I Malunda 16 - O Mikanda Ikola

O álaka ia kikutu mu balaka

¹ O álaka ia Nzambi kioso ki iabhiẋila-phe, a itula mu kaẋi ka balaka ia tungile Davidi; anga a satela jisata ja kuoha ni ja uembu bhu pholo ia Nzambi.

² O Davidi, kioso kiazubha kusata o jisata ja kuoha ni jisata ja uembu, u bhana o mundu dibesá mu dijina dia Jihova.

³ Ene oso, mu Izalaiele, anga u a uanena kala muthu mbolo ni thùmba iambote ia xitu, ni ndose ia ji-uva jakukuta, tunde ku mala katé ku ahatu.

⁴ O ku pholo ia álaka ia Ngana, ua-te-ku atumini amoxi-mu ku akua Levi; o kiki, phala kuphaphumuka, ni kuximana, ni kutumbujukila Jihova, Nzabi ia Izalaiele.

⁵ Azafu muene uakexile o mutumini a mu te ku pholo ia enhoso, o kua iú kua kaiela Zakadiia muene kaiadi, o kua muene kueza Jeiele, ni Semilamote, ni Jeiele, ni Matitiia, ni Eliiabe, ni Benaia, ni Obede-Edomo; O Jeiele muene a mu bhele kuxikisa o tukoxi ni jimbànza, o Azafu-phe muene ua kexile mu kuivisa o jingoma.

⁶ O Benaia ue, ni Jahaziiele, o jinganga, hé akuata kuxika o jikoloneta ni lujiji, ku pholo ia álaka ia kikutu kia Jihova.

O mukumbi ua Davidi ua kusakidila

⁷ Mu kizuua kienhokio-phe, Davidi udianga hanji kubhana o salamu iii iala ku pholo phala kuximana na-iu Jihova, ku ukunji ua Azafu ni ua jiphange jê, exi:

⁸ Ximanenu Jihova! Hingilenu o dijina diê, fumanesenu o ibhangelu iê, mundu uoso a ijiie.

⁹ Muimbidienu, mutienu ku mukumbi ni jisalamu, tangenu ni muanu o madiuanu mê moso.

¹⁰ Te-nu o nzabala ienu mu dijina diê dikola; muẋima ua ió oso asota Nzambi usanguluke.

¹¹ Sotenu Nzambi, ni nguzu iê; sotenu o pholo iê mu ithangana ioso.

¹² Lembalalenu o madiuanu mê mene mu kubhanga, ni isumua iê, ni mabatuilu ma dikanu diê.

¹³ Enu, mu mbutu ia Izalaiele, selevende jê, enu mu ana a Jakobo a mi sola.

¹⁴ Jihova, muene. Nzambi ietu; mu ngongo ioso muezala ni mabatuilu mê.

¹⁵ Jijilenu kulembalala o kikutu kiê, ni kizuelu kiê kia soneka phala midi ia miji;

¹⁶ O kikutu kia-ta ni Mbalahamu, ni mulôko ue ua-te mu kulokela Izake.

¹⁷ Ni mua Jakobo ue ua u kuatesa, phala ukale kitumu ni mua Izalaiele ku kikutu kinangenena,

¹⁸ uixi: Eie-muène nga-nda ku kubhana o ixi ia Kanana, ikale mbandu ia undundu uenu.

¹⁹ Ki muedi enu mua tolo hanji mu ku mi alula, mu mala ofele ngoho, mu jinzuangiza mʼoxiʼomo.

²⁰ Anga mu kala hanji mu kubungana, mu tunda muiji muiza muiji, mu tunda Utuminu umoxi phala kuiza mu mundu uengi.

²¹ Nzambi kʼehela muthu ku a oseka, o mu henda ia a kuatela ene, o jisobha ua ji bazela, uexi:

²² O athu ami a undu ni maji, ki mu a kuate, o jipolofeta jami ki mu ji bhange kia iibha.

²³ Imbilenu Jihova mu ixi ioso, kolenu kizuua ni kizuua o ubhulukilu uê.

²⁴ Tangenu muʼaxaxe ka ifuẋi o fuma ia unéne uê, ni madiuanu mê muʼaxaxi ka mundu uoso.

²⁵ Kuma Jihova Munéne, uafuama ku mu ximana kiavulu, mukonda muene ukôla o jinzambi joso ndenge.

²⁶ Kuma o jinzambi joso ja ifuẋi mu jixi, iteka ia kingoho; maji o Jihova-phe muene uabhange o diulu.

²⁷ Kizunda ni kubenha kuala ku pholo iê, nguzu ni kutana bhu kididi kié kikôla.

²⁸ Bhanenu Nzambi, enu akua bhata ku miji mu ngongo, Nzambi mu bhanienu o fuma ni nguzu.

²⁹ Bhanenu Nzambi o fuma ni kijingu kia fuama o dijina diê; bhekenu maujitu, mu bhiẋile mu malumbu ma Jihova; mu bhezienu mu ku uabha kua kuzela kuê.

³⁰ Oxi ioso itekete, itekete bhu pholo iê, mbata o ngongo muene ua ifikidila phala ki i tekete.

³¹ Maúlu a sanguluke, o ngongo itane-ku! A ki zuele muene muʼaxaxi ka miji, kuila: “Nzambi muene utumina”.

³² Kalunga ka zume ni mabhuku mê moso; o mikáu ia kanga itane-ku ni ima ioso iala-mu.

³³ O miẋi ia mixitu-phe ia kà tumbujuka ni ngalasa, bhu pholo ia Jihova, kuma muene iu uiza mu kufundisa o ngongo.

³⁴ Sakidilenu Jihova, kuma muene mukua kubhanga mbote; mbata kulenduka kuê ki kuene kúbhua.

³⁵ Tangenu-kiu, muixi: Tu bhulule Ngana, eie u Nzambi ia ubhulukilu uetu, tu bhongolole kumoxi, u tu kudile ku miji ia matumbu mu ngongo, phala tu hingile o dijina dié dikola, phala tu kale ni kijingo mu ku ku ximana jinga eie.

³⁶ Atane-ku! Jihova, Nzambi ia Izalaiele, ku jihama ja mivu ni mivu! Mundu uoso hé u zuela: Amém! Anga a tanesa Jihova.

Ima iamukuá dingi ia kuku

³⁷ Kienhiki, Azafu ni jiphange jê, anga Davidi u a xisa bhenhobho, bhu pholo ia álaka ia kitumu kia Jihova, mbé o kuia ni kubhanga jinga o ukunji bhu pholo ia álaka kala kia tokala mu kitendelelu kia fuama kubhanga o kizuua ni kizuua.

³⁸ Katé a mu tela-ku dingi ni Obede-Edomo, ni makuinhi a samanu ni nake a jiphange jê kumoxi, phala enhá ni Obede-Edomo muenhú, mona a Jedutunu, ni Hosa, akale ene a a xindi kukala alangidi a mielu bhu mabhitu.

³⁹ Ni Zadoke, o nganga uê, kiene kimoxi ni jiphange jê, o jinganga, mbé akale mu bhanga o ukunji bhu pholo ia balaka ia Jihova iakexile kuthala bhuadileka mu Jibiione.

⁴⁰ Phala ende ni kubhana kua Jihova o maujitu a sata ja kuoha, ku thandu dia kalatódio ka jisata jenhojo, mu ithangana iene ioso, kamenié-ngoloxi. Nda o ima ioso iii, phala ikale kala kia i soneka mu kitumu kia xindile Jihova kua Izalaiele.

⁴¹ O Kua ene ku di-ta dingi Hemane, ni Jedutunu, ni ió oso a a solo dingi, a a tumbula ku majina mâ, phala kuximana Jihova, kuma o kulenduka kuê ki kuene kúbhua.

⁴² Kala kiki, ene-phe a kexile kiá kumoxi ni Jedutunu, ia akexile mu xika o jikoloneta ni tungoma, phala kuia ni kuivisa o ingolongondo ioso ia kuxika o jimujika ja mimbu ia kuimbila jinga Nzambi; maji o ana a Jedutunu-phe akexile mu langidila jinga bhu muelu ua dibhitu.

⁴³ Kia zubha kubhita o ima ioso iii, mundu uoso anga a muangana, kala muthu uia ku dibhata diê; o Davidi-phe, anga uvutuka dingi mu ku ta o kizeduise ku dibhata diê.