I Malunda 18 - O Mikanda Ikola

Makutolola mavulu ma Davidi

¹ Kia zubha kubhita imʼii-phe, Davidi ua kuama o akua Fidíxia iu ua a tolola; iu ua tambula o ixi ia Ngate, ni ididi ia utuminu uê, bhu maku ma akua Fidíxia.

² Ua tolola ue akua Mouabhe, enhá anga a kala jiselevende ja Davidi, hé aia ni ku mu bhekela o lubhaku.

³ Davidi ue ua jibha Hadale-Ezele, sobha ia Zoba, bhu mbandu ia Hamate, kioso muene kia mu-ia mu kuatesa dingi o ungana ua utuminu uê ku honga ia Eufalate.

⁴ Davidi anga u mu bhûnda o midi ia jikabalu ja makalu ja kexi na-ju ni sambuadi dia midi ia akua kumondala, ni makuinhi aiadi a midi ia mala endela bhoxi: Davidi anga usenda o mixibha ia jikabalu joso ja makalu, maji ku jenhiji ua xisa-ku hama ia jikabalu.

⁵ Anga ku Damasku kuiza akua Sídia mu kukuatekesa Hadale-Ezele, sobha ia Zoba; Maji Davidi-phe ku akua Sídia ujibha-ku makuinhi aiadi a midi ia muthu ni midi jiiadi.

⁶ Davidi anga u-ta ibuka ia masoladi enda ni kulanga mu Sídia ia Damasku, anga akua Sídia axala ku ubhika kua Davidi, hé akala jinga kiá mu ku mu futa lubhaku; o Ngana Nzambi hé u kala mu bhaka Davidi, kuoso kuoso ku aia, ni ku mu bhana kutolola o jinguma jê.

⁷ Davidi anga u tambula jingubu ja ulu, jakexile na-ju abhika a Hadale-Ezele, hé uiza na-ju mu Jeluzaleme.

⁸ Ku Tebate ue, ni ku Kune, jimbanza ja Hadale-Ezele, Davidi ua tambula-ku kobidi iavulu. Iene Solomá ia iudika na-iu o kizanga kia kobidi ni jiphiladi, ni itutu ia kobidi.

⁹ Tohu, sobha ia Hamate, kia zubha ku kʼivua kuila Davidi ua buidisa o kilômbo kioso kia masoladi a Hadale-Ezele, sobha ia Zoba,

¹⁰ ua tumu monʼê Hadolamu kua Davidi, phala ku mu kunda ni ku mu ibhudisa kioso kia mu zeka, ni ku mu tanesa, kuma ua tena kubhânga ni Hadale-Ezele, iú ua mu tolola (mbata Hadale-Ezele ua kexile mu-lua jinga ita ni muene Tohu); anga u mu tumikisa kumoxi ni monʼé itutu ioso ia ulu, ni ia phalata, ni ia kobidi.

¹¹ Itutu iene ioso iii ue, Davidi ua i lumbila kua Jihova, kumoxi, kiá ni phalata, ni ulu, ueza na-u ue ku ifuẋi ioso ia akua matumbu a kambe kuijiia Nzambi, o akua Idomo, ni akua Mouabhe, ni ku ana a Amone, ni ku akua Fidíxia, ni ku akua Amaleke.

¹² O Abisai ue, mona a Zeluia, uajibha iu ua tolola ku akua Idomo kuinhi ni nake dia midi ia mala mu Dikôlo dia Môngua.

¹³ Anga Davidi u-ta kibuka kia masoladi ki kala mu kulangidila mu Idomo, o akua Idomo ene oso anga a kala abhika angene a Davidi; o Jihova anga ukala mu kulanga Davidi, kuoso kuoso kuaia.

O jifixiiadi ja Davidi

¹⁴ Davidi hé ukala mu tumina o Izalaiele ioso; ukala mu kufundisa ni kubhanga mbote ku mundu uê uoso.

¹⁵ O Jouabe, mona a Zeluia, muene uakexile ku ukunji ua kukala kilolo kia kutumina o kifuẋi kioso kia masoladi; o Jozafate mona a Ahilude, muene uakexile thandala.

¹⁶ Zadoke ue mona a Aitube, ni Abimeleke, mona a Abiiatale, ene akexile jinganga; o Sahuza muene uakexile musoneki.

¹⁷ O Benaia, mona a Joiada, muene uakexile ku ukunji ua kutumina o masoladi a kilangidilu kia Sobha; maji o ana a Davidi akexile mu kudianga kukala bhu mbandu ia sobha.