I Malunda 11 - O Mikanda Ikola

Davidi a mu hingisa usobha

¹ Izalaiele ioso-phe anga i di bhongolola kua Davidi, bhu Hebolone, exi: Tala, etu tu ifuba iê, tu xitu iê.

² Kioso uê, Saúlu kiala hanji ku usobha, eie muene uakexile mu ku tuamenena Izalaiele mu kutunda ni mu kubokona; o Jihova, Nzambi iê ue, ua kuambelele, uixi: Eie ua kà kala u kabhila ka mundu uami ua Izalaiele, eie-muène ua kà kala u kilolo kia kutuamenena o mundu uami ua Izalaiele.

³ O adikime oso ue a Izalaiele, ene oso eza kua sobha bhu Hebolone, o Davidi hé u-tanâ kikutu bhu Hebolone, bhu pholo ia Jihova; anga a hingisa Davidi ku usobha ua Izalaiele, kala kia tange o kizuelu kia Jihova ku ukunji ua Samuuele.

Davidi utambula o mbonge ia Ziione

⁴ Davidi anga u katuka, ni Izalaiele ioso, iala ku mu kaiela, mu kuia ku Jeluzaleme a muʼidi ue Jebuze mukonda kuenhoko kua kexile o jijebuzé kuma ene akuʼaxi a tungile mu ixi ienhoio.

⁵ O mala atungu mu Jebuze hé ambela Davidi, exi: Eie kutena kubokona mumu. Maji o Davidi-phe utolola o mbonge ia Ziione, iene o mbanza ia Davidi.

⁶ Kuma o Davidi uambele, kiki: Uoso-uoso udianga kutolola jijebuzé muene ua kà kala o dikota ukala mutumini. O Jouabhe-phe, mona a Zeluia, hé udianga kubanda ku dibhatʼodio, kiene kia bhangesa ku mu-ta ku ukota ua kutumina.

⁷ Davidi anga u tunga mu mbonge ienhoio; kiene kia i examena exi mbonge mba sanzala ia Davidi.

⁸ Anga o mbonge u i tungila o mbanza mu jimbandu, tunde ku Milu ni ku i kondoloka katé ni mu jimbandu joso; Jouabe anga u tungulula ue o mbandu ia dibhata iaxala-ku.

⁹ Davidi-phe anga uenda dingi ni kukula kiavulu mu nguzu ni kutena, kuma o Jihova dia Ilômbo uakexile-nê.

O mazonda akexile ni Davidi

¹⁰ Enhá ene o mazonda akexile-nâ Davidi muaxaxe ka ilôlo ia ita, a kutenesa o utuminu uê ni nguzu ioso, kumoxi ni Izalaiele ioso, phala ku mu bhanga sobha kala kia tanga o kizuelu kia Jihova kua Izalaiele.

¹¹ Enhá ene a tundu ku dialuilu dia ilôlo iakexile na-iu Davidi ku jikabitangu: Jokebeiame, mukua Hakimone uakexile o kilolo kia kibuka kia makuinhi atatu a makuenze, muenhú ua katula o ngumba iê iu ua jibha na-iu hama jitatu ja mala, mu kithangana kimoxi.

¹² Ki kua tundu muene, kua bhingana Eleiazale, mona a Dodo mukua Ahohi; muene uakexile muʼaxaxe ka kibuka kia mala kitatu, makuenze.

¹³ Muenhú uakexile kumoxi ni Davidi, bhu Paze-Domine, kioso o akua Fidíxia kia di bhongoluela bhenhobho mu kubhanga-nâ ita. Bhenhobho-phe, o kakididi ka mukáu uenhó kezalele ni sevada; o mundu hé a lenga bhu pholo ia akua Fidíxia.

¹⁴ Muene-phe ni Davidi a di-te mu kaẋi ka kamukáu kenhoko, mbé ku ka bhângela, o akua Fidíxia hé a a jibha-jibha; Ngana anga u bhanga kikalakalu kiónene mu ku a bhângela.

¹⁵ O kitatu ku makuinhi a tatu a atumini, hé a tuluka eza bhu ndànji kua Davidi, mu dibanda dia Adulame; o kilômbo kia akua Fidíxia kia tula kibangu mu dikôlo dia Lefaime.

¹⁶ Davidi-phe uakexile bhu kididi kia kondama, kia nguzu, mu dibanda; maji o masoladi a kilangidilu kia akua Fidíxia kia kexile mu Beleme.

¹⁷ Davidi anga ukala ni hânji, udikumuna, uixi: Nanhi ngó ua kà ngi bhana kúnua o menha ala mu kixima kia Beleme, kiala bhu mbandua-muelu bhu dibhitu?

¹⁸ O kitatu kiókio-phe anga a divubula mu kilômbo kia akua Fidíxia, hé akatula o menha mu kixima kia Beleme, kiala bhu mbandua-muelu; a a zangula anga a a bhekela Davidi; maji Davidi-phe ua ditunu ku a-nua, hé u a lunduluila bhu pholo ia Jihova, kuma ujitu uê ua mu bhana.

¹⁹ Anga uzuela, uixi: Kikôla, Nzambi iami, nuka uehela kubhanga kiki! Kífua ngi-nua muene o manhinga a mala kitatu iá ni mienhu iâ? Mbata o mu kiluezu kia mienhu iâ muene mua bhangesa kuila eza ni menha enhá. Muene anga u dituna muene ku a-nua! Kiki kiene kia bhange o mazonda atatu-ó.

²⁰ Abisai ue, phange ia Jouabe, uakexile mutumini ua kitatu, anga u katula ue o ngumba iê, u jibha na-iu hama jitatu ja jinguma, o dijina diê anga dixala fuma muʼaxaxe kâ.

²¹ Ku kitatu-éki muene ua beta kota ku fuma kiiadi kiambukuá ndenge, anga ukala mutumini uâ; maji ka bhixila bhu kitatu kia dianga.

²² Benaia ue, mona a Joiada, uakexile diiala dia dizonda mu kúlua ni mu ikalakalu iê, uatokalele ku Kabazele; muene hé ujibha mala kiiadi mukuá ni jihoji ja suína, o ana kiiadi a Diiele mukua Mouabhe, hé u kulumuka ue anga u jibha hoji imoxi mu dikungu bhu thembu ia mbambi, kuala o neve.

²³ Ua jibha ue muthu mukua Ijitu, diiala dia kitala kia lebha, kia kóvadu jitatu, o mukua Ijitu uambatele ngumba bhu lukuaku luê, mukua ni muxi ua lunzalu lua mulongo ua mutungi-a-thanga; maji muene ua tuluka iu ua mu kitukila ni mbangala, iu ua tambula o ngumba bhu lukuaku lua mukua Ijitu anga u mu jibha ni ngumba iê-muene.

²⁴ Ima iii, iene ia bhange Benaia, mona a Joiada; anga u fumana muʼaxaxe ka mala atatu enhó.

²⁵ Muʼaxaxe ka makuinhi a tatu a iloloʼoio, muene uabeta kota mu kuditungula. Sumbala kiene, maji kubhiẋila ue bhu kitatuʼokio kiadianga. Davidi hé u mu-ta ku pholo ia alangidiʼê.

²⁶ Enhá ene ilôlo ia kifuẋi kia masoladi akexi na-u Davidi: Azaiele, phange ia Jouabe, Ele-hanane mona a Dodo, ku Beleme,

²⁷ Samote, mukua Ahedi, Heleji, o mukua Pelone,

²⁸ Ila, mona a Ike, mukua Tekoua, Abiiezele, o mukua Anatote,

²⁹ Sibekai, mukua Husa, Ilái, o ahoíta,

³⁰ Mahalai, o mukua Netofa, Helede, mona a Bahena, o mukua Netofa,

³¹ Itai, mona a Dibai, mu Ngibeia; ku ana a Bejamí, Benaia, o mukua Palatone.

³² Hulai, uatokala ku kangiji ka Ngaiaze, ni Abiiele, o mukua Alaba,

³³ ni Azamavete, mukua Baluhama, ni Eliiaba, o mukua Salabone.

³⁴ Ku ana a Haseme, mukua Jizone: Jonata, mona a Saji, mukua Halale,

³⁵ ni Ahiiame, mona a Sakala, mukua Halale, ni Elifale, monʼa Hulu,

³⁶ ni Hefele, o mukua Mekela, ni Ahiia, o mukua Pelone,

³⁷ Hezulo, o mukua Kalame ni Nahalai, mona Ezebaie,

³⁸ Jouele, phange ia Natane, ni Mibale, mona a Ngelaie,

³⁹ ni Zeleke, mukua Amona, ni Kahalaie, o mukua Nelote, uakexile mù kuata o ngubu ia Jouabe, mona a Zeluia.

⁴⁰ Ila, mukua Jetele, ni Ngalebe, mukua Jetele ue,

⁴¹ Udiia, mukua Hiti, ni Zabade, mona a Alaie,

⁴² ni Adina, mona a Siza, mukua Luhene; Suke mu kiki, maji hanhi ku thandu dia ene oso, ku kala o makuinhi a tatuʼá.

⁴³ Hanome, mona a Mahaka, ni Jozafate, o mitinita,

⁴⁴ Uziia, mukua Jitalote, ni Sama ni Jeiele, ana a Hotame, mukua Alouele,

⁴⁵ ni Jediiale, mona a Nzidi, ni Joua phangʼiê, mukua Tiza,

⁴⁶ Ediiele, o mahavita, mukua Mahume, ni Jedibai ni Josaviia, o ana a Elenahame ni Itima, o mukua Mouabhe.

⁴⁷ Ediiele, ni Obede, ni Jahaziiele, akua Mezobaia.