I Malunda 14 - O Mikanda Ikola

Davidi uta kikutu ni Hilamu

¹ Hilamu-phe, sobha ia Tilu, u tumikisa o jiphunga jê kua Davidi, ni mabaia a misédulu, ni atungi a jonzo ja jindobhi, ni akua kusonga mabaia, phala ku mu tungila inzo.

² Davidi anga ki mu tetulukila, kuila o Ngana Nzambi muene ua mu lumbu mu kukala sobha ku Izalaiele; kuma o utuminu uê ua dikudisa kiengi mukonda dia henda ia Nzambi ku mundu uê ua Izalaiele.

Anʼa Davidi a vualela mu Jeluzaleme

³ Davidi hé usakana ue ahatu avuluʼ mu Jeluzaleme, anga uvuala uê ana mala avulu ni ana a ahatu.

⁴ Enhá ene o majina a ana a mala akexile-nê mu Jeluzaleme: Samuua, ni Sobabe, Natane, ni Solomá.

⁵ Ni Jibale, ni Elisuua, ni Elipelete,

⁶ ni Ngonga, ni Nefeke, ni Jafiia,

⁷ ni Elizama, ni Beheliiada, ni Elifelete.

Davidi utolola akua Fidíxia

⁸ O akua Fidíxia-phe, kievu kuila Davidi a mu hingisa usobha ku Izalaiele ioso, a banda mu kusota Davidi phala ku mu kuta; O muene-phe kia kivu, utunda mu kúlua-nâ.

⁹ Kioso kieza akua Fidíxia, ene oso adizale mu dikôlo dia Lefaíme.

¹⁰ Davidi anga udikunda ni Ngana Nzambi, uixi: Nga-nda kubanda mu kúlua ni akua Fidíxia, eie ua kà a bhakula bhu maku mami? Ngana hé u mu ambela, uixi: Banda, kuma ene oso nga kà ku bhakuila-u bhu maku mé.

¹¹ O kia bande-phe bhu Bahalle-Pelazime, Davidi bhene bhua a jibhila. Davidi anga u ki zuela kuila: Bhu lukuaku luami, bhene o Jihova bhua toluela o jinguma jami, kala ki di muangununa o menha. Kididi kienhokio anga a ki luka exi Pahale-Pelazime.

¹² Bhenhobho bhene bhua xisa jifilisteu o jinzambi ja iteka iâ; Davidi anga utuma ku i oha mu túbhia.

¹³ Akua Fidíxia-phe hé ezá dingi, anga a dizala mu dikôlo.

¹⁴ Davidi hé uia dingi mu kudikunda ni Ngana Nzambi; Ngana anga u muabela uixi: Kua kà bande ku dima diâ ni kua kaiejela; maji u kondoloka kuema diâ; hé ua batuila ku pholo kuala o miẋi ia jimolela.

¹⁵ Kia kà kala-phe kuila, eie kioso ki uívua o kulokosa kua mixindu ia athu a mu kuenda mu ivunda ia jimolela, tunda-phe kiá mu kúlua-nâ; mbata o Jihova ua kà tunda ku pholo iê, mu kubuidisa o kilômbo kia kifuẋi kia akua Fidíxia.

¹⁶ Davidi anga u bhanga kala kia mu tumu Ngana Nzambi; hé a buidisa o ilômbo ia akua Fidíxia, tunde ku Ngibeione katé ku Ngazole.

¹⁷ Kienhiki dijina dia Davidi difumana mu jixi joso jenhojo; o Jihova anga uta uoma uê ku thandu dia mundu uoso uenhó.