I Malunda 15 - O Mikanda Ikola

O álaka a i katula m ʼonzo ia Obede-Edomo aia na-iu ku Jeluzaleme

¹ Davidi ua tungu ue jinzo phala muene, mu mbanza ia Davidi; iu ua iudika kididi phala o álaka ia Nzambi, iu ua i tungila balaka.

² Davidi-phe, uixi: Kana muthu utena kuambata o álaka ia Nzambi, kikale ngó o jilevita; kuma Jihova ua a lumbu, phala kuambata o álaka ia Nzambi ni ku mu bhikila katé ku hádia ni hádia.

³ Davidi anga u bhongoluela o Izalaiele ioso mu Jeluzaleme, phala kuambata o álaka ia Ngana, nʼa bande na-iu bhu kididi kiê, bhua i iudikila.

⁴ Davidi anga u bhongolola ana a Alá kumoxi ni jilevita.

⁵ Ku ana a Kohate: Udiiele, muene kilamba kia sobha, ni jiphange jê hama ni makuinhi aiadi.

⁶ Ku ana a Meladi: Azaia, muene o kilamba uala ku pholo ni ku jiphange jê, atena hama jiiadi ni makuinhi aiadi.

⁷ Ku ana a Ngelexone: Jeuele muene o kilamba uala kupholo, ni ku jiphange jê, atena hama ni makuinhi a tatu.

⁸ Ku ana a Elizafane: Semaia, muene o kilamba a mu te kupholo, ni ku jiphange jê, atena hama jiiadi.

⁹ Ku ana a Hebolone; Ediiele, muene o kilamba uala kupholo ni ku jiphange jê, atena makuinhi nake.

¹⁰ Ku ana a Uziiele: Aminadaba, muene o kilamba uala kupholo ni ku jiphange jê, atena hama ni kuinhi ni kiiadi.

¹¹ Davidi anga, uixana o jinganga Zadoke, ni Abiiatale, ni jilevita, à Udiiele, ni Azai ni Jouale, ni Semaia, ni Ediiele, ni Aminadaba.

¹² Hé u a ambela, uixi: Enu, enuʼenu mu ilamba muala kupholo ia jitata muʼaxaxe ka jilevita: Dizelesienu-phe, enu ni jiphange jenu, phala mu bandese o álaka ia Jihova, Nzambi ia Izalaiele, ku kididi ki nga i iudikila.

¹³ Kuma o luadianga ku dimatekenu, kiosuʼiki-phe, enu ki mua kexe-bhu phala ku ki bhanga, Jihova Nzambi ietu, ua tu kuama, mukonda ki tua i takana kala kia tokala mu kitendelelu kiê.

¹⁴ Jinganga-phe, ni akua Levi, anga a di zelesa, phala kubandesa o álaka ia Jihova Nzambi ia Izalaiele.

¹⁵ O ana a mala, ku akua Levi hé a bheka o álaka ia Jihova, bhu isuxi, kala Mozé kia ki tendelela, kala kia tokala mu kizuelu kia Jihova; ni mikambu ia kunhatena ia kexile na-iu hanji ku thandu dia isuxi iâ.

Jingimbidi a a tungula phala kuimba

¹⁶ Davidi anga uambela o ilamba ia akua Levi, kuila: Atungule phala a-te ku pholo o jiphange jâ, o jingimbidi akua kuimba, ni ima iâ ia kuxika jimujika, ni tukoxi, isàka, ni tumbanza, ni jingaieta, phala a xike mu kuzangumuna o dízui ni kusanguluka.

¹⁷ Akua Levi-phe anga a sola Hemane, mona a Jouele; o ku jiphange jê a solo-ko Azafu, mona a Belekiia; o ku ana a Meladi, o phange jâ, asolo-ko ue Etane, mona a Kusaia.

¹⁸ O kua ene kuiza o jiphange jâ, akua kibuka kia kaiadi: Zakadiia, Bene, ni Jahaziiele, ni Semilamote, ni Jeiele, ni Uni, ni Eliiabe ni Benaia, ni Mahaseia, ni Matitiia, ni Elifeleu, ni Mikineia, ni alangi a mabhitu Obede-Edomo, ni Jeiele.

¹⁹ Mu kienhiki o jingimba, Hemane, ni Azafu, ni Etane a evua jinga kuimba ni jimujika ja ngoma ja ngòndo ja kexi mu kuxika.

²⁰ Ni Zakadiia, ni Aziiele, ni Semilamote, ni Jeiele, ni Uni, ni Eliiabe, ni Mahaseia, ni Benaia, akexi mu kuxika isàka ni tukoxi, ku Alamote mbé o kuimba ni mbimbi ia jithele;

²¹ ni Matatiia ni Elifeleu, ni Mikineia, ni Obede-Edomo, ni Jeiele, ni Azaziia, akexi mu kuxika jimbànza ku Seminite phala ku kudisa o dízui mbé kuimba ni mbimbi ia manuma, phala kuendesa kiambote o muimbu.

²² Ni Kenaniia, o kilamba ku akua Levi, a mu tuika o kuimba, iu ua kexile mu ku a longa o kuimbila, kuma muene ua tongolokele kiambote mu kuijiia o kuimba.

²³ O Belekiia ni Elekana ene akexile mu langa o álaka.

²⁴ O Sebaniia, ni Jozafate, ni Natanele, ni Amasai, ni Zakadiia, ni Benaia, ni Eliiezele, o jinganga, a kala mu xika o jikoloneta ku pholo ia álaka ia Nzambi. O Obede-Edomo, ni Jehiia, ene akexile alangi a mielu ia álaka.

Alaka aia na-iu ku Jeluzaleme

²⁵ Kiabhiti-phe, kuila, Davidi ni makota a Izalaiele, ni jikabhitangu ja jimidi, aia ni kusanguluka ku inzo ia Obede-Edomo phala kubandesa o álaka ia kikutu kia Jihova.

²⁶ Anga ki bhita-phe ue kuma, Nzambi mu ku kuatekesa akua Levi ambatele o álaka ia kikutu kia Jihova, abhakuile sambuadi dia tuana tua jingombe ni sambuadi dia ilumbe ia jimbudi, mu kusatela.

²⁷ Davidi anga uia uazuata kizuatu kia linhu ia fina, kiene kimoxi ue ni akua Levi oso ambatele o álaka, ni akua kuimba; o Kenaniia muene o mutumini ua ió oso ambatele o álaka ni jingimba. Davidi ue uazuatele dingi ni kizuatu kia linhu a kixana efodi

²⁸ Kienhiki Izalaiele ioso anga a bandesa o álaka ia kikutu kia Jihova, ni kusanguluka kuoso, ni dízui dia jikoloneta, ni kuxika jimbungu ni jingoma ni isàka, mázui a mingeia ni tukoxi.

²⁹ O kioso-phe, o álaka ia kikutu kia Jihova ki ia bhixila mu mbanza ia Davidi, Mikale, mona a Saúlu ua muhatu, utalela bhu njanena, hé u mona sobha Davidi uala kuiza ni kukina ni kutonoka, anga u mu sebhulula ni muẋima uê.