I Jisobha 14 - O Mikanda Ikola

Ahila u dianga kutanga o kusenguluka kua dibhata dia Jelobouamu

¹ Mu izuuʼomo Ahiia, monʼa Jelobouamu, u kuata kukata.

² Anga Jelobouamu uambela muhatuʼê, uixi: Balumuka kindala, phala u di sueke pholo, sembele ka kuijiie kuila muene mukajʼa Jelobouamu, anga uia mu Silo. Muenhomo muene muala polofeta Ahiia, ua ngi tangele eme, kuma ngandu kala sobha ia kifuxi kiki.

³ Anga uambata dikuinhi dia mbolo bhu lukuaku lué, ni tumbolo dingi tuofele, ni thenda ia uiki, nʼuie ko kuê mu ku di mona-nê; o muene ua kà ku tangela kia-ndu bhita ni mona iú.

⁴ Muhatuʼa Jelobouamu anga u bhanga kienhiki, anga u balumuka, hé uia mu Silo, anga u bokona monzo ia Ahiia; o Ahiia muene ua lémbua kiá kumona, mbata mesu mê ma fulamana kiá, mukonda dia kukuka.

⁵ Ngana-phe u tangela Ahiia, uixi: Dimuka! Kuma muhatuʼa Jelobouamu iu uiza ku kuibhula kioso kia-ndu bhita ni monʼê, mukonda ua mu kata. Eie-phe u mu ambela kiki ni kiki. O muene, kia bhixila mu kubokona, ua-ndu di bhangesa kala muthu uengi.

⁶ Anga ki bhita-phe kuma, Ahiia mu kuívua o mixindu ia inama ia muhatu a Jelobouamu, ua mu bokona bhu dibhitu, u mu ambela, uixi: Bokona, mukajʼa Jelobouamu. Ua mu di suekelaʼhi kiki? Mbata eme ngi phunga ié ia ku ku tudila njimbu ja bhuiza.

⁷ Ndé, ua kà tangele Jelobouamu, kuila: O Jihova, Nzambi ia Izalaiele, uambe kiki: Eme nga ku zangula muʼaxaxi ka kifuxi, Eme nga ku te mu kutumina o kifuxi kiami kia Izalaiele.

⁸ Nga tandula o ungana monzo ia Davidi, eme nga kubhana-ku mbandu imoxi eie-phe nguaié kukala kala ngunza iami Davidi, ua bhakele o ijila iami anga u ngi kaiela ni muẋima uê uoso mu kubhanga ngoho kia iukila ku mesu mami,

⁹ inda eie kua kuiza kubhanga kia beta kuiibha, akuenu oso a ku diangela ndenge, mbata uai, eie ua bhange jinzambi jengi ni iteka ia kuiẋika, phala ku ngi lokalala o njinda iami, eie ua ngi bhana dikunda.

¹⁰ Kala kiki, u ki mona! Kuma nga-ndu bheka uíndua ua dikota mʼonzo ia Jelobouamu, anga kua Jelobouamu nga kà jimisa-ku o diiala dioso katé ni kamona kandenge, kixi mubhika mba ngana katé kia jimuka mua Izalaiele; anga luvualu lu tunda mʼonzo ia Jelobouamu nga kà lu komba hé ngi lu texi bhu kanga, kala ki a texi o ditobe, katé oso muene abhu, ka xala kijimbuete.

¹¹ Uoso kua Jelobouamu u fuila mu sanzala, a kà mu dia ku jímbua; o uoso u fuila mu iangu ku mikáu ia hatu, ua kà diua ku jinjila ji bhita bhulu, mbata Jihova ua ki tange.

¹² Eie-phe fundumuka, u vutuke ku bhata dié. Kioso ki ua kà ta inama ié mu sanzala, kamona ua kà fua.

¹³ Anga Izalaiele ioso a ka mu dila thambi, hé a mu funda; mbata, kua Jelobouamu, iú muene ngó ua-ndu bokona mu mbila, mukonda monzo ia Jelobouamu muene ngó a mu sange-mu ni kima kiauabha kua Jihova, Nzambi ia Izalaiele.

¹⁴ O Ngana-phe, ua-ndu di balumuina sobha u tumina Izalaiele; muenhú hé ua kà buidisa o dibhata dioso dia Jelobouamu mu kizuua kimoxi. Maji kindala-phe kia-ndu kala kiebhi ue?

¹⁵ O Ngana ua-ndu kuama ue Izalaiele, kala ki a tutumbisa o dithethele dia mu kunguluka ku menha kiene ue Jihova ua kà vuza Izalaiele mu ixi iambote iii ia bhele ku jitata jâ, anga ua kà a muangena ku sámbua diná dia ngiji ia Ufalate, mukonda a di bhangela mixitu iâ, mu kulokalala o njinda ia Jihova.

¹⁶ O Ngana anga ua kʼèhelela Izalaiele mukonda dia ituxi ia Jelobouamu ua te o kituxi kiê, iu ua tesa ue kituxi kua Izalaiele.

¹⁷ Bhenhobho o mukajʼa Jelobouamu u fundumuka-bhu hé uia, uiza mu Tídiza; o kia bhixila muhatu ka kingila kilembeketa kiê kubokona mʼonzo, kamona kafu.

¹⁸ Anga a mu funda, hé a mu dila kuala Izalaiele ioso, kala o kizuelu kia Ngana, kia tangele mu ukunji ua ngunza iê, polofeta Ahiia.

¹⁹ Ikalakalu dingi ia Jelobouamu, ni kioso kialu ita, ni kia tumina jinga, talesa, kuma ima ioso iòsoneke mu divulu dia ji-ndunda ja jisobha ja Izalaiele.

²⁰ Anga mivu ioso ia bhiti Jelobouamu ku ungana, i tena makuinhi aiadi a mivu ni iiadi mu kutumina. Anga u zeka kiá mu mbila kumoxi ni tata jê; anga Nadabe, monʼê ua diiala, u hinga ungana bhu kididi kiê.

O utuminu ua Lebouamu

²¹ Kienhokio ue Lobouamu, monʼa Solomá, u kala mu kutumina mu Juda. Kioso Lobouamu kia mateka o kutumina ua kexe kiá mu makuinhʼauana a mivu nʼumoxi, anga u bhanga kuinhi dia mivu ni sambuadi ku uosobha mu Jeluzaleme, mu mbanza ia tunguile Jihova mu miji ioso ia Izalaiele nda a tule-mu o dijina diê. Anga u kala ni mamʼâ dijina diê Nahama, mukua Amone.

²² Anga Juda u bhanga kiaiibhila Ngana ku mesu mê ni ku mu kuatesa difuba; kuma ni ituxi i a kexi mu kuta, a tunda dingi kia bhangele jinge o jitata jâ joso.

²³ Mbata akua Juda ene uâ a tungu ididi ia matala ma di leka, ni iteka, ni idifua ia jinzambi ja ditutu ku milundu ioso ia di leka ni bhoxi dia miẋi ioso ia uisu ia di zandela.

²⁴ Kua kexile ue ni minzangala ia jindumbu ja mala, mu ixi, ia kexi mu bhanga jinga o maufusa oso a miji Ngana ia kaiesele bhu pholo ia anʼa Izalaiele.

²⁵ Anga ki bhita-phe kuila, mu kubhiẋila ku muvu ua katanu ua utuminu ua sobha Lobouamu, Sisake, sobha ia Ijito, u banda mu kúlua ni Jeluzaleme.

²⁶ Anga u katula jimbongo joso mʼonzo ia Jihova ni jimbongo joso mʼonzo ia sobha; ima ioso muene, ua katula. Anga u katula ue ni ngubu joso ja ulu ja bhangele Solomá.

²⁷ Anga sobha Lobouamu bhu kididi kiaʼngubu jojo ubhanga ngubu ja ngòndo u ji bhana bhu maku a jikabhitangu, ilolo ia akua kulangidila, a kexi mu langa bhu muelu ua inzo ia sobha.

²⁸ Anga ki bhita jinga kuila kioso sobha kia kala mu bokona monzo ia Ngana, alangidi a katula o jingubu jenhiji, kuma jene ja kuata, anga a vutuka na-ju dingi mʼonzo ia kilangidilu mu ku ji bhaka.

²⁹ Kutanga dingi ikalakalu iamukuá ia Lobouamu, ni ima ioso ia bhangele, manhi ki iòsoneke mu divulu dia malunda a jisoba ja Juda?

³⁰ Maji kua kexile jinge ita bhu kaẋi ka Lobouamu ni Jelobouamu izuua iá ioso.

³¹ Anga Lobouamu u zeka ni mukanda ua mavu kumoxi ni ʼtata jê, hé a mu funda bhu kidindu kia ʼtata jê mu sanzala ia Davidi. Muene anga u kala ni mamʼâ dijina diê Nahama, mukua Amone. Anga monʼê ua diiala, Abiiamu, u bhingana ku usobha bhu kididi kiê.