I Kolindo 3 - O Mikanda Ikola

O nzumbi iene ku mundu i bheka kudimuanga mu Ngeleja. Kifika kia dibhia ni inzu

¹ Eme-phe, jiphange, ki ngi tenene ku mi tela maka kala ki ngene mù bhanga ni oso ala ni Nzumbi ia Nzambi. Maji kia ngi bhekelele kuzuela ni enu kala mu akua xitu, kala mu ana auisu mua Kristu.

² Nga mi disa lete, kana kudia kua nguzu, kuma ki mu ku tenene luua. Katé ni kiki ki mu ku tena, kuma hanji muala mú laia ku mundu iú kala mu akua xitu.

³ Mbata ki mua di kala ni dixingʼ okio, enu mua mu di kuata mudienu, kifua ki ki mʼidikiza kuila hanji muala mu akua xitu, muala kuenda mu kikexilu kia athu oso?

⁴ Kuma ki mua mu kuila, eme iú: Ngi mukua Phaulu, eme iú: Ngi mukua Apolo, kifua ki muala kubhanga kala mu athu ngó a mundu iú?

⁵ O kiki-phe, Apolo mukua-hi? O Phaulu ue mukua-hi? Etu tuala-phe ngó tu jingunza ja Nzambi; o kokuetu kuene ku mua xikanena Ngana. Kala muthu mudietu-phe ua mu bhanga o kikalakalu kioso kia mu bhana Ngana.

⁶ Eme nga kunu o mbutu, Apolo ua i tekela, maji o ua i kudisa-phe Nzambi.

⁷ Uila kiki, ua kunu ki kima, ua tekela ki kima, maji o ua kulu-phe Nzambi ua tena kukudisa.

⁸ Maji ni iú ua kunu, ni iú ua tekela, a soko, kuma ene oso ene amoxi. Kala muthu-phe hinu ua kà tambula o nganhu iê kua Nzambi, kioso kia tokala mu kukalakala kuê.

⁹ Kuma etu tuala tu jingunza, tu kalakala kumoxi phala Nzambi, o enuʼ enu muala mu dibhia di bhanga Nzambi o kikalakalu kiê. Enu muala ue mu inzu i tunga Nzambi.

¹⁰ Mu kukalakala ni kiadi kia Nzambi, kioso kia ngi bhana, kuma ngi mutungi a hete, eme nga te disesa bhoxi, o mukuetu iú ua tungu ku thandu diê. Uoso-phe muthu u tunga, a di lange o utungilu uê.

¹¹ Kuma kana muthu u tena kuta dingi disesa diengi, kikale diene ngó diotule kiá kuala Nzambi, muene Jezú Kristu.

¹² Sai athu-phe a tungila-ku ulu ni phalata, ni madiiamande. Amukuâ a tungila-ku mixi, ni madianga, ni iangu.

¹³ Kala muthu, o utungilu uê ua kà di monekena mu kizuua kia Kristu. Mukonda o tubhia tua kizuuʼ ikio, tuene tuà kedikiza o ukalakelu ua muthu ni muthu; kuma o tubhia tuene tu lola o utungilu uê, mba ua kidifua kiahi.

¹⁴ Uoso muthu o thungu iê i xala ia tungila ku disesa kuenhoko, muene ua kà tambula nganhu.

¹⁵ Maji uoso-phe muthu o thungu iê i bhia, nganhu iê ia kà di bota. O muene-ku ua kà bhuluka, maji kuene kua kuila kala muthu ua bhulaka mu tubhia.

¹⁶ Ni kidi kiene, nga fika mua kʼijiia kuma enu muala mu Tembulu ia Nzambi, o Nzumbi ia Nzambi iú ua tungu moxi dienu!

¹⁷ Kala kiki, se muthu u muanga o Tembulu ia Nzambi, muenʼió Nzambi ua kà mu muanga ue. Kuma o tembulu ia Nzambi i kôla, enu uenu mu tembulu iê.

¹⁸ Ki bhu kale muthu u di nganala. Se muthu ua di fika kukala njimu mudienu, ku unjimu ua mu ngongʼumu, a biluke kiôua phala a kale ni kuijiia kua kidi.

¹⁹ Kuma o unjimu ua mundu iú, kua Nzambi uene o uoua. Kiene kia ki soneka mu Mikanda Ikôla, exi: Jinjimu, Nzambi u ji kuatela mu kudimuka kuâ.

²⁰ O bhuamukuâ, exi: Ngana uejiia kuila o ixinganeku ia jinjimu iala kingoho.

²¹ Uila kiki, kana muthu a te thathe ia ima i bhanga o athu. Kuma ima ioso ienu enuʼ enu,

²² kixi Phaulu, kixi Apolo, kixi Phetele, kixi o mundu iú, kixi muenhu, kixi kufua, kixi o ima iala-ku kindala, kixi ima ià keza-ku,— iene ioso iii ienu enuʼ enu;

²³ Enu mu athu a ngene a Kristu, o Kristu muthu ua ngene ua Nzambi.