-ku.

¹⁵ Kuma eie-phe uala ue ni akalakadi andumba akua kusula, ni akua kubatula ni akua ufunu ua kusonga matadi ni akua kutunga jinzo ni asongi a mabaia, ni jingijiie ja nzungule ala jihete mu ikalakalu ia vulu matelu.

¹⁶ O ku ulu, ni phalata, ni kobidi ni felu, ni imʼii iala nzungule, kana-ku dialuilu diê; eie balumuka-phe u bhange o kikalakalu, o Ngana Nzambi akale ni eie.

¹⁷ Davidi iu ua bhana o mutendelelu ku ilamba ioso ia Izalaiele, phala akuatekese monʼé Solomá, uixi:

¹⁸ Manhi, o Jihova, Nzambi ienu, kala ni enu? O muene ka mi nhohesa ku jimbandu kuene kuoso? Kuma ni kidi kiene, muene ua bhakula bhu lukuaku luami o athu atungu mu ixi, o ixi iii ia toloka kienhiki bhu pholo ia Jihova ni bhu pholo ia mundu uê.

¹⁹ Dibhakudienu-phe, kindala, ni muẋima uenu uoso ni muenhu uenu uoso mu kusota Jihova Nzambi ienu. Di iudikienu ue, nda mu balumuke, ni mu tunge o kididi kikôla kinéne kia Jihova Nzambi, phala o álaka ia kikutu kia Jihova, ni itutu iokolese ia Ngana Nzambi, eze na-iu mu inzo iii ia tembulu, ia-nda ku tungila o dijina dia Ngana.