I Malunda 19 - O Mikanda Ikola

O sobha ia akua Amone u Lebhula o jiphunga ja Davidi, o muene anga u mu bhana njumbu

¹ Kia zubha kubhita o imʼiii, Nahaze, sobha ia ana a Amone, ufua, monʼê hé u tumina bhu kididi kiê.

² Davidi-phe, uixi: Nga kà bhindumuna Hanume, mona a Nahaze, kuma tata iê ua ngi bhindumuna jinga uê. Kia bhangesa Davidi ku mu tumikisa jiphunga phala ku menekena ni ku mu konda o malamba mukonda dia kúfua kua tatʼâ.

³ Maji ene kioso kia bhixila mʼoxi ia akua Amone, o ilamba-phe ia ana a Amone, ambela Hanume, exi: Kifua eie ua fika kuma Davidi ua bhana ujitu kua tatʼenu, bhu pholo iê, mukonda ua ku tumikisa athu mu ku ku konda o malamba? Manhi abhikʼê kʼeza kokué, phala ku ku tongolola, ni kusota kulonda kiambote o ixi ié, phala ku ku muanga ni ku ku sengulula?

⁴ Hanume-phe u kuata o abhika a Davidi, hé u a konga o miezu anga u tandula o izuatu iâ mu kaẋi katé mu matabela mu kubhiẋila ku sungu ja mataku, anga u a xinjikila kokuâ

⁵ Anga kutunda athu aia makidikidi mu kuambela Davidi kioso kia bhiti na-kiu o mala enhá, muene anga u tuma iphunga ku takana-nâ, kuma katenene kubhiẋila mukonda dia tuẋi ia a kuatesa jisonhi javulu; Sobha-phe ua ambela, uixi: Kalenu hanji mu Jedikó, katé ki mu sabhuka o miezu ienu, muize kiua.

⁶ Ana a Amone-phe, mu kumona kuila a dibhange jinguma kua Davidi. Hanume-phe ni ana a Amone atumikisa midi ia jitalendu ja phalata phala kufutila makalu ni akua kumondala, ku Mesopotâmia, ni ku Sídia dia Mahaka ni ku Zoba.

⁷ Afutila ue phala ene makuinhi a tatu a midi ni midi jiiadi ja makalu, a kolomona ue Sobha ia Mahaka ni mundu uê ua masoladi a ita, ene eza, hé a-ta kibuta bhua zukama ni Madeba. O ana a Amone ue a dibhongolola mu mabhata mâ, anga a tunda, eza ku ita.

⁸ Davidi-phe, kia kʼivu, u tuma Jouabe ni kifuxi kioso kia masoladi ku mala a mazonda.

⁹ O ana a Amone, he a tunda, a di ta ku mukalatata phala ku di-lua bhu muelu ua mbonge; maji o jisobha jeza ku a kuatekesa a di kexidila ni mbandu iâ, hé a di-ta ku mukalatata mu kanga, ku mikáu phala ue kúlua.

¹⁰ O Jouabe kia ki mono, kuila ita ia mu lungu muene, a mu kondela ku pholo ni ku dima, usola mu mala a mazonda a Izalaiele, hé u a tungula u a ta ku mukalatata, phala kúlua ni akua Sídia.

¹¹ O kaxaxe ka mundu ua masoladi ua ka bhana bhu maku ma Abisai, phange iê, phala kúlua ni ana a Amone.

¹² Hé ua ambela phangʼiê, uixi: Se akua Sídia a beta nguzu eme ndenge, eie uiza ku ngi kuatekesa; se, o ana a Amone a beta nguzu eie ndenge, eme-phe nga kà ku kuatekesa ue.

¹³ Eie-phe suina, etuonhoso tu suine ue, mbé tu bhangele o mundu uetu, ni mabhata a Nzambi ietu, Jihova, phala muene a bhange kioso ki mu uabhela ku mesu mê.

¹⁴ Jouabe, anga u di sunga mu bhixila ni mundu uakexile na-u, ku pholo ia akua Sídia, phala ku di-lua; ene anga a lenga bhu pholo iê.

¹⁵ Ana a Amone ue kia ki mono kuila akua Sídia a lenge, ene uâ a lenga bhu pholo ia Abisai, phangʼiê, anga a bokona mu nge iâ; o Jouabe anga uiza ku Jeluzaleme.

¹⁶ Akua Sídia-phe kia ki mono kuila a a tolola kuala akua Izalaiele, atumikisa jiphunga, hé a tuma ku ixana akua Sídia atungile ku sambhua dia ngiji; o Sofake, kabhitangu ka kilômbo kia ita ua tokala ni Hadale-Ezele, muene a tuamenena ku pholo.

¹⁷ Davidi kioso kia zubha ku mu dimina, muene u bhongolola akua Izalaiele oso, hé u zaúka Njolodá, hé uiza mu ku a batuila phala kutakana-nâ, anga u zeleka o mundu uê ku munono phala ku diluanâ; Akua Sídia-phe, kia mono kuila Davidi ua te o masoladiʼê ku musanga ua ita, iú ua bilukila akua Sídia phala kúlua-nâ, ene ua a tunda hé alua-nê.

¹⁸ Maji akua Sídia-phe a lémbua-ku, hé a lenga bhu pholo ia Izalaiele, Davidi anga u buidisa ku akua Sídia, sambuadi dia midi ia jikabalu ja makalu, ni makuinhi a auana a midi ia mala akua kuendela bhoxi; o Sofake, kabhitangu ka kilômbo kia Sídia a mu jibha uê.

¹⁹ O mundu ua Hadale-Ezele, kia mono kuila Izalaiele ua a tolola, aditambulula ni Davidi anga a kala mu ku mu bhikila. O akua Sídia-phe ka vutukila dingi mu ku kuatekesa anʼa Amone.