I Jisobha 2 - O Mikanda Ikola

Solomá anga u mu ambela, uixi: Ndaié ku bhata dié. Davidi mu kufua u lekela Solomá, monʼê

¹ Kiki izuua ia Davidi kuila i mu zukama, ia kúfua, Davidi u tendelela Solomá monʼê, uixi:

² Eme nga muia mu njila iene mu kuila o mundu uoso; eie-phe kola muẋima u kale u iala

³ Kumbidila o utuminu ua Jihova Nzambi ié, u ende jinge mu njila jê, u aluke o ijila iê, ni itumu, matetuluilu mê, ni maumbangi mê, kala kia i soneka mu ngonge ia Mozé, phala u kale ni kubhanduluka mu ima ioso i u bhanga, ku ididi ioso ku u di tela.

⁴ Phala Jihova ue a kumbidile o kizuelu kiê kia ngi bhele, uixi: Anʼé se a di langa o kuenda kuâ, nʼendela bhu pholo iami mu kidi, ni muẋima uâ uoso, ni muenhu uâ uoso, nga ki ambe kuma, ki kuà ku kamba muthu ué u ku bhingana bhu kiandu kia Izalaiele.

⁵ Kima kiamukuá eie ua kʼijiia kioso kia ngi bhanga Jouabe, monʼa Zeluia, kioso muene kia bhanga o kabhitangu jiiadi ja ifuẋi ia Izalaiele, Abinele monʼa Nedi, ni Amasa monʼa Jetele, ua a jibha, iu ua ẋamuna o manhinga ma ita mu thembu ia paze, iú ua ta o manhinga ma ita ku phonda iê ia zuata mu mbunda, ni mu jisabhatu jê ja te ku inama.

⁶ Eie-muène kiá u ijiia kioso ki u mu bhanga, maji o jimvi jê ki ji bhiẋile mu mbila ni kutululuka.

⁷ Maji o anʼa Badizilai-phe, mukua Ngiliiade, a kuatele muene henda, a kale akua kúdia ku meza mé; kuma ene uâ kiene kia ngi bhangele, thembu i nga lenga kota dié Abisalone.

⁸ Muthu uamukuá ua xala-nê Simeii, monʼa Ngela, mukua muiji ua Bejamí, mukua bhata bhu Bahudimi, ua ngi xingile jindaka javulu jaiibha kizuua ki nga kexe mù-ia bhu Mahanaíme; maji uejile-phe ku ngi batuila bhu tabhu dia Njolodá, eme anga ngi mu lokela mu dijina dia Jihova, ngixi: kana, ki ngi ku jibha ni xibhata.

⁹ Ko kué-phe ka kambe kikuma; kabasa eie uala u hete, eiemuène kiá u ijiia kioso ki ua kà tokala ku mu bhanga; maji o jimvi jê ua kà ji bhiẋidisa mu mbila ni manhinga.

O kùfua kua sobha Davidi

¹⁰ Davidi anga uia ku kilu kumoxi ni jitata je, anga a mu funda mu mbonge ia Davidi.

¹¹ O izuua ia bhange Davidi ni kutumina Izalaiele, makuinhi auana a mivu; sambuadi dia mivu dia tumina mu Hebolone, o makuinhi atatu a mivu ni itatu, a tumina mu Jeluzaleme.

Salomá ua xala ni ungana, u jibhisa Adoniia, ni Jouabe, ni Simei. O kufua kua Adoniia

¹² Solomá anga u xala ua xikama bhu kiandu kia tatʼâ Davidi, utuminu uê anga u kuata kiambote muene kiavulu.

¹³ Thembu ioio Adoniia, monʼa Hakiti, uiza kua Bete-seba, mamʼâ Solomá. Bete-seba anga u mu ibhula, uixi: Kueza-hi? Eie ueza ni paze? Kuala muene: Ngʼeza muene ni paze.

¹⁴ Anga u mu kumuna, uixi: Ngʼeza ku ku tela tumaka. Uixi-phe: Zuela.

¹⁵ Kuala muene: Eie ua kʼijiia kuma o ungana ua usobha ua kexile uami, o Izalaiele ioso eme-muène a ngi lungile jipholo ni ku ngi tala, mukonda eme, a ngi fikile ku u hinga; maji-phe ungana ua biluluka, ua xala ua ndengʼiami; kuma Jihova muene ua mu bhana-u.

¹⁶ Kiki-phe nga mesena ku ku bhinga ngó kima kimoxi, kana ku ngi ditunakiu. Uixi: Zuela-kiu.

¹⁷ Muene-phe uixi: Nga ku diondo u ngi zuelele kua Solomá, muenexi, kuma eie ka tena ku ku dituna, a ngi bhane Abisaki, mukua Suneme, mbé a kale mukajiʼami.

¹⁸ Bete-seba, uixi: Kiauabha; ngi ku zuelela kua muenexi.

¹⁹ Bete-seba anga uia kua Solomá, mu kuzuelela Adoniia. Muenexi anga u balumuka mu takana-nê, u mu bhetamena, anga u xikama kiua bhu kiandu kiê; hé u bhekesa-bhu ni kiandu kiamukuá kia mamʼâ muenexi kuxikama; Bete-seba hé u xikama ku lukuaku luê lua kúdia.

²⁰ Bhenhobho u mu ambela, uixi: Nga mesena ku ku bhinga kama ngó kamoxi; kana ku ngi dituna-ku. Muenexi anga u mu ambela, uixi: Ngi bhinge, mamʼetu; ki ngi ku ditunu, ni ngi ku sonokesa o pholo.

²¹ Uixi-phe: Nga ku bhingi kuila Abisaki, mukua Suneme, a mu bhane phangʼié Adoniia, mu kala mukajiʼê.

²² Sobha Solomá anga u kumbulula mamʼâ uixi: Adoniia u mu bhingila kiebhi Abisaki, mukua Suneme? Ku mu bhingila-hi ue kiá ni ungana uene, kuma muene kota diami? Ngambe, mu bhingile kiá muene, ni nganga Abiiatele, ni Jouabe monʼa Zeluia.

²³ Sobha Solomá anga u lokela bhenhobho mu dijina dia Jihova, uixi: Nzambi a ngi bhange-kiu uami, a ngi tele-ku dingi, se o kizuelu kienhiki kia zuela Adoniia, ki kamba ku mu jimisa o muenhu uê.

²⁴ Kienhiki muene Jihova a tunge, a some! Ua ngi fikidila bhu kididi kiki, ua ngi xikamesa bhu kiandu kia tatʼetu Davidi, iu ua ngi tungila dibhata kala kia tangele; Adoniia muthu ua ku mu jibha kizuua kia lelu, sé ngó kulueza.

²⁵ Sobha Solomá anga u katula Benaia, monʼa Jehoiada, hé muene uia, u mu ta ni mukuale uê, u mu jibha.

Abiiatale, o nganga, a mu kaiela kuengi

²⁶ Nganga Abiiatale-phe anga a mu ambela kuala muenexi, uixi: tunda bhabha, uie ku mábhia mé ku Anatote; kuma eie u muthu ua fuama ku ku jibha; maji-phe ki ngi ku jibha mu thembu iii, mukonda eie uambatele jinge o álaka ia Jihova Nzambi bhu pholo ia tatʼetu Davidi, ni hadi ioso ia talele jinge tatʼetu, eie ue ua i talela jinga-nê kumoxi.

²⁷ Kala kiki, Solomá ua kaiesa Abiiatele mu kala ku unganga ua Jihova, phala o kizuelu kia Jihova ki bhite, kia tangele ku thandu dia dibhata dia Eli, bhu Silo.

O kúfua kua Jouabe

²⁸ Kiene kioso kia bhiti anga a ki tudila Jouabe; kuma Jouabe ua diangukile mu kaiela ku kunda dia Adoniia, sumbala a kambele kudianguka mu kukaiela Abisalone. Jouabe anga u lengela mu Balaka ia Jihova, hé u kuata ku jimbinga ja kalatódio.

²⁹ Anga a ki kunda sobha Solomá, exi: Jouabe-phe ua lengela mu Balaka ia Jihova, uala-ze bhu kalatódio. Solomá anga u katula Benaia, monʼa Jehoiada, uixi: Ndé ka mu te.

³⁰ Benaia anga u bhixila mu Balaka ia Jihova, u mu ambela, uixi: Itaia kua muenexi, kuma uedi koko a tunde-ku. Kuala muene, kana; kale ngi fuila bhenhobho. Benaia anga uiza mu tudila muenexi, uixi: Kia zuela-ze Jouabʼiki, kiene kia ngi vutuilʼiki.

³¹ Kuala muenexi: Mu bhange kala kia zuela muene, u mu te, u mu fûnde; phala manhinga ma ẋamuna Jouabe sé kikuma, kà kale ku thandu diami mba ku thandu dia dibhata dia tatʼetu.

³² Jihova a mu vutuile o manhinga mê ku thandu dia mútue uê-muene, kuma muene ua balukila malʼaiadi a mu tundu muene kuiuka o muẋima ni mu ukota, iu ua a jibha ni mukuale uê, sé tatʼetu Davidi ku kʼijiia, ana a Abinele monʼa Nedi, kabhitangu ka kifuxi kia Izalaiele, ni Amasa monʼa Jetele, kabhitangu ka kifuxi kia Juda.

³³ Kala kiki, o manhinga mâ, ma kà vutukila ku thandu dia Jouabe kuene, ni ku thandu dia mbutu iê sé dizubhilu; maji o kua Davidi-phe, ni ku mbutu iê, ni ku dibhata diê, ni ku kiandu kiê, kuà kala paze sé dizubhilu, i tunda jinga kua Jihova.

³⁴ Kia zubha ku mu ambela kiki, Benaia monʼa Jehoiada u banda, u mu ta, hé u mu jibha; anga a mu fûnda bhu bhata diê-muène, ku matutu.

³⁵ Muenexi anga u ta Benaia, monʼa Jehoiada, bhu kididi kiê, mu tumina o kifuxi kia masoladi mê; ni nganga Zadoko a mu ta kuala muenexi bhu kididi kia Abiiatale, o nganga.

O kúfua kua Simeii

³⁶ Muenexi anga u tuma kuixana Simeii, u mu ambela, uixi: Tunga inzo ié mu Jeluzaleme, u xikame momo; kutunde-mu mu kuia ku mbandu iengi kuoso-kuoso.

³⁷ Kuma kizuua kioso ki u tunda-mu, anga u záuka o honga ia Kidalone, ijiia na-kiu kuma ki kala kizuua kié kia kúfua; o manhinga mé mà kala ku thandu dia mútue ué eʼmuène.

³⁸ Simeii anga u kumbulula, uvutuila muenexi, uixi: Kùku, ua zuela kiambote: Kioso ki ua tange u muenexi, kiene ki ngi bhanga eme ngi mubhikʼé. Simeii anga u xikama mu Jeluzaleme izuua iavulu.

³⁹ Mu kukala-kukala-phe, kia bhiti mivu itatu, bhu kala abhika aiadi a Simeii, a mu lenga, aia kua Akiji, monʼa Mahaka, Sobha ia Ngate. Anga a ki kunda Simeii, exi: Abhikʼé-ze iá ku Ngate.

⁴⁰ Simeii anga u balumuka, u zuika o bûlu iê dikombola, uia ku Ngate kua Akiji, mu sota abhikʼê; Simeii anga u bhixila u sanga abhikʼê ku Ngate, hé uiza-nâ ku bhata.

⁴¹ Anga a ki kunda Solomá kuila Simeii ua tundile mu Jeluzaleme iu uele ku Ngate, maji ua vutuka kiá ku bhata.

⁴² Muenexi anga u tuma kuixana Simeii, uixi: Manhi eme ki nga ku lokesele mu dijina dia Jihova, hé ngi ku xinda, ngixi: Ijiia na-kiu kuma kizuua kioso ki u tunda mu mbanza ia Jeluzaleme, ki uia mu kuenda njila ioso-ioso, ki kala kizuua kié kia kufua? Eie anga u ngi vutuila, uixi: Kiauabha kiambote, kizuelu kié nga kʼivu:

⁴³ Kiki-phe eie ua kambela-hi kukumbidila kioso ki ua lokele bhu pholo ia Jihova, ni kioso ki nga ku tendelela kizuua kienhokio?

⁴⁴ Muenexi anga u kumuna dingi mu tangela Simeii, uixi: Ku muẋima ué ku kambe ku kʼijiia, o kubhukumuka kuoso ku ua bhangele tatʼetu Davidi; kala kiki Jihova ua vutula o kubhukumuka kué ku thandu dia mútue ué eʼmuene.

⁴⁵ Maji Sobha Solomá-phe u xala ni dibesá, o kiandu kia Davidi ki di fikidila kiambote bhu pholo ia Jihova, ki ki sendumuka katé ku hádia sé dizubhilu.

⁴⁶ Muenexi anga u tuma Benaia, monʼa Jiehoiada, u tunda-nê ku kanga, hé u mu ta, u mu jibha. Utuminu uaʼxi anga u kuata kiambote bhu lukuaku lua Solomá.