I Kolindo 2 - O Mikanda Ikola

Uoso o ulongelu ua Phaulu mu Kolindo

¹ Eme-phe, jiphange jami, thembu i nga mi sangediʼ oio, mu ku mi kolela o kidi kia kasuekele kia Nzambi, vulu, mba unjimu uònene.

² Kuma kioso ki nga kexile kumoxi ni enu, ki ngi solele dingi kuijiia kima kiengi mudienu, kikale ngó Jezú Kristu, kota-kota dingi o kufua kuê kua fuile ku dikulusu.

³ Kienhokio, ki ngele ku mi kunda, anga ngi kala mu ʼaxaxe kenu, nga kexi ni nduezu, hé ngi kala mu kuteketa ni uôma uavulu.

⁴ O kuzuela mu kulonga kuami-phe, ni njimbu iami i nga boka jinga, ki kua kexile kua maka ma kaiela mu unjimu ua uzuelelu ua athu, maji kua kexile kua maka ma kaiela mu unjimu ua uzuelelu mu uijidisu ni nguzu ia Nzumbi ia Nzambi.

⁵ Kala kiki, o kuxikana kuenu ku muala na-ku, ki ku imanena mu unjimu ua athu, maji mu nguzu ia Nzambi.

O unjimu ua Nzambi

⁶ Maji-phe eme nga mu tanga o unjimu uene mu ʼaxaxe ka athu a tenena kiá mu nzumbi. Maji kʼ o unjimu-phe ua mu ngongʼ umu, ki unjimu ue ua makota ene kutumina ku mundu, a xikamena kuila o kutumina kuâ kuanda kujima.

⁷ Tu tanga-phe unjimu ua Nzambi mu kijinganu, unjimu ki u monekene mʼ ukulu, Nzambi-phe tunde xàhulu ua tu kanena-u, mu ku bhana fuma, kioso o ngongo kiluua ngó a i bhanga.

⁸ Makota a mu tumina leluʼ idi ku mundu, o unjimu uenʼ iú ka uijiia. Kuma se a uijidile, hinu Ngana ia fuma ka tena ku mu jibhila ku dikulusu.

⁹ Uila kiki-phe, kia ki soneka mu Mikanda Ikôla, exi: Ima kiluua mesu a i mona, kiluua matui a ʼivua, Kiluua ngó muẋima ua muthu u i fika kuila hadia i bhita, Iene ima ia iudika Nzambi mu ku i bhana oso a mu zola.

¹⁰ Maji etu-phe Nzambi ua tu tukuluila-iu kua Nzumbi iê. Kuma o Nzumbi u tungulula ima ioso, katé ni ima ia zongo ia sueka Nzambi.

¹¹ Kuma ku athu kana-ku uejiia ima ia muthu, kikale ngó o nzumbi ia muthu ia mu kala moxi diê. Kiene ue o ima ia Nzambi, ua ijiia muene ngó o Nzumbi ia Nzambi.

¹² Tua tambula-phe, kana o nzumbi iene ku mundu, maji o Nzumbi i tunda kua Nzambi, phala imʼ oio tu ijiie ioso ia tu bhana Nzambi mu ujitu.

¹³ Iene kiá o ima i tuene mú tanga, kana ni maka ma longesa o unjimu ua muthu, maji ni maka ma tu longesa o Nzumbi ia Nzambi. Kienʼ iki ima ia kidi ia tokala o nzumbi tu i lombolola ni maka ma nzumbi, kua ió ala mu nzumbi.

¹⁴ Kuma o muthu kia kala ngó mukutu ua xitu, ua kambe o Nzumbi ia Nzambi, ka tena kutambulula ima ia Nzumbi ia Nzambi, u tokoka ku i tongolola. Mbata phala muène i mu kala uoua, ka tena ku ijiia, mukonda ima i bhinga a i tongolola mu nzumbi.

¹⁵ Muthu uoso-phe uala ni Nzumbi Ikôla, u tongolola ima ioso, muene-phe kana muthu u mu tongolola.

¹⁶ Kala kia ki soneka mu Mikanda Ikôla, exi: Nanhi u tena kuijiia o muẋima ua Ngana? Nanhi muène u tena ku mu longa kaiula? Etu-phe tuala ni kilunji kia Kristu.