I Malunda 20 - O Mikanda Ikola

Davidi u tolola akua Labá

¹ Kia bhiti-phe kuila, bhu kaẋi ka muvu umoxi, bhu kithangana kia kexile mu kutunda o jisobha phala kuia ku ita, Jouabe u ambata o kilômbo kia masoladi, anga u buikisa o ixi ia anʼa Amone, anga uiza, u konda Labá, maji o Davidi uaxala hanhi mu Jeluzaleme; Jouabe hé ukuama o mbonge ia Labá, anga u i buidisa.

² Davidi anga u katula o kitundu ku mútue ua sobha ia Labá, hé u sanga kuila kiala ni kinemenu kia talendu imoxi ia ulu, kia kexile ue ni matadi ma-te kiavulu. Anga a ki-ta ku mútue ua Davidi; mu mbonge anga uambata-mu madibhudila avulu.

³ Uambata ue o mundu akexile-mu, hé u ata mu kuselala ni sela, ni kukanda ni jipikaleta ja felu ni isesu iamakota. Kienhiki kia bhange Davidi ni jimbonge joso ja tokala ana a Amone. Kienhókio Davidi, anga u vutuka kiua ku Jeluzaleme, ni mundu uoso kumoxi.

O mazonda ma Fidíxa a ma tolola kuala o makuenze ma Davidi

⁴ Kioso kia bhiti miʼii kua balumuka ita mu Ngezele ni akua Fidíxia, bhenhobho o Sobekai-phe, mukua Husa, ujibha Safai, muthu uatokala ku ana a Lafa o mbutu ia mazonda; akua Fidíxia enhá anga a toloka:

⁵ Ita anga ibalumuka luamukuá ni akua Fidíxia; o Elanana, mona Jaiele, anga ujibha Lami, phange ia Ngoliia, mukua Ngate, uedi omubhinhi ua ngumba iê ngó, mukua ni muixi ua mulongo ua mutungi a thanga.

⁶ Ita anga ibalumuka dingi luamukuá mu Ngate; muenhomo muakexile kiiala kulebha kuvula, uakexile ni makuinhi a iadi a milembu ni milembu iuana, kuma uedile milembu isamanu ku lukuaku lumoxi, milembu isamanu ue ku lukuaku luamukuá; milembu isamanu ku kinama kimoxi, milembu isamanu ue ku kinama kia mukuá; muene ua kexile ue muthu ua tokala ku mbutu ia kua Lafa.

⁷ Muenhú anga u kala mu lebhula Izalaiele; Jonata-phe, mona a Simei, phange ia Davidi, u mu jibha.

⁸ Mala enhá a a vuala kuala Lafa mu Ngate; abuidila-phe bhu lukuaku lua Davidi, ni bhu maku ma abhikʼê.