I Kolindo 14 - O Mikanda Ikola

O upolofeta kota, kuzuela jimbimbi ndenge

¹ Kaielenu o henda. Sotenu ue ni muanu o mauhete ma nzumbi, kota-kota-phe ua kukola o Njimbu ia Nzambi.

² Kuma uoso u zuela mu mbimbi jengi, ki athu a zuelela, maji ua zuelela Nzambi, mukonda kana muthu uevu-mu. O ia zuela mu Nzumbi-phe ua tange kidi kia ima iajingana.

³ Maji uoso u kola o Njimbu ia Nzambi, u zuelela athu o maka ma ku di banda, ni ku di suinisa, ni kudikonda malamba.

⁴ Uoso u zuela mu mbimbi jengi, ua di kuatekesa ngó muène, maji uoso-phe u tanga o Maka ma Nzambi, u kuatekesa o Ngeleja ioso.

⁵ Nginda-phe kuila, enu oso mu zuelela mu jimbimbi jengi, maji inda kotakota dingi nga mesena mu kala ni uhete ua kutanga o Maka ma Nzambi. Kuma uoso u tanga o Maka ma Nzambi uala kota, o u zuela ni jimbimbi jengi ndenge, kuma ki bhinga bhu kala muthu u tena kulombolola ioso ia mu zuela, phala o Ngeleja ioso nʼ a i kuatekese mu nzumbi.

⁶ Kala kiki, eme jiphange, se ngi mi sanga mu ku mi kunda ku mualʼ oko, ni ngi kuata kuzuela jimbimbi jengi, ngi mi bhandulula-hi? Ki mu bhanduluka-ku kima, se ngi kamba kuta maka ma kujingununa o ima ia Nzambi, mba ma kuijidisa, mba ma upolofeta, mba maka ma umesene ua kulonga.

⁷ Tala hanji, katé ni imbamba ia kambe muenhu, ia kuxika, kixi mbèndu, mba mbânza, se i kamba kulombolola kiambote o jithele ni manuma, a kʼ ijiia kiebhi kioso kia xiki?

⁸ Se muthu u xika koloneta, anga dizui di kamba kulomboloka, nanhi u manekena kuia ku ita?

⁹ Kiene ue kimoxi, enu se mu tela akuenu maka ni dimi diengi di kamba kujimbuluka kiambote, ene a kʼ ijiia kiebhi kioso ki mua zuela? Mu ila kala muala kuzuelela o kitembu!

¹⁰ Kuma sai mu ngongo mauzuelelu mavulu, maji kana-ku-phe uzuelelu ua kambe o dijimbuluilu.

¹¹ Eme-phe se ima ia mu ngi zuelela muthu, o dijimbuluilu diê ki nga dʼ ijiia, uoso ua zuela ngi mu kala ngi kabinji kê, o ua zuela eme uami u ngi kala kabinji.

¹² Kiene kimoxi ue enu, kuma mua bhindamena mauhete ma nzumbi, kota-kota-phe Sotenu kukala ni mauhete moso ma bhangesa o Ngeleja kukala dingi mu nzumbi.

¹³ Uila kiki, uoso u zuela ni mbimbi jengi, a sambe phala a mu bhane ni uanji ua ku ji lombolola.

¹⁴ Kuma eme se nga sambe mu mbimbi iengi, o nzumbi iami ia sambe muene, maji o kilunji kiami kia seluka, kuma ki kiala-ku ni mbandu.

¹⁵ Ngi bhanga-phe kiebhi? Ngi samba ni nzumbi, maji ngi samba ue ni kilunji. Ngʼimba ni nzumbi, maji ngʼ imba ue ni kilunji.

¹⁶ O ki kala u sakidila Nzambi ngó ni nzumbi, ió uoso uala kiximba ua xikama-nê bhu kididi, uanda kuila kiebhi, Amén, ki a ku ivu ua sakidila, o muene ki ua zuela ki ki mu jimbulukila?

¹⁷ Eie mu kusamba kué, né ua sakidila kiambote Nzambi, mukuenu-phe ku mu kuatekesa ni kima.

¹⁸ Eme nga mu sakidila Nzambi, kuma eme nga mi tundu enu oso, mu kuzuela ni jimbimbi jengi.

¹⁹ Sumbala kiene, maji kioso ki tu bhongoloka mu Ngeleja, nginda ngi zuela ngó izuelu itanu athu oso i evua ni kilunji, ni ngi longe akuetu, nguami kuzuela kuinhi dia midi dia izuelu mu mbimbi jengi.

²⁰ Jiphange, kana kuxinganeka kala mu anandenge. Mu iaiibha mu kala mu ana auisu, maji-phe mu kuxinganeka mu kala mu adiakimi.

²¹ A ki soneka mu Mikanda Ikôla, exi: Mundu iú ngi u tela maka ku akua madimi mengi, ngi u zuelela ku mizumbu ia athu a kambe ene ku a ejiia. Maji né-mbe nga ki bhange-phe, mundu uami ka xikina ku ngʼ ivua eme ngi Ngana.

²² Uila kiki, o uhete ua kuzuela o jimbimbi jengi, kijimbuete, kana kia athu a xikana, maji kia athu a kambe kuxikana. Maji o ujitu ua kutula o Maka ma Nzambi-phe, kijimbuete, kana kia ió a kambe kuxikana, maji kia ene jikidistá a xikana.

²³ Xinganekenu hanji bhuoso bhu kala o Ngeleja ioso ia di bhongolola, ene oso anga a kala mù zuela ni jimbimbi jengi. Se mu bokona iximba, mba iá a kambe kuxikana, manhi kanda kuila exi, mua saluka?

²⁴ Maji ene oso-phe se a kala mù tanga o Maka ma Nzambi, anga mu bokona muthu ua kambe kuxikana, mba uala kiximba, uivua ioso i mua mu zuela anga phata i mu bhua, hé u toloka mukonda dia ituxi iê. Kuma ima ioso i evua uanda kudiela.

²⁵ O ikutu ia muẋima uê anga i tukuluka hé ki mu bhangesa kufidimika pholo bhoxi ni kubeza Nzambi, anga u zuela, uixi: Nzambi uala mudienu, ni kidi kiene.

O kultu a i bhitisa kioso kia fuama, ni mu uiukilu uê

²⁶ Muedi-phe kiebhi, enu jiphange? Ngandala ku mi ambela kiki: O ki mu bhongoloka mu Ngeleja, iú u kuata muimbu, iú u kuata maka ma kulonga, iú u kuata kujingununa ima ia jinganana ia Nzambi, iú u kuata kulonga mu mbimbi jengi, o iú u kuata kulombolola kioso kia jimbulula o maka a mu longa ió. Inda ima ioso mu i bhanga kala kia fuama mu kukuatekesa o Ngeleja.

²⁷ Se bhu kala athu a zuela ni mbimbi jengi, a kale ngó kiiadi, mba ki a vula kitatu, anga mu kuzuela a di kaiejela, hé bhu kala ue ni iú u lombolola.

²⁸ Se o mulombolodi u kamba mu Ngeleja, a di xibhe, a di zuelele ngó ene ni Nzambi.

²⁹ O ki bhu kala kiiadi mba kitatu a tambula maka kua Ngana Nzambi phala ku a tudila akuá, enʼ iâ a zuele, maji akuá a kale mù tongolola kioso kia mu zuela ene.

³⁰ Se mukuá ua xikama-bhu, kua mu tukulukila ue Njimbu ia Nzambi phala ku i tangela akuá, uoso ua kexi mù zuela a di xibhe.

³¹ Enuʼ enu oso mu tena kutula o Njimbu ia Nzambi mu umoxi-umoxi, phala ene oso a di longe, a di bhetule o miẋima.

³² Uoso-phe u zuela, ua fuama u di langa kiambote ni uhete uê ua kutula o Njimbu ia Nzambi.

³³ Mukonda ue o Nzambi ka tu ixanena phala ni tuende ni kubhanga kavanza, maji ua tu indi ima ioso tu i ta mu ididi iê.

³⁴ Kala ki ene kubhanga mu Jingeleja joso ja akua Ngana, ahatu enu a fuama a di xibha mu Jingeleja, kioso ki mu bhongoloka jinga mu kubheza. Kuma ene ka a bhana disesa dia kuzuela. Kala kiambe o Kitumu kia Jijudé, ene ka tokala ku a bhana kididi kia kutumina.

³⁵ Se andala ebhula kima kioso-kioso, ebhule à muadi uâ ku bhata. Mukonda kima kia jisonhi phala muhatu o kuzuela mu ionge ia Ngeleja.

³⁶ Kifua o maka ma Nzambi ma tundu ku mualʼ enu? Inga a mi sange phala ngó enu ubheka uenu?

³⁷ Se bhuala muthu ua di fika kukala mukunji ua Nzambi mba uala ni uhete ua nzumbi, a tume ku kʼ iijiia kuma ima i nga mi sonekenʼ iii, ijila iene Nzambi.

³⁸ Maji se sai muthu ua huku, a kadiê ni kuhuka kuê, kana ue muthu u mu suua.

³⁹ Uila kiki, phange jami, bhindamenenu jinga o kutula o Njimbu ia Nzambi. Maji kana ue kukidika o kuzuela ni jimbimbi jengi.

⁴⁰ Kala kiki, ima ioso-phe mu i bhanga mu ujitu, ni mu uiukilu uê.