I Malunda 21 - O Mikanda Ikola

Davidi ualula o mundu, Nzambi anga u mu bhana njumbu (kaxitiku)

¹ Bhenehobho Satana hé u balumuka, hé ubilukila Izalaiele, anga u funhisa Davidi phala kualula o mundu ua Izalaiele.

² Davidi anga uambela Jouabe ni makota a mundu, uixi: Ndé-nu, mua kʼàlule o mundu ua Izalaiele tunde ku Beleseba katé ku Dane; mu ngi bhekele o dialuilu diê phala eme ngijiie o mundu uoso se ala kikuẋi.

³ Jouabe hé u mu vutuila-phe, uixi: Jihova a-tê-ku dingi luhama ku mundu uê kala kiki ki uasoko kiá; manhi, eie u sobha, ngana iami, tata, ene oso muene ki abhikʼé? Mukonda diahi-phe ki u bhindamena dingi kimʼiki, ngana iami, tata? Mukonda, kienhiki, hádia kia kà kala kima kia kikuma ni mulonga phala Izalaiele!

⁴ Maji o kizuelu kia Sobha-phe kiatundu mu mu kujiza ni nguzu, o iazuela Jouabe, ndenge; Jouabe kia mu bhekela muene kutunda anga u bhita mu Izalaiele ioso, hé u vutuka kiua ku Jeluzaleme.

⁵ Jouabe anga uiza u bhana kua Davidi o dialuilu dioso dia mundu. O Izalaiele ioso, atena fuku imoxi ni hama ia midi ia mala akua nguzu, ió a tena ku fuomona xibhata phala kúlua ita; o mu akua Juda, hama jiuana ja midi ni makuinhi sambuadi dia midi ia mala a tena ku fuomona xibhata mu kúlua ita.

⁶ O ku muiji ua akua Levi, ni ua Bejamí, muene ka alula muaxaxe kâ, mukonda o kizuelu kia sobha, Jouabe kia mu ibhidile kiavulu muene.

Davidi u sola o kaxitiku kê

⁷ Hundu iii ue, Nzambi ua i mono kuiibha ku mesu mê, kia mu bhangesa kukuama Izalaiele.

⁸ Davidi anga uambela Ngana Nzambi, uixi: Nga-te kituxi kiavulu kinéne mu kubhanga o kima kala kiki; kindala-phe, Ngana, nga ku diondo, loloka o kikuma kia selevende iê kuma nga bhange uoua uavulu.

⁹ Jihova-phe, anga uzuelela Ngade, o muzambuidi ua Davidi, uixi:

¹⁰ Ndé uàkambele Davidi, kuma: Kienhiki kia zuela Jihova: Ima itatu i nga ku tudila; eie sola-bhu kimoxi, phala eme kiene ki ngi ku bhanga.

¹¹ Ngade-phe anga uiza kua Davidi, u muambela, uixi: Kienhiki kiambe Jihova: Eie sola-bhu kima kimoxi,

¹² mba mivu itatu ia nzala, mba mu mbeji jitatu a kuoseka kuala o jinguma jé, ni ku ku buba ku xibhata ia jinguma jé, mba xibhata ia Nzambi i ku kuama mu izuua itatu, kifua dibhebhu dia kibuika di ku tula mu ixi, kumoxi ni anju ia Jihova, hé a sengulula o jimbambe joso ja Izalaiele; tala-phe kiá, kindala, u ngi tangele o uvutuilu u nga kà tula kua ió ua ngi tumu.

¹³ Davidi anga uambela Ngade, uixi: Kubhondalala ku ngala na-ku, kuavulu! Maji eme sembele nga dibhalela bhu lukuaku lua Jihova, mukonda muene o jihenda jê jivula; nguami o ku dibhalela bhu maku ma athu.

¹⁴ Ngana phe anga utumikisa o dibhebhu dia kibuika kua Izalaiele, anga mua Izalaiele mu dibhala makuinhi sambuadi a midi ia muthu, hé a fua.

¹⁵ Jihova, anga utumikisa anju imoxi ku Jeluzaleme, phala Jeluzaleme ku i sengulula; o muene mu ku i buikisa. Ngana ua talesa, anga u di êlesa o kibuika kiokio, henda i mu kuata anga uambela o anju ia mubuidixi, uixi: Kuabhu! Kindala katula-ku kiá o lukuaku lué! O kienhokio-phe, anju ia Jihova iakexile bhu mbandu ia kididi kia dizanzu dia kubhiatela dia Holonane, mukua Jebuze.

¹⁶ O Davidi, mu kuzambula mesu mê, uamono o anju ia Jihova, iemana mu dinga ni dinga, mu mbambe iaʼxi ni diulu, ni xibhata ia fuomona ma kizu ia kuata bhu lukuaku luê, ialeka mu kubuikisa Jeluzaleme. Kienhokio Davidi-phe ni makota moso, a zuata jisaku ja idinhaji, a dibhala o jipholo jâ bhoxi.

¹⁷ O Davidi anga uambela Ngana Nzambi, uixi: Kʼeme muene nga tange kuila alule o mundu? Kʼeme muene ngi mukua mulonga, eme nga bhange kia iibha kiavulu. Maji o jimbudi jiji, enu malʼenu, kima kiahi kia bhange? Ai! Ngana Nzambi iami, tata! Lukuaku lué lu ngi bilukile eme, lu bilukile ue o dibhata dia tatʼetu, ki ki bhane jihadi ku mundu ué, kana.

Davidi utunga kalatódio phala Jihova bhu dizanzu dia Holonane

¹⁸ Bhenhobho o anju ia Jihova phe uambela Ngade, uixi: Kà tangele Davidi, kuila a bande mù kuimikina Jihova kalatódio, bhu kididi kia kubhiatela kia Holonane, mukua Jebuze.

¹⁹ Davidi anga u banda, kala kiambe o kizuelu kia Ngade, kia tange mu dijina dia Ngana.

²⁰ O Holonane kioso kia lunguluka, ua mono o anju, o muene hé u suama kumoxi ni anʼê. Kuma mu kithangana kienhókio o Holonane uakexile mu kuvunda o tiliku iê.

²¹ O kioso Davidi kia bhixila bhua zukama, ua mu kuiza kua Holonane, Holonane anga u tala, hé u mona Davidi, uxisa o kididi kiê bhu kienda bhuala, anga u dibhala o pholo iê bhoxi, bhu mesu a Davidi.

²² Davidi anga uambela Holonane, uixi: Ngi bhane kididi kiki, kia kubhiatela, phala ngi tunge-bhu kalatódio phala Jihova; ngi sumbise-kiu, mu suilu iê iatokala mu kitadi, phala o dibhebhu didi di batuke ku thandu dia mundu.

²³ O Holonane-phe, uambela Davidi, uixi: Tambula-kiu phala eie, u sobha ngana iami, phala eie u ki bhange kioso ki ua mono kia uabha ku mesu mê. Tala-ze, ngi ku bhana ue o jingombe phala o sata ia kuoha, o malola a dikalu phala o jihuinhi, ni tiliku phala o ujitu ua mákudia; iene ioso ngi i bhana!

²⁴ Sobha Davidi anga uambela Holonane, uixi: Kana! Inda kididi ngi ki sumba, ngi ki futila muene o kitadi kioso ki kia-te, kuma ki ngʼandala kutambula kima kié mu kingoho phala ku ki bhana Jihova, phala ki ngi bhane sata ia kuoha ki ii-te kima, kia nguzu iami.

²⁵ Davidi anga u sumba kididi kienhókio kua Holonane, mu hama jisamanu ja xikulu ja ulu.

²⁶ Kienhiki Davidi anga utunga bhenhobho o kalatódio ka Jihova, hé ubhana o jisata ja kuoha ni jisata ja mutululuku; anga uhingila Nzambi; Ngana hé u mu vutuila ni túbhia tua tundu ku diulu, hé tu tula ku thandu dia kalatódio ka sata ia kuoha.

²⁷ Jihova hé utendelela o anju, kuila a bhake o xibhata iê, muene anga uta o xibhata iê mu kizu.

O kididi kia Tembulu

²⁸ Kithangana kienhókio kioso Davidi kiamono, kuila Nzambi ua muivu iu ua mu vutuila o musambu uê, usatela bhenhobho, bhu kididi kia kienda kia Holonane, mukua Jebuze.

²⁹ Mukonda o balaka ia Nzambi, iatungile Mozé mu kikangalakata, ni kalatódio ka sata ja kuoha, iakexile hanji ku mulundu ua Ngibiione mu izuua muenhomo.

³⁰ Mbata o Davidi katenene kuia kuenhoko mu kubheza Ngana Nzambi, mbé o uoma, mukonda dia kumona o xibhata ia anju ia Ngana.