I Kolindo 15 - O Mikanda Ikola

O difukunukinu dia Jezú Kristu, kidi

¹ Kindalʼ iki-phe, enu jiphange, nga mesena mu lembalala o Njimbu Iambote i nga mi tudilile. O Njimbu ienʼ iii iene i mua tambulula enu, o kuxikana kuenu ku muala na-ku, muene mu kuemanena.

² O njimbu i nga mi tudila enu, iene o Njimbu Iambote. O mu Njimbu Iambote ienʼ iii muene mu mu bhulukila, se mua i naminina ni lujiji. Mba-phe mu ku i xikana kia mi-iê ngó, se o kuxikana kuenu kua ngoho ku muala na-ku.

³ Kuma o kima kia kate-ku, ki nga tambulula eme uami, ki nga tuamene ku mi tambuisa-kiu, kienʼ iki: Kuila Kristu ua fuidile o ituxi ietu kala kia ki soneka mu Mikanda Ikôla.

⁴ Kuma Muène a mu fundile, mu kizuua kia katatu anga u fukunuka kala kia ki soneka mu Mikanda;

⁵ anga u dianga kutukulukila Phetele, hé u tukulukila kiua o kuinhi ni kiiadi.

⁶ Lua katatu u tukulukila hama jitanu ja axikani bhuamoxi. Ku enʼ ió, ala-ku kota, ala hanji ni muenhu, suke amoxi-ku-phe afu ue kiá.

⁷ Uana, ua tukulukila Tiiaku, o tanu, u tukulukila Jipoxolo joso.

⁸ Kiabhu ene oso, nga sukidila-ku eme, ku ngi tukulukila, kala mona a mu vuala musunda mu nzumbi, o kiene mù vuala akuá ki kiene.

⁹ Kuma ku Jipoxolo joso eme ngala-ku ngi ndenge, ki ngi fuama ku ngʼ ixana ngi Poxolo, mukonda eme nga zukutisile o Ngeleja ia Nzambi.

¹⁰ Maji dioso o ditala-phe di ngeza, nga di bhixila mu kiadi kia Nzambi, o kiadi kiê kia ngʼ idikiza ki kiaii ngó. Inda o jipoxolo ene oso nga a tundu mu kukalakala. Ki ngambe ue ngixi o kikalakalu kiosuʼ iki eme ngó nga ki bhange, maji o kiadi kia Nzambi kiene kia ngi bande.

¹¹ Uila kiki, ki kala-phe eme, ki kala ene, kiene kioso ki kia kuatela kima. Kia kate-ku, kabasa etu oso kiene ki tua kola o maka, enu ue kiene ki mua xikana.

O difukunukinu dia madifundu

¹² Kiki-phe, etu se tua mu kola kuma Kristu ua fukunuka mu ʼalunga, enu amoxi mudienu muala kuila kiebhi kuma ki kuene kufukunuka mu ʼalunga?

¹³ O ki kala ki kuene kufukunuka mu ʼalunga, ni Kristu ue ka fukunuka.

¹⁴ O ki kala Kristu ka fukunuka, etu o kukola kuetu kima kia ngó, ni enu o kuxikana kuenu kima kia ngó.

¹⁵ Kua di te dingi kuila katé ni etu tuala tu jimbangi ja makutu bhu pholo ia Nzambi, kuma Nzambi tua mu bhela umbangi kuila Kristu ua mu fukununa. Se ni kidi kiene o madifundu kene kufukunuka, mbé-phe ni Nzambi ue Kristu ka mu fukununa-ku.

¹⁶ Kuma madifundu kia kamba kufukunuka, ni Kristu ue ka fukunuka-ku.

¹⁷ O ki kala Kristu ka fukunuka, o kuxikana kuenu kua ngó, hanji-phe mua texika mu ituxi ienu.

¹⁸ Se kiene ki kiala, ni ene oso kiá afua jinga mu kuxikana Kristu, a texika.

¹⁹ Se o Krsitu tua mu dielela ngó kunu ku muenhu iú, ku athu oso mu ngongʼumu, etu ene tuala kota mu kuxixima!

²⁰ Maji kiki-phe, Kristu ua fukunuka muene mu ʼalunga ni kidi, iú ua di bhange ngunji ia tu dielelesa kuila athu oso afu kiá hadia ue a kà fukunuka.

²¹ Kuma o ki ejiia o kalunga ku muthu umoxi, ni ku muthu umoxi ue kuene ku ejiia o kufukunuka kua madifundu.

²² Uila ene oso kia fuila mua Adá, kiene ue kia phaphumukina ene oso mua Kristu.

²³ Maji ene oso mu umoxi-umoxi: Kristu muene ua diangela kua ene oso, hé kukaiela oso akua Kristu, muène hinu kià kèza.

²⁴ Kiene kiua kià kèza o dizubhilu. Kristu hinu ua kà zubha-ku o mautuminu oso a nzumbi, ni maungana moso, ni nguzu joso, hé ungana uoso ua kà u bhakuila Nzambi, muène Tata.

²⁵ Kuma Kristu muene ua bhingi u kalaku ku ungana, katé Nzambi kia tolola o jinguma jê joso, hé ua kà ji ta bhoxi dia inama ia Kristu muene.

²⁶ O nguma i sukidila ku i bhuisa-ku, o kalunga.

²⁷ Kuma ambe mu Mikanda Ikôla, exi: Ima ioso Nzambi ua mu tololuela-iu bhoxi dia inama iê. Ki ambe exi: Ima ioso ua i tolola, a kʼ ijiia kuma Nzambi muène ka bokona-mu, uoso ua tolola ima ioso iu ua i te bhoxi dia inama ia Kristu.

²⁸ Maji kioso kia kà zubha ima ioso kutolokela Kristu, hé i kala bhoxi dia ungana uê, kiene ue kiua, o Mona muene, kia kà di tula bhoxi dia ungana ua Nzambi, ió ua tena kutolola o ima ioso, iú ua i tula bhoxi dia ungana ua Kristu. Kienhokio kiene kiua Nzambi kia kà kala mù tumina sé mbambe ku thandu dia ima ioso.

²⁹ Se ki kiene, enʼió à bhanga kiebhi a a batizala phala madifundu? O madifundu se ka fukunuka, mukonda dia-hi ene a a batizala phala madifu-ndu?

³⁰ Ku mbandu ietu-phe, mukonda dia-hi, etu uetu tuemana ithangana ioso mu iluezu?

³¹ Phange jami, eme o kalunga ka ngi zukama izuua ioso! O kienʼ iki se nga ki ambe, nga ki ambela o kuzangalala ku ngala na-ku mukonda dienu enu, mu kisangela ni Jezú Kristu Ngana ietu.

³² Mukonda eme kunu ku Efezu nga bhange mvunda, mukuá ni muthu ulua ni iama ia mukau. O kiki-phe se nga ki bhange ngó mukonda dia ima ia xitu, ngiia-phe kima kiahi ki nga nganhala-ku? Se ni kidi kiene o madifundu ka fukunuka, tu bhangienu kala ki ambe o Sabhu, kuila: Tu dienu-tu, tu nuenu-tu, o mungu tu kane kufua.

³³ Kana kudinganala! O ku di lunga ni athu aiibha, ku bolesa o ifua iambote.

³⁴ Phaphumukenu, mu kuate kilunji ni muenhu uaiuka kala kia fuama, kana dingi kuta ituxi. Kiki nga ki ambela o ku mi kuatesa jisonhi, kuma amoxi-moxi mudienu Nzambi ka mu ijiia.

O difukunukinu dia mukutu

³⁵ Sai-phe ni iú uanda kuibhula kuila: O madifundu-phe a fukunuka kiebhi? Hinu ene à kèza ni mukutu ua kidifua kiahi?

³⁶ Ioua ia hatu! Kioso enu ki mu kuna o mbutu mu mavu, ki kale ifua, phala ni i sabhuka.

³⁷ Kiene muene! O kima ki u kuna, u kuna ngó lumbundu lua hatu, mba lumbundu lua tiliku, mba lua mbutu ioso-ioso, ku kunu mukutu ua di bhange kiá kixina kioso-kioso hinu kianda kuiza-ku mu kukula.

³⁸ Nzambi-phe u lu bhana o mukutu uoso ua mu uabhela muène, kala mbutu ni mukutu uê.

³⁹ Xitu ioso ia iama ki iene imoxi, kana! Sai xitu ia athu, sai xitu ia iama, sai xitu ia jinjila, sai ue xitu ia jimbiji.

⁴⁰ Sai ue mikutu ia diulu, sai mikutu ia bhoxi. O mikutu ia diulu-phe o uuabhelu uê uengi, o ia bhoxi uuabhelu uê uengi.

⁴¹ Sai kubenha kuku kua dikumbi, sai kubenha kuku kua mbeji, sai kubhenha kua jithethembua. Sai ni thethembua i tunda mukuá mu kubenha.

⁴² Ni mu kufukunuka kua madifundu ue kiene. O mukutu kioso kia u funda, mukutu ua di fila; maji o ki u fukunuka, ua kà kala mukutu ki ufu dingi.

⁴³ O uene kioso kia u funda, u sanga uaiibha, ua botomoka; maji o kioso ki u fukunuka, u sanga ua uabha, ua di sanze.

⁴⁴ Kioso kia u funda, mukutu ua xitu; maji kioso ki u fukunuka, u kala mukutu ua nzumbi. Kia kidi kuila, se sai-ku mukutu ua xitu, sai-ku-phe ue mukutu ua nzumbi.

⁴⁵ Mukonda o Mikanda Ikôla, iexi: Adá ia diangele-ku, a mu bhangele mukutu u bhuima. Maji o Adá ia sukidila-ku, Nzumbi i bhana muenhu.

⁴⁶ O kia dianga-ku-phe ki kia nzumbi, maji kua dianga kia xitu; kueza kiua kia nzumbi.

⁴⁷ O Adá ia diangele-ku, a mu bhangele ni mavu ma bhoxi, o Adá ia kaiela-ku ua tundile mu diulu.

⁴⁸ Oso a tokala bhoxi, a di fuangana ni ió a mu bhangele ni mavu ma bhoxi. O ió oso a tokala ku diulu, a di fuangana ni Ió ua tundile mu diulu.

⁴⁹ Mukuâ ni ki tua di fuangana ni muthu ió a mu bhangele ni mavu ma bhoxi, kiene ue ki tua kà di fuangana ni Muthu ió mukua diulu.

⁵⁰ Ngambe-phe kiki, enu jiphange jami, kuma: O kima kiobhange ni xitu ni manhinga ki ki tena kubhingana mu Utuminu ua Nzambi; o kiokio ki-fua, ki ki tena kukala ni muenhu ki uene dingi kufua.

⁵¹ Ivenu kiambote o kijinganu ʼiki: Etu ene oso ki tua kà sokela-ku mu kufua, maji etu ene oso tua kà kituluka muʼ anzanzʼomo.

⁵² Mu kithangana kia kuila o diesu pote, kioso hadia ki xika o koloneta ia sukidila-ku. Kuma o koloneta ia kà xika, o madifundu ma kà fukunuka ni muenhu ki uene dingi kufua, etu oso anga tua kà kituluka kiengi.

⁵³ Kuma o mukutu iú ua kalunga, ki bhinga u zuata ió ki u-fu dingi, ni iú uanda kufua, ki bhinga uzuata ió ua muenhu ki uabhua.

⁵⁴ Uila kiki, o mukutu iú ua kalunga, ki ua kà zuata ua muenhu ki uabhua, o ió ufua ki ua kà zuata ió ki u tena dingi kufua, kiene kia kà bhita kiokio kiosoneke mu Mikanda Ikôla, kuila: Kalunga a mu sengulula. O kikôue kia ku mu tolola kia tenena!

⁵⁵ Eie, kalunga, o kikôue kiê kiebhi? Eie, kalunga, o nguzu iê ia kujibha iebhi?

⁵⁶ O munomo ua kulunga phala ku tena kujibha, o ituxi; o nguzu ia ituxi, o Kitumu.

⁵⁷ Maji tu sakidilienu-phe Nzambi, ua tu bhana o kikoue mua Ngana ietu Jezú Kristu.

⁵⁸ Uila kiki, enu phange jami, kolokotenu, ki mu toloke. Mu suine jinge mu kikalakalu kia Ngana, kabasa mua kʼ ijiia kuma Ngana se mua mu talela hadi, o hadi ki i kala ia ngó.