I Jisobha 20 - O Mikanda Ikola

Ita bhu kaẋi ka Akabe ni sobha ia Sídia

¹ Anga Bene-hadade, sobha ia Sídia, u bhongolola o masoladi ê oso a ita; anga u kala kumoxi, ni makuinhʼatatu a jisobha ni jiiadi, ni jikabalu ni makalu; anga u banda, hé u kondoloka Samádia, anga u lua-nê.

² Anga u tumikisa jiphunga mu sanzala, kua Akabe, sobha ia Izalaiele,

³ anga u mu ambela, uixi: Behe-hadade ua tumu ku kuambela kiki: O phalata ié ni ulu ué, iami-eme; ni ahatuʼé ni anʼé a betamu kuuabha, ami-eme.

⁴ Anga sobha ia Izalaiele uitaia, uixi: Maka mé u ua zuela, eie u sobha, ngana iami, kia uabha! Eme nga kutokala, ni ima ioso i ngala na-iu.

⁵ Anga jiphunga jiza dingi, exi: Bene-hadade uambe kiki: Sumbala hanji nga tumine ku kuambela ngixi: Eie uandu ngi bhana phalata ié, ni ulu ué, ni akajʼé ni anʼé;

⁶ zekela-kiu kuma mungu bhu kumbi ʼla didi, nga-ndu tumikisa akua mbèle iami ko kué, anga a solokota inzo ié, ni jinzo ja akua mbèle ié anga a katula-mu o ima ioso ia a uabhela ku mesu mâ, anga a i ambata.

⁷ Bhenhobho o sobha ia Izalaiele uixana adiakimi oso mu ixi, anga u ambela, uixi: Kindala batekelenu-kiu ni mu mone o muthu iú kia mu sota o mvunda nʼetu; mbata muene ua tumine ku ngi bhinga akajʼami, ni anʼami, ni phalata iami, ni ulu uami, ki nga mu ditunu-iu.

⁸ Anga adiakimi oso, ni kifuẋi kioso a mu ambela, exi: Ió kana ku mu bhana mátui, né ue kuxikana kioso kiandala muene.

⁹ Bhenhobho Akabe uambela o jiphunga ja Bene-hadade, uixi; Ka tangedienu sobha, ngana iami, muexi: Ima ioso i ua dianga kubhinga mubhikʼé, ngi i bhanga, maji o kiki-phe kia ngi bhingi kindala, ki ngi tena ku ki bhanga. Anga phunga ji vutuka ni njimbu iii.

¹⁰ Anga Bene-hadade u tuma ku mu ambela, uixi: Jinzambi ji ngi bhange kioso ki ja mesena, ni kia mukuá dingi kuma o fufuta ia Samádia ki ia-ndu soka phala kuizalesa o maku ma kifuẋi kioso kia mu ngi kaiela.

¹¹ Sobha ia Izalaiele-phe u vutula, uixi: Uoso uala kuzuata o phonda, ka di nanze kala ió ua mu zula o phonda.

¹² Anga ki bhita-phe kuma, muene kievu kizuelu kiki, mu jifundu muala ni jisobha nʼakuá mu kúnua, uambela akua mbèle iê, uixi: Di bhakienu mu ididi phala kúlua ni sanzala.

¹³ Bhenhobho polofeta imoxi u zukama Akabe, anga u mu ambela, uixi: Ngana uambe kiki: Eie ua mono o kifuẋi kioso kiavulu kiki? Talesa kuma, lelu muene nga-nda ku ku bhana-nâ bhu maku mé, nda uijiie kuma ememuène ngi Ngana.

¹⁴ Kuala Akabe: U ngi bhela-nâ kua nanhi? Muene uixi: Ngana uambe kiki: Ngi ku bhela-nâ ku makuenze ma ilamba ia jisengu. Eme muene: Nanhi uandu mateka mvunda? Muene uixi: Eiemuene.

¹⁵ Bhenhobho Akabe u tanga hanji makuenze a ilamba ia jisengu anga u mona kuila a tena hama jiiadi ni makuinhʼatatu ni kiiadi; anga ku dima diâ u tanga kiua o kifuẋi kioso kia ana oso a Izalaiele hé u mona kuila a tena sambuadi dia midi ia muthu.

¹⁶ Anga a tunda mu kaẋi ka kizuua, kienhoko Bene-hadade uala mu kúnua ni kukodiua mu jifundu, ni muene ni makuinhʼatatu a ʼsobha ni jiiadi, jejile ku mu kuatekesa.

¹⁷ Bhenhobho o makuenze a ilamba ia jisengu a dianga kutunda mu mbonge; anga Bene-hadade u tuma-ku amoxi, eza ku mu dimuna, exi: Mu Samádia mua tundu malʼamoxi-mu.

¹⁸ Muene uixi: Ene nè-mbe a tundila uembu uene, a kuatienu ni muenhu uâ; o ki ela-phe a tundila kubhanga, a kuatienu muene ni muenhu uâ.

¹⁹ Makuenze a ilamba ia jisengu-phe anga a tunda kiua mu sanzala, ni kifuẋi kioso kia masoladi kiza ni ku a kaiela.

²⁰ Ene anga a jibha kala muthu ni muthu uê, anga akua Sídia a lenga; hé Izalaiele uia ni ku a bhesa lusolo. Benehadade-phe, sobha ia Sídia, u lenga ku kabalu kê, ni amoxi-mu endela ue ku jikabalu.

²¹ Sobha ia Izalaiele-phe anga u tunda, hé u jibha o jikabalu, o makalu u a bula-bula; akua Sídia anga u a jibha ni kijibha kia dikota.

²² Bhenhobho o polofeta u zukama kua sobha ia Izalaiele anga u mu ambela, uixi: Ndoko, kolokota, anga uila ku mesu suí, ni u tale kioso ki ua-nda kubhanga; mukonda mu muvu umoxi, sobha ia Sídia ua kà banda dingi mu kúlua nʼeie.

²³ Mbata akua mbèle ia sobha ia Sídia a mu ambela, exi: Ene ki a betesa nguzu etu ndenge, mukonda jinzambi jâ jinzambi ja milundu; tu di betele-nâ hanji mu mukáu ua sokelela, nda tu mone; ku kidi muene tua-ndu mona kuma etu kota nguzu ene ndenge,

²⁴ eie-phe u bhanga kiki: Uila jisobha, u ji katula bhu ididi iâ, anga bhu ididi iâ u bhinganesa-bhu jikabhitangu.

²⁵ Anga ualeka kifuẋi kiengi ki soka mukuâ ni kifuẋi kia ku jibhila, ni jikabalu kala jiná ji tuele na-ju, ni makalu kala ianá u tuele-nâ anga tu di betela-nâ mu mukáu ua sokelela, tu mone hanji mba etu ki tua beta nguzu ene ndenge! Anga muene u bhana mátui ku dízui diâ, hé u bhanga kala kia mu ambela.

²⁶ Anga ki bhita muene kuila, kia bhiti o muvu, Bene-hadade u bhita ni kukinda mu akua Sídia, anga u banda ku Afeke, mu kúlua ni Izalaiele.

²⁷ O anʼa Izalaiele ue a di kinda hé a di bhongola, anga a a uanena o huta, hé a tunda mu kúlua-nâ; anga anʼ Izalaiele a ta kibhangu kiâ ku pholo ia akua Sídia, u fika kala tuilunga tu-iadi tua jihombo; maji akua Sídia-phe a di zale mu ixi ioso.

²⁸ Anga kubhiẋila muthu ua Nzambi, hé u zuelesa sobha ia Izalaiele, uixi: O Jihova uambe kiki: Mukonda dia kuila akua Sídia a-mbe: Jihova, Nzambi ia milundu, ki Nzambi ue ia jihonga, eme kifuẋi kiki kioso kia akua Sídia, nga-nda ku a bhana bhu maku mé, eie nda uijiie kuma eme-muène ngi Ngana.

²⁹ Ene oso anga a kala bhu kilômbo sambuadi dia izuua, athu ku pholo ia akuá; anga ki bhita kuma, kia bhixila o kizuua kia kasambuadi, mvunda i mateka; anga anʼa Izalaiele a jibha hamʼa midi ia muthu mu kizuua kimoxi ku akua Sidia a mu ku endela bhoxi.

³⁰ Anga a xala-bhu, a lengela mu sanzala ia Afeke, hé a suama momo; maji enhó, a xala-bhu, kimbaka kia a lundumukina, anga ki jibha makuinhʼaiiadi ni sambuadi dia midi ia muthu. Benehadade-phe ua lenge, anga uiza mu sanzala, hé u kala mukuila u bokona inzo, u tunda inzo, ni kusuama-suama.

Akabe u tolola akua Sídia anga u kuata ukamba ni sobha iâ

³¹ Bene-hadade bhenhobho akua mbèle iê a mu ambela, exi: Talesa, ene mu ku tu tangela kuma jisobha ja dibhata dia Izalaiele akua henda; tu zuatienu-phe makuba mu mbunda, ni tu te mikolo mu xingu, phala tuie kua sobha ia Izalaiele, phala tu tale mba eie u ku bhaka ni muenhu ué.

³² Bhenhobho a di kuta makuba mu mbunda, ni mikolo bhu jixingo, anga eza kua sobha ia Izalaiele, exi: Mubhikʼé Bene-hadade uambe kiki, uixi: Ngʼehele ngi kale ni muenhu. Kuala sobha ia Izalaiele: Mbé iú-uê hanji ni muenhu? Kuma muene phangʼiami!

³³ Mala ió anga a ki kita mbote, kuma a mono ki kuala muxita; anga a kuata o kizuelu kiê ni lusolo luoso, exi: Phangʼié Bene-hadade iú-uê ni muenhu. Kuala muene: Izenu, mu ngi bhekele-nê bhabha! Bene-hadade bhenhobho u tunda bhua suamene, muene hé u mu bandesa mu dikalu diê.

³⁴ Bene-hadade hé u zuela, uixi: Ngi ku vutuila o jisanzala tatʼetu ja tambuile kua tatʼenu, eie anga u bhanga ikoka ié mu Damasku, kala tatʼetu kia i bhangele mu Samádia. Anga Akabe u mu vutuila, uixi: Ki tua bhange kiá o kikutu kiki, ngi kueha kia nda uié. Anga Akabe u bhanga-nê o kikutu kia ukamba, anga u mueha kuiê.

³⁵ Bhenhobho umoxi mu anʼa jipolofeta, mu kizuelu kia mu tumu Ngana, uambela mukuá, uixi: Ndoko, ngi kuame. Anga mukuá u dituna ku mu kuama.

³⁶ Anga muene u mu ambela, uixi: Mukonda dízui dia Ngana kua di tumaka, ua-nda ku ki mona, kuma mu ku di uanununa ngó nʼeme, hoji ia kà ku jibha. Anga ki bhita kuila, kia di uanununa-nê, hoji i mu sanga anga i mu jibha.

³⁷ Ku pholo ua sange dingi muthu uammukuá, anga u mu ambela, uixi; Ndoko, ngi kuame. Muthu ió anga u mu kuama; o kia mu kuama anga u kuata ku mu toma-toma.

³⁸ Bhenhobho polofeta uia, anga uimana mu njila mua-nda kubhita sobha, ni utôkua ua di bongola-nâ mu mesu-mê phale sobha ka mu ijiie.

³⁹ Anga ki bhita kuma, sobha kia kala mu bhita, muene u dikolela sobha, uixi: Mubhikʼé ua tundu mu kaẋi ka ita, ku kua tundu dikuenze, ni muthu a ngi bhekela-nê uixi: Ngi bhakele muthu iú; o kia kamba-bhu, muenhu ué-eie ua kà bhingana bhu kididi kia muenhu uê, mba ua kà futa talendu imoxi ia phalata.

⁴⁰ ʼKì kia bhiti-phe kuma, o mubhikʼé kia landuka ni kututumba kuku ni koko, mu kathangana muthu io ka moneka. Bhenhobho sobha ia Izalaiele u mu ambela, uixi: Kuata ku lubhe lué, kuma eie-muène kiá ua di batuilʼé.

⁴¹ Bhenhobho muene u kukumuna lusolo o utôkua mu mesu mê; anga sobha ia Izalaiele u mu ijiia, kuma ua tokala mu jipolofeta, musesedi.

⁴² Muenhú uambela sobha uixi: Jihova uambe kiki: Mukonda muthu nga ku tele-nê bhu lukuaku phala ku mu jima mbutu, eie ua mu jitulʼé bhu lukuaku lué; muenhu ué ua-ndu bhingana bhu kididi kia muenhu uê, o kifuẋi kié ki bhingana bhu kididi kia kifuẋi kiê-muène.

⁴³ Anga sobha ia Izalaiele uia ku bhata diê, ua luuala, ku muxima kua mu lulu, ua thathamana; anga u bhixila mu Samádia.